މިވަގުތަށް އެންމެ ރަނގަޅީ ސެންޑައި ފްރޭމްވޯކަށް އަމަލުކުރުން: ޝާހިދު
މި ފްރޭމްވޯކް އެކުލަވާލާފައިވަނީ ކާރިސާތަކުން ކުރާ އަސަރު ކުޑަކުރުމަށް
އަބްދުﷲ ޝާހިދު
މިފަދަ ދަނޑިވަޅެއްގައި އެންމެ ރަނގަޅު ވާނީ ސެންޑައި ފްރޭމްވޯކާ އެއްގޮތަށް އަމަލުކުރަން ފެށުން ކަމުގައި ރާއްޖޭގެ ފޮރިން މިނިސްޓަރ އަދި އދ. އާންމު މަޖިލީހުގެ ރައީސް އަބްދުﷲ ޝާހިދު ވިދާޅުވެއްޖެއެވެ.
ޝާހިދު މިފަދައިން ވިދާޅުވީ އދ. އާންމު މަޖިލީހުގައި ކުރިއަށްދިޔަ ހައި-ލެވެލް ޕޮލިޓިކަލް ފޯރަމްގެ ސައިޑް އިވެންޓް 'އަ ރިސްކް-އިންފޯރމްޑް އެޕްރޯޗް ޓު ޑިވެލޮޕްމެންޓް އިން އަ ކޮވިޑް-19 ޓްރާންސްފޯމްޑް ވޯލްޑް' ގައި ވާހަކަފުޅުދައްކަވަމުންނެވެ.
ޝާހިދު ވިދާޅުވީ ކޮވިޑް-19އިން އަރައިގަނެ ރަނގަޅު ހާލަތަކަށް ރުޖޫއަވެ، ދެމެހެއްޓެނިވި ތަރައްގީއަށް 2030 ވަނަ އަހަރާ ހަމައަށް އެކުލަވާލާފައިވާ އެޖެންޑާއަށް މަރުހަބާކިޔުއްވާ ކަމަށެވެ. ގޮންޖެހުންތަކެއްގެ ތެރޭގައި 3 ވަރަކަށް އަހަރު ހޭދަކުރެވިފައިވާއިރު، މިހާރު މުޅި ދުނިޔެއިންވެސް ބޭނުންވަނީ އަމާން ބަނދަރެއް ކަމުގައި ޝާހިދު ވިދާޅުވިއެވެ. ދުނިޔޭގައި ދިރިއުޅޭ 8 ބިލިއަން މީހުން ބޭނުންވަނީ ހިތްހަމަޖެހުން ލިބުމާއި، ތަފާތެއް ކަމަށް ވިދާޅުވިއެވެ.
ކޮވިޑް-19ގެ ކުރިން ދުނިޔެ އޮތް ހާލަތަށް ރުޖޫއަވުމަށް މަސައްކަތްކުރާއިރު، މިކަން ކުރަންޖެހެނީ ދެމެހެއްޓެނިވި ގޮތަކަށް ކަމަށް ޝާހިދު ވިދާޅުވިއެވެ. މިކަން ކުރަންޖެހެނީ ސައްހަ މައުލޫމާތަށް ބިނާކޮށް، ސިޔާސަތުތަކާއި، ޕްރޮގްރާމްތަތަކާއެކު ކަމަށް ޝާހިދު ވިދާޅުވިއެވެ.
މިއަހަރުގެ މެއި މަހު އިންޑޮނޭޝިއާގެ ބާލީގައި ކުރިއަށްދިޔަ ގްލޯބަލް ޕްލެޓްފޯމް ފޮރ ޑިޒާސްޓަރ ރިސްކް ރިޑަކްޝަންގައި ފާހަގަކުރެއްވިގޮތަށް، ނުރައްކާތައް މަދު ގޮތަކަށް އަދި ރިސްކުތައް އެނގިގެން ކޮވިޑް-19 އިން އަރައިގަނެ، އަދި މޫސުމީ ބަދަލުތަކާ ދެކޮޅަށް މަސައްކަތްކޮށް، ދެމެހެއްޓެނިވި ތަރައްގީއާ ކުރިއެރުމަށް މަސައްކަތްކުރެވޭނީ ސެންޑައި ޕްރޭމްވޯކާ އެއްގޮތަށް އަމަލުކުރަން ފަށައިގެން ކަމުގައި ޝާހިދު ވިދާޅުވިއެވެ.
ކާރިސާތަކުން އަރައިގަތުމަށް މަސައްކަތްކުރުމަކީ ކޮންމެ މީހެއްގެވެސް މަސްލަހަތު ހިމެނެންޖެހޭ ކަމެއްކަން ކޮވިޑް-19 ޕެންޑަމިކުން އެނގިގެން ގޮސްފައިވާކަމަށާއި، ގްލޯބަލް އަދި ރީޖަނަލް ޕްލެޓްފޯމްތަކުން މިކަން ކުޑަކުރުމަށް އެތައް ފިޔަވަޅެއް އަޅާފައިވާކަމަށް ޝާހިދު ވިދާޅުވިއެވެ.
ސެންޑައި ފްރޭމްވޯކްގެ މިޑްޓަރމް ރިވިއު އަންނަ އަަހަރު އާންމު މަޖިލީހުގައި އޮންނައިރު، މި ފްރޭމްވޯކަށް ބަދަލުތަކެއް ގެނެސްގެން ދެމެހެއްޓެނިވި ގޮތެއްގައި މިކަން ކުރުމަށް ޝާހިދު ވަނީ ގޮވާލައްވާފައެވެ. އަދި މިކަން ތަންފީޒުކޮށް އެދެވޭ ނަތީޖާ ހާސިލްކުރުމަށް ކެޕޭސިޓީ ބޭނުންވާ ގައުމުތަކާއި، މާލީ އެހީ ބޭނުންވާ ގައުމުތައް ދެނެގަނެގެން މަސައްކަތްކުރުމަށްވެސް ޝާހިދު ގޮވާލެއްވިއެވެ.
ސެންޑައި ފްރޭމްވޯކް ފޮރ ޑިޒާސްޓަރ ރިސްކް ރިޑަކްޝަންއަކީ ކާރިސާތަކުން ކުރާ އަސަރު ކުޑަކުރުމަށް 7 ޓާގެޓަކާއި، ޚާއްސަ 4 ކަމެއްގެ މައްޗަށް 2015 އިން 2030 އަށް އެކުލަވާލާފައިވާ އެއްޗެކެވެ.
