ޔުނައިޓެޑް ވިކްޓްރީ ހަތަރަކަށް

މެޗުގެ ފަހު މިނެޓްގެ ލަނޑުން ދަ ގްރާންޑޭ ބަލިކޮށް, ދިވެހި ޕްރިމިއަރ ލީގު ތާވަލްގެ ހަތަރުވަނައަށް ޔުނައިޓެޑް ވިކްޓްރީ ޖެހިލައިފިއެވެ.

ދަ ގްރާންޑޭގެ މައްޗަށް ޔުނައިޓެޑް ވިކްޓްރީން ކުރި ހޯދީ 1-0 ނެވެ. މެޗުގެ ހަމައެކަނި ލަނޑު ފަހު މިނެޓްގައި ކާމިޔާބުކުރީ މުޙައްމަދު ރީހާންއެވެ. މިމޮޅާއެކު ޔުނައިޓެޑް ވިކްޓްރީން ވަނީ 17 މެޗުން 23 ޕޮއިންޓް ހޯދާފައެވެ. ފަސްވަނާގައި އޮތީ 16 މެޗުން 22 ޕޮއިންޓާއެކު ވެލެންސިޔާއެވެ. އަންގާރަ ދުވަހު ހަވީރު ވެލެންސިޔާ ނުކުންނާނީ ގްރީން ސްޓްރީޓްސްއާ ދެކޮޅަށެވެ. އެމެޗުން މޮޅުވެގެން ވެލެންސިޔާއަށް އަލުން ހަތަރުވަނަ ހޯދޭނެއެވެ.

ތިންވަނާގައި އޮތީ 26 ޕޮއިންޓާއެކު ޓީސީއެވެ. ލީގުގައި އަންގާރަ ދުވަހުގެ ރޭ ވާދަކުރާނީ މާޒިޔާއާއި ސުޕަރ ޔުނައިޓެޑް ސްޕޯރޓްސް (ސަސް) އެވެ.