މޯލްޑިވިއަން އޭވިއޭޝަން އެކެޑަމީގެ އުދުހުންތައް ފަށައިފި
އުދުހުންތައް ފެށީ ޖުލައި 10 ވަނަ ދުވަހު
މޯލްޑިވިއަން އޭވިއޭޝަން އެކެޑަމީގެ ދަރިވަރުންތަކެއް
މޯލްޑިވިއަން އޭވިއޭޝަން އެކެޑަމީގެ އުދުހުންތައް ފަށައިފިއެވެ.
އައިލެންޑް އޭވިއޭޝަން ސާވިސް (އައިއޭއެސް) އާއި މޯލްޑިވްސް ނެޝަނަލް ޔުނިވާސިޓީ (އެމްއެންޔޫ) އަދި ޗެކް ރިޕަބްލިކްގެ ފްލައިންގ އެކެޑަމީއާ ގުޅިގެން ހިނގާ މޯލްޑިވިއަން އޭވިއޭޝަން އެކެޑަމީގެ އުދުހުންތައް ފަށާފައިވަނީ ޖުލައި 10 ވަނަ ދުވަހުއެވެ. މޯލްޑިވިއަން އޭވިއޭޝަން އެކެޑަމީގެ އުދުހުންތައް ފެށުމުގެ ހުއްދަ ސިވިލް އޭވިއޭޝަން އޮތޯރިޓީން ދީފައިވަނީ ޖުލައި 3 ވަނަ ދުވަހުއެވެ.
އުދުހުންތައް ފަށާފައިވާއިރު، ޕައިލެޓް ޓްރެއިނިންގ ހަދަމުންދިޔަ ދަރިވަރުންގެ ތެރެއިން ފުރަތަމަ ބެޗްގައި ހިމެނޭ ރިފްރެޝަރ ޕްރޮގްރާމް ނިންމާފައިވާ 35 ދަރިވަރުންގެ ފްލައިންގ ފަށާފައިވެއެވެ. އަދި ދެވަނަ ބެޗްގެ 39 ދަރިވަރުންގެ ރިފްރެޝަރ ޕްރޮގްރާމް މިހާރު ކުރިއަށްދެއެވެ.
މިއަހަރު ނިމުމުގެ ކުރިން ފުރަތަމަ ބެޗާއި ދެވަނަ ބެޗްގެ ކުދިންގެ ފްލައިންގ ނިމޭނެކަމަށް އުންމީދުކުރެވޭ ކަމަށާއި، ތިންވަނަ ބެޗްގެ ކުދިންގެ ރިފްރެޝަރ ޕްރޮގްރާމް މިއަހަރު ނިމުމުގެ ކުރިން ފެށޭނެކަމަށް އައިލެންޑް އޭވިއޭޝަނުން މީގެ ކުރިން ބުނެފައިވެއެވެ.
އައު ކުންފުންޏެއްގެ ދަށުން ފްލައިންގ ސްކޫލުގެ ކިޔެވުން ފަށާފައިވަނީ އައްޑޫގައި ހިންގި ފްލައިން ސްކޫލް ހުއްޓި، އެތަނުގައި ކޯސް ހަދަމުން އަންނަ ދަރިވަރުންގެ ކިޔެވުން މެދުކެނޑިފައިވާތާ އެތަކެއް މަސްތަކެއް ވެފައިވަނިކޮށެވެ. އަދި ފްލައިންގ ސްކޫލްގެ ކިޔެވުން މިއަހަރުގެ ޖެނުއަރީ 10 ވަނަ ދުވަހު ވަނީ ފަށާފައެވެ. މޯލްޑިވިއަން އޭވިއޭޝަން އެކެޑަމީއަކީ ޗެކް ރިޕަބްލިކްގެ ފްލައިންގ އެކެޑަމީއާ ގުޅިގެން ގާއިމުކޮށްފައިވާ ސްކޫލަކަށްވާތީ، މޯލްޑިިވިއަން އޭވިއޭޝަން އެކެޑަމީ ހިންގަމުންދާނީ މޯލްޑިވްސް ސިވިލް އޭވިއޭޝަންގެ ގާވާއިދުތަކުގެ އިތުރުން ޔޫރަޕިއަން އޭވިއޭޝަން ސޭފްޓީ އެޖެންސީގެ ސްޓޭންޑަޑާއެއްގޮތަށެވެ.
އައްޑޫ ސިޓީގައި ގާއިމުކޮށްފައިވާ އޭޝިއަން އެކެޑަމީ އޮފް އެރޯނޯޓިކްސް (އޭއޭއޭ)ގައި ޕައިލެޓްކަން ކިޔަވަމުންދާ ދިވެހި ދަރިވަރުންނަށް ދިމާވެފައިވާ ގިނަ ދުވަސްވީ މައްސަލަތަކަށް ދާއިމީ ހައްލެއް ހޯދުމާ ގުޅޭގޮތުން ރައީސުލްޖުމްހޫރިއްޔާގެ އޮފީހުގައި އޭއޭއޭގައި ޕައިލެޓްކަން ކިޔަވަމުންދާ ދިވެހި ދަރިވަރުންނާއި ކަމާގުޅޭ އިދާރާތަކުގެ އިސްވެރިންނާއެކު އޭރު ބައްދަލުވުމެއް ވެސް ބޭއްވިއެވެ. މި ބައްދަލުވުމުގައި އޭއޭއޭގެ ދަރިވަރުން ވަނީ އެ ދަރިވަރުންނަށް ދިމާވެފައިވާ ކަންކަމަށް ހައްލު ހޯދުމަށް ހުރިހާ އިދާރާއަކަށް ދިޔަކަމަށާއި، ކުރެވެންހުރި ހުރިހާ މަސައްކަތެއް ކޮށްފައިވީ ނަމަވެސް، އެއްވެސް އެދެވޭ ޖަވާބެއް ލިބިފައި ނުވާ ކަމަށް ބުނެފައެވެ. އެ ދަރިވަރުން ބުނީ ރީފަންޑް ނުލިބުމާއި، އަލުން ކިޔެވުން ފެށޭނެ ދުވަހެއް ނޭނގުމުގެ ސަބަބުން އެ ދަރިވަރުންނަށް ދިމާވަމުންދާ މާލީ، ނަފްސާނީ، އަދި ވަގުތުގެ ގޮތުން ދިމާވާ ދަތިތައް ވެސް އެބަހުރި ކަމަށެވެ.
އެކަމާ ގުޅޭގޮތުން ރައީސް ސާލިޙް ވަނީ ކުދިންނަށް ދިމާވެފައިވާ މާލީ ދަތިތައް ހައްލުކޮށްދެއްވުމަށް ޓޮޕްއަޕް ލޯންތަކެއް ދިނުމާއި، މިކަމުގައި އިތުރަށް ކުރެވެން ހުރި ކަންތައްތަކަކީ ކޮބައިތޯ ބެއްލެވުމަށްފަހު އެކަންކަން ހައްލުކޮށްދެއްވާނެކަމުގައި ވިދާޅުވެފައެވެ. މީގެ ކުރިން ވެސް ސަރުކާރުން ވަނީ މި ކޯސް ހަދާ ދަރިވަރުންނަށް ލުޔެއް ދިނުމުގެ ގޮތުން ދަރިވަރުން އަނބުރާ ލޯނު ދައްކަންޖެހޭނީ ކޯސް ނިމޭ ތާރީޚުން ފެށިގެން 6 މަސްދުވަސް ފަހުންކަމުގައި ކަނޑައަޅައި، މި ކޯސް ފުރިހަމަކުރުމަށް ބައެއް ދަރިވަރުން ބޭންކް އޮފް މޯލްޑިވްސް މެދުވެރިކޮށް ނަގާފައިވާ "ކިޔަވާ" ލޯންތައް ހަޔަރ އެޑިއުކޭޝަން މިނިސްޓްރީގެ ދަށަށް ބަދަލުކޮށްފައެވެ. އައްޑޫ ފްލައިންގ ސްކޫލްގައި ކިޔަވާ ދަރިވަރުންގެ ކިޔެވުން ހުއްޓި، ލިބުނު ގެއްލުމުގެ ބަދަލު ހޯދަން އެ ދަރިވަރުން ސިވިލް ކޯޓަށް ހުށަހަޅާފައިވާ މައްސަލަ ވެސް މިހާރު ކުރިއަށްދެއެވެ.
