އިނގިރޭސިވިލާތުގެ ކޮވިޑް ކޭސްތައް 2.7 މިލިއަނުން މައްޗަށް އަރައިފިއެވެ.

ރިޕޯޓުތައް ބުނާ ގޮތުން އެ ޤައުމުގެ ކޮންމެ 25 މީހުންގެ ތެރެއިން އެކަަކަކީ ކޮވިޑް ބައްޔަށް ޕޮޒިޓިވްވެފައިވާ ފަރާތެކެވެ. މިހާރު ކޮވިޑް ކޭސްތައް އެހާ ބޮޑަށް އިތުރުވަމުން ދަނީ އޮމިކްރޯންގެ ސަބް ވޭރިއަންޓުތައް ކަމަށްވާ ބީއޭ-4 އަދި ބީއޭ-5 ގެ ސަބަބުންނެވެ.

އެ ޤައުމުގައި ކުރިން ބަލިޖެހިފައިވާ ފަރާތްތައްވެސް އަނެއްކާވެސް ޕޮޒިޓިވްވަމުންދާކަމަށް ބޭރުގެ ނޫސްތަކުން ވަނީ ރިޕޯޓުކޮށްފައެވެ.

ސިއްޙީ އޮފިޝަލުން ވަނީ ވެކްސިން ފުރިހަމަ ކުރަންޖެހޭ ފަރާތްތައް ވީހާވެސް އަވަހަށް ވެކްސިން ފުރިހަމަކޮށް، ބޫސްޓަރ ޑޯޒްވެސް ޖެހުމަށް އިލްތިމާސްކޮށްފައެވެ. އަދި މިހާރު ވައިރަސް ފެތުރެމުންދާ ނިސްބަތް ދެނެގަތުމަށް ކަމާ ގުޅުންހުރި ޑޭޓާތައް ބަލައި، އެކަމުގެ ދިރާސާތައް ޔޫކޭގެ ކަމާބެހެ ފަރާތްތަކުން ދަނީ ހަދަމުންނެވެ.

މިހާތަނަށް އެއްކުރެވިފައިވާ ޑޭޓާތަކަށް ބަލާއިރު، އެ ޤައުމުގެ ހުރިހާ ހިސާބެއްގައިވެސް ވައިރަސް ފެތުރެމުންދާ މިންވަރު އިތުރުވެފައިވާކަމަށް ސިއްޙީ މާހިރުންނާއި ޙަވާލާދީ ބޭރުގެ ނޫސްތަކުން ރިޕޯޓުކޮށްފައިވެއެވެ. އެގޮތުން އެންމެ ބޮޑަށް މިވަގުތު ބަލި ފެތުރެމުންދަނީ ސްކޮޓްލެންޑުގައި ކަމަށްވެއެވެ.

އޭގެ އިތުރުން، ހޮސްޕިޓަލުގައި އެޑްމިޓް ކޮށްގެން ފަރުވާދޭން ޖެހިފައިވާ މީހުންގެ އަދަދުވެސް އިތުރުވެފައިވާއިރު، އުމުރުން 75 އަހަރުން މަތީގެ މީހުން ގިނަކަން ވަނީ ފާހަގަކޮށްފައެވެ. ޑރ މަރީ ރަމްސޭ ވިދާޅުވާ ގޮތުގައި އެ ޤައުމުގެ އުމުރުން 75 އަހަރުން މަތީގެ 16 އިންސައްތަ މީހުން އަދި މިހާތަނަށް ބޫސްޓަރ ޑޯޒް ޖަހާފައެއް ނުވެއެވެ.

އިނގެރޭސިވިލާތުގައިވެސް ދުވާލެއްގެ މައްޗަށް 11،000ށް ވުރެ ގިނަ މީހުންނަށް ކޮވިޑް ބަލީގެ ސަބަބުން ހޮސްޕިޓަލުގައި އެޑްމިޓް ކޮށްގެން ފަރުވާ ދޭން ޖެހިފައިވެއެވެ.