ރަޝިއާގެ ބާރުތަކާ ކުރިމަތިލަމުން ދިޔައިރު ކުރިމަތީގައި އޮތީ މާމަގެ ގަބުރު!

ހަނގުރާމައިގެ ބިރުވެރި ޖަރީމާ ވަށާލުމަކީ އެންމެ ގަދަ ހިތްވަރާއެކު ތެދުވެ ހުންނަ މީހާގެ ލޮލުން ކަރުނަ ފޫއްދާލާނެ އެތައް ކަމަކާ ކުރިމަތި ކުރުވާ ހާލަތެކެވެ. ކޮރޯނާވައިރަސް ޑިޒީޒް (ކޮވިޑް-19)ގެ ބަލިމަޑުކަމުގައި އިނދަޖެހުނު ގޮތަށް ހިންދަމާ ނުލެވި އުޅެނިކޮށް، ޔޫކްރެއިންގެ ރައްޔިތުންނާ އަރާ ހަމަ ކުރި ވަރުގަދަ ހަނގުރާމާގައި އެންމެ ބޮޑަށް ގެއްލުންވި އެއް ސަރަހައްދު ކަމުގައިވާ ޑޮނެޓްސްކްގެ ރަށްވެއްސެއް ކަމަށް ވާ މީރޯސްލާވް ސޯޗެންކޯގެ ލޮލުން ކަރުނަތައް ފައިބަމުން ދިޔައިރު އޭނާ ހުރީ، ގޯތި ތެރޭގައި މަރުވެފައިވާ މާމަގެ ގަބުރަށް ބަލަހައްޓައިގެންނެވެ.

ޖުލައި 9، 2022 ވީ ހޮނިހިރު ދުވަހަކީވެސް ރަޝިއާގެ ބާރުތަކާ ދެކޮޅަށް ޔޫކްރެއިންގެ ދިފާއަށް ނުކުމެ ތިބި ރައްޔިތުން ވަރުގަދަ ހިތްވަރެއް ދެއްކި ދުވަހެކެވެ. މި ފަހަކަށް އައިސް ރަޝިއާއިން އެންމެ ގަދައަށް ހަމަލާތައް ދެމުން ޑޮނެޓްސްކް ސަރަހައްދުގެ ރައްޔިތުންވެސް އޭގެ ތެރޭގައި ހިމެނޭހެންނެވެ. ހަނގުރާމައިގެ އަސަރު ހުރިހާ ގޮތަކުންވެސް ކުރަމުން ދަނީ އާންމު ރައްޔިތުންނަށް ކަން، ސޯޗެންކޯގެ ވާހަކަތައް އަޑު އަހާލުމުން އެނގެއެވެ. ޖިސްމާނީ ގޮތުންނާއި ނަފްސާނީ ގޮތުން ކޮށްފައި ވާ އަސަރުތައްވެސްމެއެވެ.

އޮކްސާނާ ކަޒެލްސްކާ، އޭނާ ގެންގުޅޭ ކުއްތާއަށް ލިބިފައިވާ ޒަހަމްތަކުގައި ބޭސް އެޅުމުގެ ކުރިން، ފޮތިގަނޑެއް އަޅާ، މައިދައިތަގެ ގަބުރު ނިވާ ކުރިއެވެ. އެ މައިދައިތަގެ ދެ އަތާއި ދެ ފައި ވެސް އޮތީ ނުވަތަށް އެނބުރިފައެވެ. އެ ވަރުގެ އަނިޔާއެއް މީހަކަށް ދޭނެ ގޮތެއް، އޮކްސާނާއަކަށް ނުވިސްނެއެވެ.

ގިނަ މީހުންނަކީ އުފަން ވަޒަނަށް، ހިތުގައި ހާއްސަ ލޯތްބަކާ ގަދަރެއް ދޭ މީހުންނެވެ. ކޮންމެ ފަދަ ހާލެއްގައިވެސް އަމިއްލަ ވަޒަނަށް ފުރަގަސް ދޭން ބޭނުން ނުވާ މީހުން މަދެއް ނޫނެވެ. ހަމައެކަނި ލީނާގެ ނަމުން މީޑިއާގައި ނަން ހާމަ ކުރި މީހާގެ ވާހަކައިންވެސް އެކަން ދޭހަވެއެވެ. ރަޝިއާގެ އަސްކަރިއްޔާއިން ހަނގުރާމަ ފެށުމުން، އެހެން ހިސާބަކަށް ބަދަލުވާން ދިން އިރުޝާދަށް އޭނާ ދިނީ ބީރު ކަންފަތެކެވެ.

ޑޮނެޓްސްކްއާއި ލުހާންސްކަށް ހަމަލާތަކެއް ދީފައި ވާ ކަމަށް ޔޫކްރެއިންގެ އޮފިޝަލުން ވަނީ އިއުލާންކުރައްވާފައެވެ. ކަން މިހެން އޮތް އިރު އިނގިރޭސި ދިފާއީ ވުޒާރާއިން ވަނީ، ޔޫކްރެއިންއާ ދާދި ކައިރިން ރާޝިއާގެ ރިޒާވް ފައުޖުތައް ރުކުރުވަމުން ދާކަމަށް ރިޕޯޓްކޮށްފައެވެ.

ކަން މިހެން އޮތް އިރު، ރަޝިއާއިން ދަނީ ޔޫކްރައިންގެ އާންމުންނަށް އަމާޒުކޮށްގެން ހަމަލާ ދޭ ވާހަކަތައް ދޮގު ކޮށްފައެވެ.