ލަންކާ ބޮޑުވަޒީރުގެ ގެކޮޅުގައި ރޯކޮށްލި މައްސަލަ ރައީސް ނަޝީދު ކުށްވެރިކުރައްވައިފި

ސްރީލަންކާގައި ސަރުކާރާ ދެކޮޅަށް މުޒާހަރާކުރަމުންދާ ފަރާތްތަކުން ބޮޑުވަޒީރުގެ ގެކޮޅުގައި އަލިފާން ރޯކޮށްލުމުން އެކަންތައް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ކުށްވެރިކުރައްވައިފިއެވެ.

އެ ގައުމުގެ ބޮޑުވަޒީރުގެ އޮފީހުން އާއްމުކޮށްފައިވާ ބަޔާނެއްގައި ބުނެފައިވަނީ، ހޮނިހިރު ދުވަހު ހިންގި ހަމަނުޖެހުންތަކުގައި ރޯކޮށްލާފައިވަނީ ރަނިލް ވިކްރަމަސިންހަގެ އަމިއްލަ ގެކޮޅުގައި ކަމަށެވެ. މުޒާހަރާކުރަމުންދިޔަ ގިނަ ބަޔަކު ވިކްރަމަސިންހަގެ ގެކޮޅަށް ވަދެފައިވަނީ ހޮނިހިރު ދުވަހުގެ ރޭގެ ވަގުތެއްގައެވެ.

Advertisement

މިކަން ކުށްވެރިކުރައްވައި ރައީސް ނަޝީދު ކުރެއްވި ޓްވީޓެއްގައި ވިދާޅުވީ، ބޮޑުވަޒީރު ރަނިލް ވިކްރަމަސިންހަ މަގާމާ ހަވާލުވެވަޑައިގެންނެވިތާ އަދި ވީ ދުވަސްކޮޅެއް ކަމަށާއި، ލަންކާގައި މިހާރު ކުރިއަށްދާ ކަންކަން ހަމައަކަށްއެޅުވުމަށް އެމަނިކުފާނު ގެންދަވަނީ ނުހަނު ބުރަ މަސައްކަތްތަކެއް ކުރައްވަމުން ކަމަށެވެ. އެމަނިކުފާނުގެ ގެކޮޅު އަންދާލުމަކީ އެ މަސައްކަތަށް ކުރިއެރުމެއް ގެންނާނެ ކަމެއް ނޫންކަމުގައި ރައީސް ނަޝީދު ވިދާޅުވިއެވެ.

ލަންކާގެ ހާލަތު ގޯސްވެ، އެ ގައުމުގައި މުޒާހަރާތައް ވަނީ އިތުރުވެފައެވެ. މި މުޒާހަރާތައް ކޮންޓްރޯލުން ނެއްޓުމުން އެ ގައުމުގެ ސިފައިން ވަނީ މުޒާހަރާ ރޫޅާލުމަށް ކަރުނަގޭހާއި ބާރުގެ ބޭނުންވެސް ކޮށްފައެވެ. ސިފައިންގެ ހަމަލާތަކުގެ ޝިކާރައަކަށް އެ މުޒާހަރާތައް ކަވަރު ކުރަމުންދިޔަ ނޫސްވެރިންތަކެއް ވެސް ވަނީ ވެފައެވެ.

ހޮނިހިރު ދުވަހުގެ ހަމަނުޖެހުންތަކާއެކު ރަނިލް ވިކްރަމަސިންހަ ވަނީ މަގާމުން އިސްތިއުފާ ދެއްވައި، ހުރިހާ ޕާޓީތަކެއް ގުޅިގެން ގައުމު ހިންގަން ފުރުސަތު ދެއްވުމަށް ތައްޔާރަށް ހުންނެވިކަމަށް ވިދާޅުވެފައެވެ.

ބޮޑުވަޒީރުގެ ގެކޮޅުގެ އިތުރުން ލަންކާގެ ރައީސް ގޮތަބަޔަ ރާޖަޕަކްސްގެ އިސްތިއުފާއަށް ގޮވާލައި އެމަނިކުފާނުގެ ގެކޮޅަށްވެސް، ސެކިއުރިޓީ ފޫއަޅުވާލައި މުޒާހަރާކުރި ފަރާތްތަކުން ވަނީ ވަދެފައެވެ. އަދި މުޅި ގެކޮޅުގެ ހުރިހާތަނަކަށް ވަދެ ސްވިމިންގ ޕޫލަށްވެސް އެރި ހަދާފައިވެއެެވެ.

ލަންކާގެ ނޫސްތަކުގައި އެގައުމުގެ ރައްޔިތުންގެ މަޖިލީހުގެ ރައީސާ ހަވާލާދީ ބުނެފައިވާ ގޮތުގައި، ރައީސް ގޮތަބަޔާ ވަނީ ޖުލައި 13ގައި އިސްތިއުފާދެއްވަން ނިންމަވާފައެވެ.

ލަންކާއަށް މިހާރު ދިމާވެފައިވާ އިގުތިސާދީ ކާރިސާއާއެކު ގޮތަބަޔާގެ އިސްތިއުފާއަށް ގޮވާލައި އަޑުއުފުލަމުންދާ އާންމު ރައްޔިތުންގެ އަދަދު ދަނީ އިތުރުވަމުންނެވެ. އާންމުންގެ ނުރުހުން ވަރަށް ބޮޑަށް ރައީސަށް އަމާޒުވެފައިވާއިރު، ސިޔާސީ އިދިކޮޅު ލީޑަރުންވެސް ދަނީ ރައީސްގެ އިތުބާރު ނެތްކަމަށް ބުނެ މަގާމުން ވަކިކުރުމަށް މަސައްކަތްކުރަމުންނެވެ.