ސްރީލަންކާގެ އިގުތިސާދީ ކާރިސާ - ގައުމުގެ 2 ވެރިން އިސްތިއުފާ ދެއްވަނީ، ކުރިމަގާ މެދު އެތަކެއް ސުވާލެއް އުފެދިފައި
ރައީސް ގޮތަބަޔާ ރާޖަޕަކްސަ ޖުލައި މަހުގެ 13 ވަނަ ދުވަހު މަގާމުން އިސްތިއުފާދެއްވާނެ
ލަންކާގެ ރައްޔިތުން ކުރަމުންދާ މުޒާހަރާގެ ތެރެއިން
ސްރީލަންކާއަށް އާދީއްތަ ދުވަހު އިރުއެރީ އެގައުމުގެ މުސްތަގުބަލާމެދު ސުވާލު އުފެދޭ ހާލަތެއްގައެވެ. ސްރީލަންކާގެ އިގުތިސާދީ ކާރިސާއާ ގުޅިގެން އެގައުމުގައި މުޒާހަރާ ކުރަމުންދާ އެތައްހާސް ބަޔަކު އެގައުމުގެ ރައީސާއި ބޮޑުވަޒީގެ ގެކޮޅަށް ވަދެ ހަމަނުޖެހުން ހިންގައި މުދަލާއި ތަކެއްޗަށް ގެއްލުން ދީފައިވާއިރު، ގައުމުގެ ރައީސާއި ބޮޑުވަޒީރުވެސް ވަނީ މަގާމުން އިސްތިއުފާދެއްވުމަށް ނިންމަވާފައެވެ.
ރައީސްގެ ރަސްގެކޮޅަށް ވަދެ އެތަނުގައި ހުރި ތަކެތި ބޭނުންކޮށް ރައީސްގެ ސްވިމިންގ ޕޫލް ބޭނުންކޮށްފައިވާއިރު، ހޮނިހިރު ދުވަސް ދެބައިވިފަހުން ލަންކާގެ މަޖިލީހުގެ ރައީސް ވަނީ، ރައީސް ގޮތަބަޔާ ރާޖަޕަކްސަ ޖުލައި މަހުގެ 13 ވަނަ ދުވަހު މަގާމުން އިސްތިއުފާ ދެއްވާނެކަން ހާމަކުރައްވާފައެވެ.
މުޒާހަރާކުރި މީހުން ވަނީ ބޮޑުވަޒީރު ރަނިލް ވިކްރަމްސިންހައަށް ޓާގެޓްކޮށް، އެމަނިކުފާނުގެ އަމިއްލަ ގެކޮޅުގައި ހުޅުޖަހާފައެވެ. އަދި އޭގެފަހުން ވިކްރަމްސިންހަ ވަނީ، މަގާމުން އިސްތިއުފާދެއްވައި ގުޅިފައިވާ ޕާޓީތަކުގެ ސަރުކާރެއް އެކުލަވާލުމަށް ފުރުސަތު ދެއްވާނެކަމަށް ވިދާޅުވެފައެވެ.
ރައީސާއި ބޮޑުވަޒީރު އިސްތިއުފާދެއްވާނެކަން އިއުލާން ކުރުމާއެކު، މުޒާހަރާކުރަމުން ދިޔަ މީހުން ވަނީ މަގުތަކުގައި ލަވަކިޔައި، ހަވާއަރުވައި، އުފާފާޅުކޮށްފައެވެ. ގައުމުގެ އިގުތިސާދީ ކާރިސާއާ ގުޅިގެން މަސްތަކެއް ވަންދެން މުޒާހަރާކުރަމުން ދިޔަ ފަރާތްތަކުން ޑިމާންޑް ކުރަމުންދިޔަގޮތަށް ރާޖަޕަކްސަ އިސްތިއުފާދެއްވުމަކީ އެފަރާތްތަކަށް ލިބުނު ކާމިޔާބީއެކެވެ.
އިގުތިސާދީ ހަމަނުޖެހުމާއެކު، އިންޑިއާ ކަނޑުގައި އޮންނަ ސްރީލަންކާގެ 22 މިލިއަން މީހުން މިއަދު ވަނީ އިންސާނީ ކާރިސާއަކަށް ހުށަހެޅިފައެވެ. އެތައް މިލިއަން މީހުންނަށް ކާއެތިކޮޅެއް ގަނެވޭނެ ފައިސާ ނެތްއިރު، ބޭސްފަރުވާކުރެވޭނެ އަދި ތެޔޮ ގަނެވޭނެހާވެސް ލަޔާގަތެއްނެތެވެ.
މަސްތަކެއް ވަންދެން ސުލްހަވެރިކަމާއެކު މުޒާހަރާކުރަމުންގޮސް ހޮނިހިރު ދުވަހު އެންމެ ފަހުން ލައްކައެއްހާ މީހުން މުޒާހަރާކުރަން ދިޔައީ ރާޖަޕަކްސަގެ ރަސްމީ ގެކޮޅު ކައިރިއަށެވެ. އަދި އިސްތިއުފާއަށް ގޮވަމުން ދިޔަ އަޑުފަށްގަނޑު މުޅި ހިސާބުގައި ގުގުމާލިއެވެ.
ލަންކާގެ ގައުމީ ޓީވީއާއި ސޯޝަލް މިޑިއާއިން ވަގުތުން ދުރަށް ދައްކަމުންދިޔަ މަންޒަރުތަކުން ފެނިގެން ދިޔައީ މުޒާހަރާކުރާ މީހުން ރައީސްގެ ގެކޮޅަށާއި، އޮފީހަށް ސެކިއުރިޓީ ކޯޑަން ފޫއަޅުވާލުމަށްފަހު ވަދެގަތްތަނެވެ. ފޮޓޯތަކުން ފެންނަގޮތުގައި މުޒާހަރާގެ ބައިވެރިން ދިޔައީ ގެކޮޅުގެ ތެރެއަށްވަދެ ބެލްކަނިތަކުގައި ބެނާތައް އެލުވަމުންނެވެ.
އޭގެ ފަހުން ހޮނިހިރު ދުވަހު ދެން ފެނިގެންދިޔައީ ބޮޑުވަޒީރު ވިކްރަމްސިންހަގެ ގެކޮޅުގައި ރޯކޮށްލިތަނެވެ. އެތައް ހާސް ބަޔަކު އެތަނަށްވެސް އެއްވިއެވެ. ނަމަވެސް މި ދެ ހާދިސާ ހިނގިއިރުވެސް ރައީސާއި ބޮޑުވަޒީރުވެސް ގެކޮޅުގައި ނުއުޅުއްވައެވެ. އަދި އެ ހަމަލާގެ ކުރިން ސެކިއުރިޓީ އޮފިޝަލުން ވަނީ ދެބޭފުޅުންވެސް ރައްކާތެރި ތަނަކަށް ބަދަލުކޮށްފަވެއެވެ.
ހޮނިހިރު ދުވަހުގެ ހަމަނުޖެހުންތަކާ ގުޅިގެން 20 އަހަރު ވަންދެން ލަންކާގައި ވެރިކަން ކޮށްފައިވާ ރާޖަޕަކްސަ އާއިލާގެ ސިޔާސީ ހަޔާތް ނިމުމަކަށް އަތުވެދާނެކަމަށް ބެލެވެއެވެ.
ވީޑިއޯ މެދުވެރިކޮށް ދެއްވި މެސެޖެއްގައި ލަންކާގެ ގާނޫނު ހަދާ މަޖިލީހުގެ ރައީސް މަހިންދަ ޔާޕާ އަބޭވަރދެނާ ވިދާޅުވީ، ރާޖަޕަކްސަ ވެރިކަމުން ދުރުވާން ނިންމު ނިންމަކީ ބާރުތައް ސުލްހަވެރިކަމާއެކު ބަދަލުކުރުމަށް ލިބިގެންދާނެ ފުރުސަތެއް ކަމަށެވެ.
ނަމަވެސް ލަންކާގެ ބާރުތައް ބަދަލުކުރުމުގެ މަރުހަލާގެ ކަންކަން ކުރިއަށްދާނީ ކިހިނެއްކަމެއް، އަދި އޮމާންކަމާއެކު އެކަން ކުރެވިދާނެކަމާމެދުވެސް ބައެއް ފަރާތްތަކުން އަންނަނީ ޝައްކު އުފައްދަމުންނެވެ.
ވިކްރަމްސިންހައާއި މަހިންދައާ ދެބޭފުޅުން އިސްތިއުފާ ދެއްވައިފިނަމަ، ސްރީލަންކާގެ ގާނޫނުގައި ބުނާ ގޮތުން، މަޖިލީހުގެ ރައީސް ގައުމުގެ ރައީސްކަމުގެ މަސްއޫލިއްޔަތު 30 ދުވަސް ވަންދެން އުފުއްލަވާނެއެވެ. އަދި މި 30 ދުވަހުގެ މުއްދަތުގެ ތެރޭގައި ގާނޫނު ހަދާ މަޖިލީހުގެ މެންބަރަކު ރައީސްކަމަށް އައްޔަންކުރައްވާނެއެވެ. އަދި މަޖިލީހުން ހޮވާ މެންބަރަކު ރިޔާސީ ދައުރުގެ ބާކީ އޮތް 2 އަހަރު ފުރިހަމަކުރާނެއެވެ.
އެމެރިކާގެ ސެނެޓުގެ ފޮރިން ރިލޭޝަން ކޮމިޓީން އާދީއްތަ ދުވަހު ބުނެފައިވަނީ، މަހިންދަ ރާޖަޕަކްސައަށް އެމަނިކުފާނުގެ ރައްޔިތުންގެ މެދުގައި އޮތް އިތުބާރު ގެއްލިވަޑައިގެންފައިވާ ކަމަށެވެ. އަދި ޕާޓީތަކުން އެކުގައި މަސައްކަތްކުރަންވީ ބައިނަލްއަގުވާމީ މުޖްތަމައުއާ ގުޅިގެން ޑިމޮކްރަސީއަށް އިހުތިރާމްކުރާ، އިގުތިސާދީ އަނދަވަޅުން ގައުމު ކޮޅަށްޖަހާ، އަދި ލަންކާގެ ރައްޔިތުންނަށް ބޭނުންޖެހިފައިވާ އިންސާނީ ހައްގުތައް ނެގެހެއްޓޭނެ ސަރުކާރެއް އެކުލަވާލުންކަމަށެވެ.
މީގެ އިތުރުން ސިފައިންނާއި ފުލުހުން މިވަގުތު ހަމަޖެހުން އުފައްދަން ފުރުސަތު ނުދީ ހައްލުހޯދޭނެ މަގު ފަހިކޮށްދިނުމަށް މަސައްކަތްކޮށް، އިތުރަށް މަސްރަހު ގޯސްވިޔަނުދިނުމަށް މަސައްކަތްކުރުމަށް ވަނީ ބުނެފައެވެ.
ހޮނިހިރު ދުވަހުގެ ހަމަނުޖެހުންތަކުގައި 55 މީހަކަށް އެކިވަރުގެ އަނިޔާވެފައިވާ ކަމަށް ލަންކާގެ ގައުމީ ހޮސްޕިޓަލުގެ ޑޮކްޓަރެއް ކަމަށްވާ ޕުޝްޕާ ޒޮއިސާއާއި ހަވާލާދީ މީޑިއާތަކުގައި ވަނި ރިޕޯޓްކޮށްފައެވެ. މި މީހުންގެ ތެރޭގައި ބަޑީގެ ހަމަލާފައި ޒަހަމްވި 3 މީހަކު ހިމެނެއެވެ. އަނިޔާވި މީހުންގެ ތެރޭގައި ގާނޫނުހަދާ މަޖިލީހުގެ ހުޅަނގު ސްރީލަންކާއަށް ނިސްބަތްވާ މެންބަރުން ހިމެނެއެވެ. ލަންކާގެ ޗެނެލް ނިއުސް ފަސްޓްގެ 2 ނޫސްވެރިއަކަށް ވެސް އަނިޔާވިކަމަށް ރިޕޯޓްތައް ބުނެއެވެ.
އަދި ދެ ނޫސްވެރިންނަށް އަނިޔާވިއިރު އެ ދެމީހުން ތިބީ ފީލްޑުގައި ލައިވްކުރާށެވެ. ނިއުސް ފަސްޓުން އާންމުކުރި ވީޑިއޯއިން ފެންނަގޮތުގައި; ކުރިމަތިލުންތަކުގެ ތެރެއިން 2 ނޫސްވެރިއަކު ކޮށްޕާލައި ވައްޓާލާފައިވެއެވެ. އަދި އެ ދެމީހުންނަށް އެހީތެރިވާން ދިޔަ ނޫސްވެރިއާއަށްވެސް ހަމަލާދީފައިވާކަމަށް އެ ނޫހުން ބުނެފައިވެއެވެ.
ސްރީލަންކާގެ ފުލުހުންގެ އިންސްޕެކްޓަރ ޖެނެރަލް ސީޑީ ވިކްރެމަރަތުނެ ވިދާޅުވީ، ހަމަލާދިނުމުގައި ބައިވެރިވިކަމުގެ ތުހުމަތު ކުރެވޭ ފުލުހުން ވަގުތުން ސަސްޕެންޑްކޮށްފައިވާ ކަމަށެވެ. ވިކްރެމަރަތުނެގެ އިތުރުން ބޮޑުވަޒީރު ވެސް ވަނީ ހަމަލާ ކުށްވެރިކުރައްވާފައެވެ. އޭނާ ވިދާޅުވީ ސްރީލަންކާގެ ޑިމޮކްރަސީގެ ހަޔާތުގައި މީޑިއާގެ މިނިވަންކަމަކީ މުހިންމު ކަމެއް ކަމަށެވެ. އަދި ސަލާމަތީ ބާރުތަކުންނާއި މުޒާހަރާ ކުރަމުންދާ ފަރާތްތަކުން، އާންމުންގެ ރައްކާތެރިކަމަށްޓަކައި، ހަމަނުޖެހުން އުފެދޭގޮތަށް އަމަލުތައް ނުބެހެއްޓުމަށް ވަނީ އެދިވަޑައިގެންފައެވެ.
