ސްރީލަންކާގެ ރައީސް ގޮތަބަޔާ ރާޖަަޕަކްސަ މަގާމުން އިސްތިއުފާ ދެއްވަން ނިންމަވާފައިވާ ކަމަށް އެޤައުމުގެ ރައްޔިތުންގެ މަޖިލީހުގެ ރައީސް މަހިންދަ ޔަޕާ އަބޭވަރުދަނާ ވިދާޅުވެއްޖެއެވެ.
ލަންކާގެ ނޫސްތަކުގައި އެޤައުމުގެ ރައްޔިތުންގެ މަޖިލީހުގެ ރައީސާ ހަވާލާދީ ބުނެފައިވާ ގޮތުގައި ރައީސް ގޮތަބަޔާ މަގާމުން އިސްތިއުފާ ދެއްވާނީ ޖުލައި 13ގައެވެ. އެކަމާ ގުޅޭ އިތުރު ތަފްސީލެއް އޭނާ ހިއްސާ ކުރައްވާފައެއް ނުވެއެވެ.
ގޮތަބަޔާ އިސްތިއުފާ ދެއްވަން ނިންމެވީ އެމަނިކުފާނުގެ އިސްތިއުފާއަށް ގޮވާލައި ގިނަ ބަޔަކު މުޒާހަރާ ކުރަމުން ދިއުމާ ގުޅިގެންނެވެ. އަދި މުޒާހަރާ ކުރަމުންއައި ފަރާތްތަކުގެތެރޭން ވަރަށް ގިނަ އަދަދެއްގެ ބަޔަކު ހޮނިހިރު ދުވަހުވަނީ އެމަނިކުފާނުގެ ގެކޮޅަށް ވަދެގަނެފައެވެ.
ރިޕޯޓުތައް ބުނާގޮތުން އާންމު ރައްޔިތުން ރައީސްގެ ގެކޮޅަށް ވަދެގަތުމުގެ ކުރިން ރައީސް ގޮތަބަޔާ ވަނީ ރައްކާތެރި ތަނަކަށް ގެންގޮސްފައެވެ. ބެލެވޭ ގޮތުގައި އެއީ މިލިޓަރީ ބެރެކްސް އެކެވެ.
ގައުމުގައި ދަތިހާލަތު އިތުރު ވަމުން ދިއުމާއި އެކު ރައީސް ގޮތަބަޔާގެ އިސްތިއުފާއަށް ގޮވާލައި މުޒާހަރާ ކުރާ ފަރާތްތައް ދަނީ އަދިވެސް އިތުރުވަމުންނެވެ.
ގޮތަބަޔާގެ އިތުރުން ލަންކާގެ ބޮޑުވަޒީރު ރަނިލް ވިކްރަމަސިންހާގެ އިސްތިއުފާއަށް ވެސް ގިނަބަޔަކު ދަނީ ގޮވާލަމުންނެވެ. އެމަނިކުފާނުގެ އަމިއްލަ ގެކޮޅަށް ވަދެ ހޮނިހިރު ދުވަހުގެ ރޭ ބަޔަކު ވަނީ ގެކޮޅުގައި އަލިފާން ވެސް ރޯ ކޮށްލާފައެވެ.
