ފަލަސްތީނުގެ ދެ ލީޑަރުން 15 އަހަރަށްފަހު އެއްތަނަކުން ބައްދަލުކުރައްވައިފި
ފަލަސްތީނުގެ ދެ ލީޑަރުން ގިނަ އަހަރުތަކަށްފަހު ބައްދަލުކުރެއްވުމަކީ އުންމީދު އާވެގެން ދިޔަ ކަމެއް
ފަލަސްތީނުގެ ދެ ލީޑަރުން އަލްޖީރިޔާގެ ރައީސާއެކު
ފަލަސްތީނުގެ ރައީސް މަހްމޫދު އައްބާސްއާއި ހަމާސް ޖަމާއަތުގެ ލީޑަރު، ވާދަވެރި އިސްމާއީލް ހަނިއްޔާ ފަނަރަ އަހަރަށްފަހު އެއްތަނަކުން ބައްދަލުކުރައްވައިފިއެވެ. ދެލީޑަރުން ވަނީ އަލްޖީރިޔާގެ ރައީސް އަބްދުލްމަޖީދު ތަބޫންގެ ދައުވަތަކަށް އެގައުމުގެ 60 ވަނަ މިނިވަން ދުވަހުގެ އިހްތިފާލްތަކުގައި ބައިވެރިވެވަޑައިގެންނެވުމަށް އަލްޖީރިޔާއަށް ދަތުރުކުރައްވާފައެވެ. އަލްޖީރިޔާއަކީ ފަލަސްތީނުގެ ވަކި ދައުލަތެއް ގާއިމްކުރުމަށް ކުރެވެމުންދާ މަސައްކަތަށް ވަރަށް ބޮޑަށް ތާއީދުކުރާ ގައުމެކެވެ.
އަލްޖީރިޔާގެ ޓީވީ ޗެނެލްތަކުން ވަނީ ރައީސް މަހްމޫދު އައްބާސްއާއި އިސްމާއީލް ހަނިއްޔާ ސަލާންކުރައްވާ މަންޒަރު ދައްކާފައެވެ. އަދި އެއަށްފަހު ހަމާސްގެ ވަފްދުގެ މެމްބަރުވަނީ އައްބާސްއާ މޫނާއި މޫނު ޖައްސައި ސަލާމްކުރައްވާފައެވެ. ނަމަވެސް ރައީސް އައްބާސްއާއި އިސްމާއީލް ހަނިއްޔާ ވަކިން ބައްދަލުކުރައްވައި، ވާހަކަތައް ބޭއްވެވިކަން ސާފުނުވާކަމަށް ނޫސް ރިޕޯޓްތައްބުނެއެވެ.
އަލްޖީރިރާގެ ރައީސާއެކު ބޭއްވެވި ބައްދަލުކުރެއްވުމުގައި ރައީސް އައްބާސްވަނީ އަލްޖީރިޔާގެ 60 ވަނަ މިނިވަން ދުވަހުގެ މުނާސަބަތުގައި ނެރުނު ފަލަސްތީނުގެ ޚާއްސަ ސްޓޭމްޕެއް ވެދުމަށްއަރުވާފައެވެ. މީގެ އިތުރުން ރާމަﷲގެ މަގަކަށް އަލްޖީރިޔާގެ ނަމުން ނަންދީފައިވާކަން ފެންނަ ޗާޓެއްވެސް ރައީސް އައްބާސް ވަނީ ރައީސް ތަބޫންއަށް ވެދުމަށްއަރުވާފައެވެ.
2006 ވަނަ އަހަރު ފަލަސްތީނުގެ ސަރަހައްދުތަކުގައި ބޭއްވުނު ލެޖިސްލެޓިވް އިންތިޚާބު ކާމިޔާބުކުރެއްވީ އިސްމާއީލް ހަނިއްޔާއެވެ. ނަމަވެސް ރައީސް އައްބާސްއާ ދެބޭފުޅުން އެއްގަލަކަށް އަރާވަޑައިގަތުމަށް ދަތިތަކެއް ހުރުމާއެކު، މުޅި ފަލަސްތީނުގެ ފުލް ކޮންޓްރޯލް އިސްމާއީލް ހަނިއްޔާއަށް ލިބިވަޑައިގެންފައެއްނުވެއެވެ. އެއަށްފަހު އެތައްބަޔަކު ޝަހީދުވެގެން ދިޔަ ދާޚިލީ ހަގުރާމައަކަށްފަހު ހަމާސް ޖަމާއަތުންވަނީ ސަރަހައްދުގެ އެއްބައި ކަމަށްވާ ޣާއްޒާގެ ފުލް ކޮންޓްރޯލް ނަގާފައެވެ.
އެތެރޭގެ ހަމަނުޖެހުންތައް ބޮޑުކަމާއެކު 2006 ވަނަ އަހަރަށް ފަހު ފަލަސްތީނުގައި އެއްވެސް އިންތިޚާބެއް ބާއްވާފައެއްނުވެއެވެ.
