ޔުނައިޓެޑުގެ ފަރިތަކުރުންތަކުގައި ރޮނާލްޑޯ ބައިވެރިނުވޭ

މެންޗެސްޓަރ ޔުނައިޓެޑްގެ ތަރި ކްރިސްޓިއާނޯ ރޮނާލްޑޯ އެ ޓީމުގެ ފަރިތަކުރުންތަކުގައި ބައިވެރިވުން ހުއްޓާލައިފިއެވެ.

ކުރިއަށް އޮތް ސީޒަނަށް ޔުނައިޓެޑުގެ ފަރިތަކުރުންތައް ފަށާފައިވާއިރު، ރޮނާލްޑޯ ވަނީ ފުރަތަމަ ދުވަހު ހާޒިރުނުވެވޭނެ ކަމަށް އަންގާފައެވެ. ސަބަބެއް ކަމަށް އޭނާ އަންގާފައިވަނީ އޭނާގެ އަމިއްލަ ކަމެއް ނުވަތަ އާއިލީ ސަބަބަކާ ހެދިކަމަށެވެ. ޔުނައިޓެޑުގެ ދެ ވަނަ ފަރިތަކުރުން އަންގާރަ ދުވަހު ކުރިއަށް ގެންދިޔައިރު، އެ ފަރިތަކުރުމަށް ވެސް ރޮނާލްޑޯ ހާޒިރުވެފައެއް ނުވެއެވެ. ކުޅިވަރު ނޫސްވެރިޔާ ފެބްރިޒިއޯ ރޮމާނޯ ބުނި ގޮތުގައި ދެ ވަނަ ދުވަހު ވެސް ރޮނާލްޑޯ ހާޒިރުވެފައި ނުވަނީ އޭނާގެ އަމިއްލަ ސަބަބަކާ ހެދި ކަމަށް ބުނެއެވެ.

ޔުނައިޓެޑުގެ ފަރިތަކުރުންތަކަށް ރޮނާލްޑޯ ހާޒިރުނުވާއިރު، އޭނާ ވަނީ ކުލަބް ދޫކޮށްލަން ބޭނުންވާކަމަށް އެ ޓީމަށް އަންގާފައެވެ. ރޮނާލްޑޯ ޔުނައިޓެޑް ދޫކޮށްލަން ނިންމީ މިއަންނަ ސީޒަންގެ ޗެމްޕިއަންސް ލީގަށް އެޓީމު ކޮލިފައި ނުވުމުންނެވެ. ޔުނައިޓެޑަށް ޗެމްޕިއަންސް ލީގުގެ ޖާގަ ގެއްލުނީ ނިމުނު ސީޒަންގައި ޕްރިމިއަރ ލީގުގެ ގަދަ ހަތަރެއްގައި ލީގު ނިންމާނުލެވުމުންނެވެ. ޕްރިމިއަރ ލީގުގެ ހަވަނާގައި ލީގު ނިންމާލުމުން ޔުނައިޓެޑަށް ޗެމްޕިއަންސް ލީގުގެ ޖާގަ ގެއްލި އެޓީމު މިއަންނަ ސީޒަންގައި ވާދަކުރަން ޖެހޭނީ ޔޫރަޕާ ލީގުގައެވެ.

ރޮމާނޯ ބުނި ގޮތުގައި ރޮނާލްޑޯގެ އެޖެންޓު ޖޯޖް މެންޑޭޭޒް އަންނަނީ ރަސްމީ ޕްރޮޕޯސަލެއް ހޯދުމުގެ މަސައްކަތް ކުރަމުންނެވެ.

ރޮނާލްޑޯ ޔުނައިޓެޑަށް ބަދަލުވެފައިވަނީ 2021 ވަނަ އަހަރުއެވެ. އޭނާ ވަނީ ޔުނައިޓެޑަށް ކުޅެދިން 38 މެޗުގައި 24 ލަނޑު ޖަހާފައެވެ. ދެ ވަނަ ފަހަރަށް ޔުނައިޓެޑަށް ބަދަލުވި ފަހުން އެ ޓީމާއެކު ރޮނާލްޑޯއަށް ތައްޓެއް ކާމިޔާބުކުރެވިފައެއް ނުވެއެވެ.