ކްރިމިނަލް ކޯޓު: ބެކްލޮގް މައްސަލަތައް ނިންމައި، ފާއިތުވި 5 އަހަރުގެ ރެކޯޑެއް
އެ ކޯޓުގެ މިއަހަރުގެ ފުރަތަމަ 6 މަސް ދުވަހުގެ ތަފާސްހިސާބުތައް އާންމުކޮށްފައިވޭ
ކްރިމިނަލް ކޯޓް
ޖޫން މަހު ކްރިމިނަލް ކޯޓުން ނިންމާފައިވާ މައްސަލަތަކުގެ ތެރޭގައި އެންމެ ގިނައިން ހިމެނެނީ އެ ކޯޓުގެ ބެކްލޮގް ކްލިއަރ ކުރުމުގެ ގޮތުން އިސްކަންދީގެން ބަލަމުންދާ ދުވަސްވީ މައްސަލަތައް ކަމަށް އެ ކޯޓުން ބުނެފިއެވެ.
ކްރިމިނަލް ކޯޓުން ވަނީ އެ ކޯޓުގެ މިއަހަރުގެ ފުރަތަމަ 6 މަސް ދުވަހުގެ ތަފާސްހިސާބުތައް އާންމުކޮށްފައެވެ. އެގޮތުން މި އަހަރު އެންމެ ގިނައިން މައްސަލަތައް ނިންމާފައިވަނީ ޖޫން މަހުއެވެ.
ޖޫން މަހު ނިންމާފައިވާ މައްސަލަތަކުގެ ތެރެއިން 53 އިންސައްތަ މައްސަލައަކީ ކޯޓުގައި ގިނަ ދުވަސްވީ މައްސަލަތައް ނިންމުމަށް ޖޫން މަހުން ފެށިގެން ކުރިއަށްދާ ބެކްލޮގް ކްލިއަރ ކުރުމުގެ ޚާއްސަ މަސައްކަތުގެ ދަށުން ކުރިއަށްގެންދާ މައްސަލަތަކުގެ ލިސްޓުގައި ހިމެނޭ މައްސަލަތަކެއްކަމަށް ކޯޓުން މައުލޫމާތު ދެއެވެ.
ޖޫން މަހު 165 މައްސަލަ ނިންމާފައިވާއިރު، ދެން އެންމެ ގިނައިން މައްސަލަ ނިންމާފައިވަނީ މާރޗު މަހުއެވެ. އެގޮތުން މާރޗު މަހު 115 މައްސަލަ އެ ކޯޓުން ވަނީ ނިންމާފައެވެ. ކްރިމިނަލް ކޯޓުން އާންމުކުރި ތަފާސްހިސާބުތައް ދައްކާ ގޮތުން، 2022 ވަނަ އަހަރުގެ ފުރަތަމަ 6 މަސް ދުވަހު ކޯޓުން 548 މައްސަލަ ނިންމާފައިވެއެވެ. މި މުއްދަތުގައި ދެން އެންމެ ގިނަ މައްސަލަ ނިންމާފައިވަނީ 2018 ވަނަ އަހަރުއެވެ. އެއީ 468 މައްސަލައެވެ.
ކޯޓުގެ ތަފާސްހިސާބުތައް ދައްކާ ގޮތުން، ވެތުވެދިޔަ 5 އަހަރު ދުވަހަށް ބަލާއިރުވެސް އަހަރުގެ ފުރަތަމަ 6 މަސް ދުވަހު އެންމެ ގިނަ މައްސަލަ ނިންމާފައިވަނީ 2022 ވަނަ އަހަރުއެވެ.
2022 ވަނަ އަހަރުގެ ޖޫން މަހު 404 މައްސަލައެއް އަލަށް ކޯޓަށް ހުށައެޅިފައިވެސްވެއެވެ.
ކްރިމިނަލް ކޯޓުގައި ނުނިމި 1 އަހަރަށްވުރެ ގިނަ ދުވަސްވެފައިވާ ޖުމްލަ 1182 މައްސަލަ އެބައޮތެވެ. ކްރިމިނަލް ކޯޓަށް ކޮންމެ އަހަރަކު އެވްރެޖްކޮށް 750 މައްސަލަ ހުށަހެޅޭ އިރު، ގިނަ އަދަދަކަށް އެ ކޯޓުން މައްސަލަތައް ނިންމިކަމުގައި ވީނަމަވެސް، 2021 ވަނަ އަހަރުގެ ނިޔަލަށްވެސް ނުނިމި ގިނަ ދުވަސްވެފައިވާ މައްސަލަތައް އެބަހުއްޓެވެ.
