ރައީސް އަމީންގެ ވެރިކަން ނިމުނުގޮތާއި އެމަނިކުފާނުގެ ނިމުމާއި ގުޅޭގޮތުން މަޢުލޫމާތު ހިއްސާކުރުމަށް އާންމުންނަށް ހުޅުވާލައިފި
3 ޖުލައި 2022 | އާދީއްތަ 23:53މި މަހުގެ 5 ވަނަ ދުވަހުން ފެށިގެން 21 ވަނަ ދުވަހާ ދެމެދު މަޢުލޫމާތު ހިއްސާކުރުމަށް ވަނީ އެދިފައި
ރައީސް އަމީން ދީދީ
ރައީސް އަމީންގެ ވެރިކަން ނިމުނުގޮތާއި އެމަނިކުފާނުގެ ނިމުމާއި ގުޅޭގޮތުން މަޢުލޫމާތު ހިއްސާކުރުމަށް އާންމުންނަށް ހުޅުވާލައިފިއެވެ.
އިންތިޤާލީ އިންސާފުގެ އޮމްބަޑްސްޕަރސަންގެ އޮފީހުން ބުނީ ދިވެހިރާއްޖޭގެ ފުރަތަމަ ޖުމްހޫރިއްޔާގެ ފުރަތަމަ ރައީސް އަލްމަރްޙޫމް ސުމުއްވުލް އަމީރު މުޙައްމަދު އަމީން ދޮށިމޭނާ ކިލޭގެފާނުގެ ވެރިކަން ނިމުނުގޮތް ސާފުނުވާތީ އާއި، އެމަނިކުފާނުގެ މައްޗަށް ކުރެވުނު ދަޢުވާގެ ސީޣާ ސާފުވެފައިނެތް ކަމަށެވެ. އަދި ކުރެވުނު ޝަރީއަތުގެ ޞައްޙަ މަޢުލޫމާތު ލިބިފައިނުވާތީއާއި، އެމަނިކުފާނަށް ކުރެއްވިކަމަށް ބުނާ އަނިޔާތަކަކީ ކޮބައިކަމާއި، އަނިޔާކުރި ފަރާތްތަކާއި، އެފަރާތްތަކާމެދު އެއްވެސް ޝަރީޢަތެއް ކުރެވުނުކަން ސާފުވެފައިނުވާ ކަމަށެވެ.
އެ އޮފީހުން ބުނެފައިވަނީ މިކަންކަމުގެ ޙަޤީޤަތް ހޯދައިދިނުމަށާއި، މިކަންކަން ހިންގާފައިވަނީ ދައުލަތުގެ މުއައްސަސަތަކާއި މުއައްސަސާތަކުގެ އިސް ހިންގުންތެރިން ނިޒާމީ ސިފައެއްގައި ރާވައިގެންކަމަށް ބުނެ، އިންތިޤާލީ އިންސާފުގެ ޤާނޫނުގެ ދަށުން އެ އޮފީހަށް ހުށަހަޅާފައިވާ މައްސަލައަކީ އެ އޮފީހުން ތަޙުޤީޤުކުރުމަށް ނިންމާފައިވާ މައްސަލައެއް ކަމަށެވެ.
މި މައްސަލައާގުޅިގެން، އެ އޮފީހުން ކުރިއަށްދާ ތަޙުޤީޤަށާއި، މިޙާދިސާއަކީ 1953 ވަނަ އަހަރު ހިނގާފައިވާ ޙާދިޘާއަކަށްވާތީ، މިއީ ގިނަދުވަސްވީ ޙާދިސާއަކަށްވެފައި މައްސަލައާގުޅޭ މަޢުލޫމާތު ހޯދުމަށް އެއޮފީހުން ކުރިއަށްގެންދާ ދިރާސާއަށް މަޢުލޫމާތު ހޯދުމުގެ ގޮތުން، ކުރިއަށްގެންދާ އިންޓަވިއުތަކަށާއި ތަޙުޤީޤަށް މަޢުލޫމާތު ދެވޭނެ ފަރާތްތަކުން މި މަހުގެ 5 ވަނަ ދުވަހުން ފެށިގެން 21 ވަނަ ދުވަހާ ދެމެދު މަޢުލޫމާތުތައް އެ އޮފީހާ ޙިއްޞާކޮށް ނަންނޯޓު ކުރުމަށް އެއޮފީހުން ވަނީ އެދިފައެވެ.
މައުލޫމާތު ހިއްސާ ކުރުމަށް އެދެ ފަރާތްތަކުން ފުރިހަމަ ނަމާއި، އައިޑީ ކާޑު ނަންބަރު އަދި ގުޅޭނެ ނަންބަރާއި، ދާއިމީ އެޑްރެސް، އީމެއިލް އެޑްރެސްގެ އިތުރުން މި ޙާދިސާއިގެ މަޢުލޫމާތުދެވިދާނެ ހައިސިއްޔަތު ނުވަތަ މަޢުލޫމާތު އެނގޭގޮތް ހިއްސާކޮށްދިނުމަށް ވެސް ވަނީ އެދިފައެވެ.
