ލަންކާއަށް އިތުރު ތެލުގެ ޝިޕްމެންޓްތައް ގެންނާނެ ފައިސާއެއް ނެތް: މިނިސްޓަރ

ލަންކާގައި ތެލުގެ ސްޓޮކް ހުސްވަމުންދާއިރު، އެގައުމަށް ބޭނުންވާ ތެލުގެ އައު ޝިޕްމެންޓްތައް ގެންނަން ޚަރަދުކުރާނެ ފައިސާ ނެތްކަމަށް އެގައުމުގެ ޕަވަރ އެންޑް އެނަރޖީ މިނިސްޓަރު ކަންޗަނާ ވިޖެސެކެރަ ވިދާޅުވެއްޖެއެވެ.

ރިޕޯޓުތައް ބުނާގޮތުން ލަންކާއަށް ބޭނުންވާ ތެލުގެ ޝިޕްމެންޓަށް 587 މިލިއަން ޑޮލަރު ބޭނުންވާކަމަށް އާދިއްތަ ދުވަހު މިނިސްޓަރު ވަނީ ވިދާޅުވެފައެވެ. އެގޮތުން މިހަފުތާ ތެލުގެ އައު ޝިޕްމެންޓްތަކަށް 316 މިލިއަން ޑޮލަރު ދައްކަންޖެހޭކަމަށާއި, އެއަށް ކްރޫޑް އޮއިލްގެ ދެ ޝިޕްމެންޓް ލައިފިނަމަ ޖުމުލަ އަދަދު 587 މިލިއަން ޑޮލަރަށް އަރާނެކަމަށް މިނިސްޓަރު ވިދާޅުވިއެވެ.

މިނިސްޓަރު ވަނީ ތެލުގެ އައު ޝިޕްމެންޓްތައް ތައްޔާރުވެފައިވާކަމަށާއި އެހެންނަމަވެސް މި ޝިޕްމެންޓްތަކަށް ޚަރަދުކުރުމަށް ސެންޓްރަލް ބޭންކަށް ދެވެން އޮތީ 125 މިލިއަން ޑޮލަރު ކަމަށް މިނިސްޓަރު ވިދާޅުވެފައެވެ.

ލަންކާގައި މިވަގުތު ބާކީ ހުރީ 12،774 ޓަނު ޑީސެލްއާއި 4،061 ޓަނު ޕެޓްރޯލް ކަމަށްވެސް މިނިސްޓަރު ވަނީ ވިދާޅުވެފައެވެ.

މިމަހު ލަންކާއަށް އަންނަ ތެލުގެ ފުރަތަމަ ޝިޕްމެންޓް އަންނާނެ ކަމަށް ބުނެފައި ވަނީ ޖުލައި 9 ވަނަ ދުވަހުއެވެ. އަދި މި ހަފުތާގެ ބުރާސްފަތި ދުވަހަށް، އެގައުމަށް ގެންނަ ތެޔޮ ޝިޕްމެންޓަކަށްވާ ފައިސާގެ އެއްބަޔަށްވާ 49 މިލިއަން ޑޮލަރު ދައްކަންޖެހެއެވެ.

ލަންކާގައި ތެލުގެ ސަޕްލައި މަދުވެ އެގައުމުން މިދިޔަ ހަފުތާގައި ވަނީ ސްކޫލްތައް ބަންދުކޮށްފައެވެ. މިހަފުތާވެސް ސްކޫލްތައް ނުހުޅުވައި ބަންދުކޮށްފައި ބަހައްޓަން ސަރުކާރުން ވަނީ ނިންމާފައިކަމަށް ރިޕޯޓުތައް ބުނެއެވެ.