ސިޓީން ތަށި އުފުލާލީ ފުރިހަމަ މޮޅަކާއެކު، ލީގުގެ ދެވަނަ ސިފައިންނަށް

މިއަހަރުގެ ޤައުމީ ވޮލީބޯޅަ ލީގުގެ ތަށި ސްޕޯޓްސް ކުލަބް ސިޓީން އުފުލާލައިފިއެވެ.

ސިޓީން ލީގު ތަށި އުފުލާލީ ހުރިހާ މެޗަކުން މޮޅުވެ، ސައްތައިން ސައްތަ ރެކޯޑަކާއެކުއެވެ. ފަހު މެޗުގައި ކުލަބް ވެމްކޯއާ ދެކޮޅަށް ނުކުތްއިރު ވެސް ސިޓީއަށް އޮތީ ލީގު ޔަގީންވެފައެވެ. ނަމަވެސް މޮޅުވުމުގެ ރެކޯޑު ދެމެހެއްޓުމަށް ސިޓީން ނުކުތީ އެ ޓީމުގެ ފުލް ޓީމުގައެވެ.

ހޮނިހިރު ދުވަހުގެ ރޭ ކުޅުނު މެޗުގެ ފުރަތަމަ ސެޓު ކާމިޔާބުކުރީ ވެމްކޯއިންނެވެ. އިސްމާއިލް ސާޖިދު (ކުޑަކާއްޓެ)އާއި އަޝްވަލް ރާއީގެ މޮޅު ކުޅުމާއެކު ވެމްކޯއިން މި ސެޓު ކާމިޔާބުކުރީ 25-23 ންނެވެ. ސިޓީން ވަނީ ޖެހިގެން އައި ދެ ވަނަ ސެޓުގައި ކުޅުން ރަނގަޅުކޮށް އެ ސެޓު ކާމިޔާބުކޮށްފައެވެ. އެ ޓީމުގެ ކެޕްޓަން އަލީ ހުޒާމް (ހުޒަންޓެ)ގެ އިތުރުން ބިދޭސީ ކުޅުންތެރިން ކަމަށްވާ ވިނީތު އާއި ހަރްދީފްގެ މޮޅު ކުޅުން މި ސެޓުގައި ވަނީ ފެނިފައެވެ. ސެޓުގެ މެދު ތެރެއިން ލީޑު ނަގައި، އެ ލީޑު ފުޅާކޮށް ސިޓީން ސެޓު ކާމިޔާބުކުރީ 25-14 ންނެވެ.

ޖެހިގެން އައި ދެ ސެޓު ވެސް ސިޓީން ކާމިޔާބުކުރީ ފަސޭހަކަމާއެކުއެވެ. ސިޓީން ދެ ވަނަ ސެޓު ކާމިޔާބުކުރުމާއެކު، ތިން ވަނަ ސެޓަށް ވެމްކޯއިން ނުކުތީ ބަދަލުތަކަކާއެކުއެވެ. ކުޑަކާއްޓެ އާއި ސެޓަރު ވިޕުލްގެ ބަދަލުގައި ބެންޗުން ކުޅުންތެރިން އެރިއެވެ. ސެޓުގެ ވަކި ހިސާބަނުން އަޝްވަލް ރާއީ ވެސް ވަނީ ބަދަލުކޮށްފައެވެ. ތިން ވަނަ ސެޓާއި ހަތަރު ވަނަ ސެޓު ސިޓީން ކާމިޔާބުކުރީ 25-16 އަދި 25-12 ންނެވެ. މެޗުގެ މޮޅު ކުޅުންތެރިޔަކަށް ހޮޗުނީ ސިޓީގެ ހުޒަންޓެއެވެ.

މެޗަށް ފަހު ވަނީ ސިޓީއަށް ލީގު ޗެމްޕިއަންގެ ޝީލްޑު ހަވާލުކޮށްފައެވެ. ލީގުގެ ތިން ވަނަ ލިބުނު ވެމްކޯއަށް ވަނީ މެޑަލް ހަވާލުކޮށްފައެވެ. މި މެޗު ޝަރަފުވެރިކޮށްދެއްވީ ޔޫތު މިނިސްޓަރު އަޙުމަދު މަޚްލޫފްއެވެ.

ހޮނިހިރު ދުވަހުގެ ހަވީރު ކުޅުނު މެޗުގައި ތިން ސެޓު އެއް ސެޓުން ޕޮލިސް ކުލަބް ބަލިކޮށް، ލީގުގެ ދެ ވަނަ ހޯދީ އެންމެ ފަހުގެ ޗެމްޕިއަން ދިވެހި ސިފައިންގެ ކުލަބެވެ.

ވޮލީ ސީޒަނުގެ ތިން ވަނަ މުބާރާތް ކަމަށްވާ ޤައުމީ މުބާރާތް ފަށާނީ އަންނަ ހޯމަ ދުވަހުއެވެ. މުބާރާތުގެ ފުރަތަމަ ސެމީގައި ބައްދަލުރާނީ ޕޮލިހާއި ވެމްކޯއެވެ. ސެމީ ފައިނަލްގެ ދެ ވަނަ މެޗުގައި ބައްދަލުކުރާނީ ސިޓީއާއި ސިފައިންނެވެ. ސިޓީ އާއި ސިފައިން ކުޅޭ ސެމީން މޮޅުވާ ޓީމަކަށް ފައިނަލްގެ ޖާގަ ލިބޭއިރު، ބަލިވާ ޓީމު ޖެހޭނީ ޕޮލިސް އަދި ވެމްކޯގެ ސެމީން މޮޅުވާ ޓީމަކާ ތިން ވަނަ ސެމީ ކުޅޭށެވެ. ފައިނަލްގެ ފަހު ޖާގަ ލިބޭނީ މި މެޗުން މޮޅުވާ ޓީމަކަށެވެ.