ފެށޭ ހަފުތާގައި ޕީއެސްޖީގެ ކޯޗުކަމާ ގަލްޓިއޭ ހަވާލުވަނީ!
2 ޖުލައި 2022 | ހޮނިހިރު 14:11ގަލްޓިއޭ ވަނީ 2020/21 ވަނަ ސީޒަންގައި ލިލްއަށް ފްރާންސް ލީގު ކާމިޔާބުކޮށްދީފައި
ކްރިސްޓޮފް ގަލްޓިއޭ
ޕެރިސް ސެއިންޓް ޖާމައިން (ޕީއެސްޖީ)ގެ ކޯޗުކަމާއި ކްރިސްޓޮފް ގަލްޓިއޭ މި ފެށޭ ހަފުތާގައި ހަވާލުވާނެކަމަށް ރިޕޯޓުތައް ބުނެފިއެވެ.
ޕީއެސްޖީއަށް މިހާރު ކޯޗުކޮށްދެމުން އަންނަ އާޖެންޓީނާގެ މައުރީސިއޯ ޕޮޗެޓީނޯ މަގާމުން ދުރުކޮށް، މިއަންނަ ސީޒަން ފެށެންވާއިރަށް އައު ކޯޗެއް ހޯދާނެކަމުގެ އަޑުތައް ވަނީ އަރާފައެވެ. އަދި ޕޮޗެޓީނޯގެ މަގާމަށް ޕީއެސްޖީން ހަމަޖައްސާނީ ގަލްޓިއޭކަމުގެ ވާހަކަތައް ދެކެވެން ފެށީ މީގެ ދެތިން ހަފުތާ ކުރިންނެވެ.
ފްރާންސްގެ ކުޅިވަރު ރިޕޯޓުތައް ބުނާގޮތުން މި ފެށޭ ހަފުތާގެ ތެރޭގައި ޕީއެސްޖީގެ ކޯޗުކަން ގަލްޓިއޭއާ ހަވާލުކުރާނެއެވެ. އަދި ސީޒަން ބްރޭކަށްފަހު ޓީމުގެ ބައެއް ކުޅުންތެރިންނާއެކު މިއަންނަ ބުދަ ދުވަހުން ފެށިގެން ގަލްޓިއޭގެ ކޯޗުކަމުގައި ފަރިތަކުރުންތައް ފެށުން އެކަށީގެންވާ ކަމަށްވެސް ރިޕޯޓުތައް ބުނެއެވެ.
ގަލްޓިއޭ ވަނީ 2020/21 ވަނަ ސީޒަންގައި ލިލްއަށް ފްރާންސް ލީގު ކާމިޔާބުކޮށްދީފައެވެ. އޭގެ ފަހުން، މިދިޔަ އަހަރު އޭނާ ކޯޗުކޮށްދިނީ ފްރާންސް ލީގުގައި ކުޅެމުން އަންނަ ނީސްއަށެވެ.
ރިޕޯޓުތައް ބުނާ ގޮތުން ގަލްޓިއޭއާއެކު ޕީއެސްޖީން ހަދާނީ ދެއަހަރުގެ އެއްބަސްވުމެކެވެ. ޕީއެސްޖީގެ ކޯޗުކަމާއި ހަވާލުވުމަށްފަހު ގަލްޓިއޭގެ އެންމެ ބޮޑު ޓާސްކަކަށް ވާނީ މިއަންނަ ސީޒަންގެ ޗެމްޕިއަންސް ލީގު އެޓީމަށް ކާމިޔާބުކޮށްދިނުމެވެ. ޓީމަށް މިދިޔަ ސީޒަންގައި ކޯޗުކޮށްދިން ޕޮޗެޓީނޯ ޕީއެސްޖީއަށް ފްރާންސް ލީގު ކާމިޔާބު ކޮށްދިނެވެ. ނަމަވެސް ޕީއެސްޖީގެ އަމާޒު އޭރުވެސް ހުރީ ޗެމްޕިއަންސް ލީގު ހޯދުމަށެވެ.
