ވަލްވާޑޭ އެނބުރި ބިލްބާއޯއަށް

ސްޕެނިޝް ލީގުގެ އެތުލެޓިކޯ ބިލްބާއޯގެ ކޯޗުކަމާ އާނެސްޓޯ ވަލްވާޑޭ ހަވާލުވެއްޖެއެވެ.

މިއީ 58 އަހަރުގެ ވަލްވާޑޭ ބިލްބާއޯގެ ކޯޗުކަމާ ހަވާލުވި ތިން ވަނަ ފަހަރެވެ. މީގެ ކުރިން އޭނާ ވަނީ ދެ ފަހަރު އެ ޓީމުގެ ކޯޗުކަމާ ހަވާލުވެފައެވެ. އެއީ 2005-2003 އާއި 2017-2013 އެވެ. ވަލްވާޑޭ ބިލްބާއޯގައި އެންމެ ފުރަތަމަ މަސައްކަތް ކުރީ އެސިސްޓެންޓު ކޯޗެއްގެ ގޮތުގައެވެ.

އެންމެ ފަހުން ވަލްވާޑޭ އިރުޝާދު ދީފައިވަނީ ސްޕެއިންގެ ބާސެލޯނާއަށެވެ. އޭނާ އެ ޓީމުގެ ކޯޗުކަމާ ހަވާލުވީ 2017 ވަނަ އަހަރުއެވެ. ބާސާއިން އެ ޓީމުގެ ކޯޗުކަމުގެ މަގާމުން އޭނާ ވަކިކުރީ 2021 ވަނަ އަހަރުގެ ޖެނުއަރީ މަހުގެ ތެރޭގައެވެ. އޭގެ ފަހުން އޭނާ އެއްވެސް ޓީމަކަށް އިރުޝާދު ދީފައެއް ނުވެއެވެ.

ތިން ވަނަ ފަހަރަށް ބިލްބާއޯގެ ކޯޗުކަމާ ވަލްވާޑޭ ހަވާލުވީ އެއް އަހަރު ދުވަހުގެ އެއްބަސްވުމެއްގެ ދަށުންނެވެ. ބިލްބާއޯގެ ކޯޗުކަމަށް ވަލްވާޑޭ ގެނައުމަށް އެ ކުލަބުގެ ބޯޑުން ނިންމީ އޭނާ އަކީ އެކުލަބުގެ ވިސްނުމާއި، ވައްޓަފާޅި އެނގޭނެ ކޯޗަކަށް ވުމުން ކަމަށް އެ ކުލަބުގެ ރައީސް ވަނީ ބުނެފައެވެ. ވަލްވާޑޭގެ އިރުޝާދުގެ ދަށުން ބިލްބާއޯ ވަނީ 2015 ވަނަ އަހަރު ސްޕެނިޝް ސުޕަ ކަޕް ކާމިޔާބުކޮށްފައެވެ. އެއީ ތިރީސް އަހަރުގެ ތެރޭގައި އެ ކުލަބުން ހޯދި ފުރަތަމަ ތައްޓެވެ.

ބާސެލޯނާގެ އިތުރުން ވަލްވާޑޭ ވަނީ ވެލެންސިއާ، އޮލިމްޕިއާކޯސް، އެސްޕަންޔޯލް އަދި ވިލަރެއާލް އަށް ކޯޗުކަން ކޮށްދީފައެވެ.