ބެކްލޮގް ކްލިއަރ ކުރަން ކްރިމިނަލް ކޯޓުގެ ގާޒީންނަށް ދުވާލަކަށް 500 ރުފިޔާގެ އެލަވަންސެއް ދިނުމަށް ފާސްކޮށްފި
ބެކްލޮގްގައި އޮތް 1182 މައްސަލަ ކުރިއަށް އޮތް 4 މަހެއްހާ ދުވަހުގެ ތެރޭގައި ކްލިއަރ ކުރެވޭނެ
ކްރިމިނަލް ކޯޓް
ކްރިމިނަލް ކޯޓުގައި ފުނިޖެހިފައިވާ މައްސަލަތައް ނިންމުމަށް އިތުރު ގަޑީގައި މަސައްކަތް ކުރައްވާ ގާޒީންނަށް އިތުރު އެލަވަންސެއް ދިނުމަށް ރައްޔިތުންގެ މަޖިލީހުން ފާސްކޮށްފިއެވެ.
ކްރިމިނަލް ކޯޓުގެ ބެކްލޮގް ސާފު ކުރުމުގެ ނުރަސްމީ ގަޑީގައި އަޑުއެހުންތައް ބާއްވައި އެކަން ކުރިއަށް ގެންދިއުމަށްޓަކައި ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަނުން ފޮނުވާފައިވާ މައްސަލައަށް ގޮތެއް ވަނީ ނިންމާފައެވެ.
ޑީޖޭއޭއިން ފޮނުވާފައިވާ ސިޓީގައި ބަޔާން ކޮށްފައިވަނީ ހަލައްކަ ރުފިޔާ އިތުރަށް ޚަރަދު ކޮށްގެން މިހާރު ބެކްލޮގްގައި އޮތް 1182 މައްސަލަ ކުރިއަށް އޮތް 4 މަހެއްހާ ދުވަހުގެ ތެރޭގައި ކްލިއަރ ކުރެވޭނެ ކަމަށެވެ. އެކަމަށްޓަކައި އިތުރު ގަޑީގައި މަސައްކަތަށް ނުކުންނަ ގާޒީންނަށް ދުވާލެއްގެ މައްޗަށް 500 ރުފިޔާގެ އެލަވަންސެއް އެ މުއްދަތުގެ ތެރޭގައި ދޭ ގޮތަށް ވަނީ ހުށައަޅާފައެވެ.
މާލިއްޔަތު ކޮމިޓީގެ ރިޕޯޓުގައި ބުނެފައިވަނީ ކްރިމިނަލް ކޯޓުގެ ގާޒީންނަށް ސްޕެޝަލް ޑިއުޓީ އެލަވަންސެއް ހަމަޖައްސައިދެއްވުމަށް އެދިވަޑައިގެން ޑިޕާޓްމަންތް އޮފް ޖުޑީޝަލް އެޑްމިނިސްޓްރޭޝަނުން ހުށަހަޅުއްވާފައިވާ މައްސަލައިގައި ކޮމިޓީން މަޝްވަރާކުރުމަށްފަހު ނުރަސްމީ ގަޑީގައި އަޑުއެހުންތަކަށް ނުކުންނަވާ ކްރިމިނަލް ކޯޓުގެ 10 ގާޒީންނަށް މަސައްކަތަށް ނުކުންނަވާ ކޮންމެ ދުވަހަކަށް 500 ރުފިޔާގެ ސްޕެޝަލް ޑިއުޓީ އެލަވަންސެއް ހަތަރު މަސް ދުވަހުގެ މުއްދަތަށް ހަމަޖައްސައި ދިނުމަށެވެ.
ކްރިމިނަލް ކޯޓުގައި ނުނިމި 1 އަހަރަށްވުރެ ގިނަ ދުވަސްވެފައިވާ ޖުމްލަ 1182 މައްސަލަ އެބައޮތެވެ. ކްރިމިނަލް ކޯޓަށް ކޮންމެ އަހަރަކު އެވްރެޖްކޮށް 750 މައްސަލަ ހުށަހެޅޭ އިރު، ގިނަ އަދަދަކަށް އެ ކޯޓުން މައްސަލަތައް ނިންމިކަމުގައި ވީނަމަވެސް، 2021 ވަނަ އަހަރުގެ ނިޔަލަށް ނުނިމި 1 އަހަރަށްވުރެ ގިނަ ދުވަސްވެފައިވާ މައްސަލަތައް އެބަހުއްޓެވެ.
އެގޮތުން ބެކްލޮގް ކްލިއަރ ކުރުމަށް ކަނޑައެޅިފައިވާ ޕްލޭންއާއި އެއްގޮތަށް ބެކްލޮގް ކްލިއަރ ކުރުމަށް ރަސްމީ ގަޑީގެ އިތުރުން ނުރަސްމީ ގަޑިއާއެކު ގިނަ އަޑުއެހުންތަކެއް ތާވަލު ކުރެވިގެންދާއިރު، މިކަމަށްޓަކައި ކްރިމިނަލް ކޯޓުގެ ގާޒީންގެ ގިނަ ވަގުތުތަކެއް ހޭދަވާނެއެވެ. އެގޮތުން ކޮންމެ ދުވަހަކު ހެނދުނު 08:00ން ހަވީރު 5:00ށް ޝަރީއަތްތައް ހިންގުމަށް މިހާރު ނިންމާފައިވާކަމަށް ޑީޖޭއޭއިން ބުނެއެވެ.
މި އެލަވަންސް ހަމަޖެއްސުމުން ގާތްގަޑަކަށް ދައުލަތުގެ ބަޖެޓުން އިތުރަށް 600،000 ރުފިޔާ ހަރަދުވެގެންދާނެއެވެ.
ކޮމިޓީގެ ރިޕޯޓް ފާސްކުރުމަށް މަޖިލީހުގެ ތަޅުމަށް ހުށަހެޅުމުން، މި ރިޕޯޓް ފާސްކޮށްފައިވަނި މަޖިލީހަށް ހާޒިރުވި 68 މެންބަރުންގެ ތެރެއިން 57 މެންބަރުން ވޯޓު ދެއްވައިގެންނެވެ.
