އައިޖީއެމްއެޗްގައި މަސައްކަތްކުރަމުން ދިޔަ ފިލިޕީންސްގެ އަންހެން ނަރުހެއް ކަމަށްވާ މޭރީ ގްރޭސްގެ މަރުގެ މައްސަލައިގައި، ޅ. ހިންނަވަރު، މާފިނި، ހަލީމަތު ލަމްހާ އަބްދުއްރަހްމާނުގެ މައްޗަށް އުފުލާފައިވާ ދައުވާގެ އަޑުއެހުމެއް ބުރާސްފަތި ދުވަހު ކުރިއަށްގެންގޮސްފިއެވެ.
މި އަޑުއެހުމުގައި ކުރިއަށްގެންގޮސްފައިވަނީ ޝަރީއަތުގެ ކުރީގެ ހުށައެޅުންތައް ހުށަހަޅައި އެއަށް ރައްދުދިނުމުގެ މަރުހަލާއެވެ. އެންމެ ފުރަތަމަ ދައުލަތުގެ ހުށަހެޅުމަށް ބަލާއިރު، ދައުލަތުން ހުށަހަޅާފައިވަނީ އެންމެ ކަމެކެވެ. އެއީ ލަމްހާގެ ފަރާތުން ހުށައަޅާފައިވާ ދިފާއީ ހެކިން ބަލައިނުގަތުމަށެވެ.
އެއަށްފަހު ދިފާއުގެ ހުށައެޅުންތައް ހުށަހަޅާފައިވާއިރު، ދައުލަތާއި ދިފާއުންވެސް ވަނީ ހުށައެޅުންތަކަށް ރައްދުދީފައެވެ.
ދެން އޮންނާނީ މި މައްސަލައިގެ ހުށައެޅުންތަކަށް ގޮތެއްނިންމުމެވެ. މައްސަލަ ބައްލަވާ ގާޒީ ހުސައިން ފާއިޒު ރަޝާދު ވަނީ، އަންނަ އޯގަސްޓު މަހުގެ ތެރޭގައި އެކަމަށްޓަކައި އަޑުއެހުމެއް ބާއްވަވާނެކަމަށް ވިދާޅުވެފައެވެ.
މި އަޑުއެހުމުގައި ލަމްހާގެ ބަންދު މުރާޖައާވެސް ވަނީ ކުރިއަށްގެންގޮސްފައެވެ. އެގޮތުން ލަމްހާ މިހާރު ހުރީ ޝަރީއަތް ނިމެންދެން ބަންދުކޮށްފައެވެ.
ލަމްހާގެ ބަންދާގުޅޭގޮތުން މީގެ ކުރިންވެސް ތަފްސީލީ ގޮތެއްގައި ވާހަކަދައްކާފައިވާއިރު، އޭނާގެ ވަކީލުން ވަނީ އޭނާ ޝަރުތުތަކާއެކު ބަންދުން ދޫކޮށްލުމަށް އެދިފައެވެ.
އެހެންނަމަވެސް މައްސަލަ ބައްލަވާ ގާޒީ ވަނީ ލަމްހާގެ ބަންދަށް ބަދަލެއް ގެންނަންޖެހޭ ހާލަތެއް ނެތްކަމަށް ވިދާޅުވެ، އޭނާގެ ބަންދު ދަމަހައްޓަވާފައެވެ.
