ޒަވާޖީ ޙަޔާތެއްގެ އުފާވެރި ފެށުމަކީ ކޮންމެ ޒުވާނަކުވެސް ކުރަމުންދާނެ އެންމެ ފޮނި އެއް އުއްމީދެވެ. އެތައް ދުވަހެއް ވަންދެން ޚިޔާލީ ދުނިޔޭގައި ކުރަހަމުން ދިޔަ ތަސްވީރުތަކުގައި ޙަޤީޤީ ކުލަޖެހިގެންދާ މަންޒަރު ދުށުމަށް ހަމަ ކޮންމެ މީހަކުވެސް އެދޭނެއެވެ. އެ ބީދައިން މި ފަހަކަށް އައިސް ފެނިގެންދާ ކައިވެނީގެ ހަފުލާތަކަކީ ހުވަފެނަކުންވެސް ބައެއް މީހުން ދެކެފައި ނުވާ ފަދަ ފުރިހަމަ ޙަފުލާތަކަކަށް އޮންނަނީ ވެފައެވެ. ނަމަވެސް އެ ނަޞީބަކީ އެންމެންނަށް ލިބޭ ނަޞީބެއް ނޫނެވެ. ބައެއް މީހުންގެ އުއްމީދުތަކާއި ހުވަފެންތަކުގައި އެހެން ބަޔަކު ކޮޅުފައިން ޖަހައެވެ. އެފަދަ ކަމެއް ތަޖުރިބާ ކުރަން ޖެހިފައި ވާ އެކަކީ ފަލަސްތީނުގެ ރަބީހާ ރަޖަބީއެވެ. 

އޭނާގެ ޙަޔާތަށް އައި އެންމެ މުނާޞަބު ދުވަހުގެ އުފާ ފާޅު ކުރުންތައް ކުރިއަށް ގެންދަން ޖެހޭނީ، އިރުމަތީ ޤުދުސްގައި، ޔަހޫދީ އިޒްރޭލުން ސުންނާފަތި ކޮށްފައިވާ އޭނާގެ ގޭގެ ގާކުނޑިތަކުގެ ތެރޭގައި ކަމަށް ރަބީހާ ދުވަހަކުވެސް ހީކޮށްފައެއް ނުވެއެވެ. ނަމަވެސް ދުވަސް އައިސް ޖެހުނުއިރު ކަންވީ އެހެނެވެ. ކައިވެނީގެ މުނާޞަބާއަށް ތެދުވަން ޖެހުނީ އިޒްރޭލުގެ އިސްތިއުމާރީ ޚުދުމުޚުތާރު ބާރުތަކުން ހަފުސްކޮށްލި ގޯތީގެ ގާކުނޑިތަކުގެ ތެރެއިންނެވެ.

ފަލަސްތީނުގެ ޘާޤާފީ ހެދުން އަޅާ، ހީނާފަތުން އަތުގައި ކުރެހުންތައް އާޅާ ޒީނަތްތެރިވެގެން ހުރި ރަބީހާ ކިޔައިދިން ގޮތުގައި ގެއަށް ހަމަލާއެއް އަމާޒުވުމުގެ ކުރިން، އެ ހަމަލާއެއް އެންމެ ފުރަތަމަ އަމާޒު ވަނީ އެ ގޭގެ އަހުލުވެރިންގެ ހިތްތަކަށެވެ. އެ ގެއަކީ އެމީހުންގެ މާޒީގެ ހަނދާންތަކާއި މުސްތަޤުބަލުގެ އުއްމީދުތަކާ ގުޅިފައިވާ ގެއެއްކަން، އުމުރުން 22 އަހަރުގެ ރަބީހާ ފާހަގަ ކުރިއެވެ.

ރަބީހާ ކިޔައިދިން ގޮތުގައި އައިން އަލް-ލަވްޒާ އަވަށަށް އޭނާގެ އާއިލާއިން ބަދަލުވީ، އޭނާގެ އުމުރުން ވަރަށް ޅަ އިރުއެވެ. އޭގެ ފަހުން ފާއިތުވެދިޔަ އަހަރުތަކުގައި، އެ ގެ ސުންނާފަތި ކުރާނެ ކަމުގެ އަމުރުތައް އިޒްރޭލުން ނެރެމުން ދިޔަ ކަމަށް ރަބީހާ ބުންޏެވެ. 

ފަލަސްތީނުގެ ރައްޔިތުން ދިރިއުޅެމުންދާ ގެތައް ސުންނާފަތި ކުރުމަށް އިޒްރޭލުން ހިންގަމުންދާ ޖަރީމާ ޑޮކިއުމެންޓް ކުރުމުގެ މަސައްކަތް 2009 ވަނަ އަހަރު އދއިން ފެށިފަހުން، އިޒްރޭލުގެ އަމަލުތަކުގެ ޝިކާރައަކަށްވެ، އިރުމަތީ ގުދުސްގައި ގެދޮރު ގެއްލުނު ފަލަސްތީނުގެ ރައްޔިތުންގެ އަދަދު 3000 އަށްވުރެ މައްޗަށް އަރައެވެ. ސުންނާފަތި ކުރާނެ ކަމަށް ބުނެ އިޒްރޭލުން މިހާރު ނެރެފައިވާ އަމުރުތައް ތަންފީޒު ކޮށްފިނަމަ، މި އަދަދު އަދިވެސް އެތައް ހާހަކުން އިތުރުވެގެން ދާނެއެވެ. 

އިޒްރޭލުން ހިންގާ ފަލަސްތީނު ރައްޔިތުންގެ ގެތައް ފޭރިގަތުމުގެ ޖަރީމާއަކީ 1967 ވަނަ އަހަރު އިޒްރޭލުން ފަލަސްތީނުގެ ބިންތަކަށް ވެރިވެގަތް ފަހުން، ޔަހޫދީން ހިންގަމުން ގެންދާ އެންމެ ހައްސާސީ އެއް ޖަރީމާއެވެ.

ރަބީހާގެ އަޚް، ފާރިސް އަލް-ރަޖަބީ ބުނި ގޮތުގައި އިޒްރޭލުގެ މަގުޞަދަކީ މާލީ ގޮތުންނާއި އަޒުމާއި ހިތްވަރުގެ ގޮތުން ފަލަސްތީނުގެ ރައްޔިތުން ބަލިކޮށްލުމެވެ.

އިޒްރޭލުން ބުނަމުން ދަނީ ގެތަށް ތަޅާލުމުގެ އަމުރުތައް ނެރެމުން ދަނީ ޣައިރު ގާނޫނީ ގޮތެއްގައި ކޮށްފައިވާ ބިނާތަކަށް އަމާޒުކޮށްގެން ކަމަށެވެ. ނަމަވެސް ފަލަސްތީނުގެ ރައްޔިތުން އެކަމާ ދެކޮޅު ހަދައެވެ. ފަލަސްތީނުގެ ރައްޔިތުން ބުނާ ގޮތުގައި ގެދޮރު އިމާރާތް ކުރުމަށް އިޒްރޭލުން ހުއްދައެއް ލިބުމަކީ ވުމަށް ވުރެ ނުވުން ގާތް، ނާދިރު ކަމެކެވެ. އަދި އިޒްރޭލުގެ ނިޔަތަކީ ޤުދުސްއިން ފަލަސްތީނު ރައްޔިތުން ފަހާލުން ކަމަށްވެސް ފަލަސްތީނުގެ ރައްޔިތުން ޤަބޫލު ކުރެއެވެ.