ހޯރަފުށީ ދާއިރާގެ މެމްބަރާމެދު ދިޔަރެސްއިން ދޮގު މައުލޫމާތު ފަތުރާފައިވާތީ، ގެއްލުމުގެ ބަދަލުގެގޮތުގައި 10 މިލިއަނަށްވުރެ ގިނަ ރުފިޔާ ހޯދުމަށް ދައުވާހުށަހަޅައިފި
އެލިޔުން ޝާއިއުކޮށްފައިވަނީ ސަލީމްއާ އެއްވެސް ގުޅުމެއް ނެތް ކަމެއްގައި، ހަގީގަތް އޮޅުވާލައިގެން
ހީނާ ވަލީދުގެ މައްޗަށް ވަނީ ދައުވާކުރަން ހުށަހަޅާފައި
ދިވެހިރާއްޖޭގައި ރަޖިސްޓްރީކޮށް ހިންގަމުންގެންދާ އޮންލައިން ނޫހެއްކަމުގައިވާ "ދިޔަރެސް"ގައި, ރައްޔިތުންގެ މަޖިލީހުގެ ހއ. ހޯރަފުށީ ދާއިރާގެ މެންބަރު އަހުމަދު ސަލީމްއާ ގުޅުވައި ގަސްދުގައި ދޮގު މައުލޫމާތު ފަތުރައި، ގެއްލުން ދިނުމުގެ މަގުސަދުގައި ލިޔުން ޝާއިއުކޮށްފައިވާތީ، އޭނާގެ ފަރާތުން ދައުވާ ހުށައަޅައިފިއެވެ.
25 ޖޫން 2022ގައި ލިޔެފައިވާ ލިޔުމެއްގައި، މެމްބަރު ސަލީމްއާގުޅޭގޮތުން ލިޔެފައިވާ ލިޔުމުގެ ސަބަބުން ލިބުނު ގެއްލުމުގެ ބަދަލުގެ ގޮތުގައި 10 މިލިއަނަށްވުރެ ގިނަ ރުފިޔާ ހޯދުމަށް ސިވިލް ކޯޓަށް ހުށައަޅާފައިވަނީ ބުރާސްފަތި ދުވަހުއެވެ.
ސިވިލް ކޯޓަށް ހުށައެޅި މައްސަލައިގައި ބުނެފައިވަނީ، އެލިޔުން ޝާއިއުކޮށްފައިވަނީ އަހުމަދު ސަލީމްއާ އެއްވެސް ގުޅުމެއް ނެތް ކަމެއްގައި، ހަގީގަތް އޮޅުވާލައިގެން، ކަނޑައެޅިގެން ގެއްލުންދިނުމުގެ މަގުސަދުގައިކަމަށެވެ.
އަހުމަދު ސަލީމްގެ ފަރާތުން ސިވިލް ކޯޓަށް ހުށަހެޅި މައްސަލާގައި ދައުވާކޮށްފައިވަނީ ޚަބަރު ޝާއިއުކުރި އޮންލައިން ނޫހުގެ މަސްއޫލުވެރި ފަރާތުގެ ހައިސިއްޔަތުން ދިޔަރެސް މީޑިޔާގެ މައްޗަށާއި، ދިޔަރެސް ނޫހުގެ އެޑިޓަރުގެ ހައިސިއްޔަތުން ސ. ހިތަދޫ، ސަންސެޓްވިލާ ހީނާ ވަލީދުގެ މައްޗަށެވެ.
ދިޔަރެސް ނޫހުގައި ޝާއިއުކުރި ދޮގު ލިޔުމާ ގުޅުވައިގެން ސޯޝަލް މީޑިއާގައާއި އެނޫންވެސް ގޮތްގޮތުން އެ ބޮޑު ދޮގަކީ ހަގީގަތެއްކަން ދައްކަން ލިޔުންތަކާއި ޕޯސްޓްތައް ކުރި ވަކިވަކި ފަރާތްތަކާމެދު ވަކިވަކިން ގާނޫނީ ފިޔަވަޅު އެޅުމުގެ މަސައްކަތް ވެސް ވަކީލުންގެ ޓީމުން ގެންދަނީ ކުރަމުންނެވެ.
