ކީރިތި ރަސޫލާصَلَّى اللهُ عَلَيْهِ وَسَلَّمَ އަށް ނިސްބަތްކޮށް އިހާނެތި ބަސް ބޭނުންކުރި މައްސަލައިގައި އުތުރު އިންޑިޔާގެ ރާޖަސްތާންގައި މުސްލިމް ދެމީހަކުވެގެން ހިންދޫއެއްގެ ބޯކަނޑާ އޭނާ ގަތުލު ކުރުމާ ގުޅިގެން މުޅި އެސަރަހައްދުގައި މައްސަލަ ވަރަށް ހޫނުވެއްޖެއެވެ. މަރާލެވުނު މީހާއަކީ ކަނައްޔާ ލާލް ކިޔާ ފަހާމީހެއް ކަމަށާއި އޭނާ މަރާލެވުނީ މީގެ ކުރިން އިންޑިޔާ ސަރުކާރުގެ އިސްދެފަރާތަކުން ރަސޫލާ صَلَّى اللهُ عَلَيْهِ وَسَلَّمَ އަށް އިހާނެތިކޮށް ދެއްކި ވާހަކަޔަށް ތާއީދުކުރާކަން ހާމަކުރުމުން ކަމަށް އެކަން ކުރި މީހުން ބުނެފައިވާ ކަމަށް ރިޕޯޓުތައް ބުނެއެވެ.
ކަނައްޔާ ލާލްގެ މަރާއެކު މުޅި އެސަރަހައްދުގައި މުސްލިމުންނާ ދެކޮޅަށް ހިންގާ ހަރަކާތްއްވަނީ އިތުރުވެގެން ގޮސްފައެވެ. މަގުތައްމައްޗަށް ގިނަ ބަޔަކު ނުކުމެ ތަންތާގައި ހުޅުޖެހުންފަދަ އަމަލުތައްވަނީ އިތުރުކޮށްފައެވެ. މިއާއެކު ސަރުކާރުން ވަނީ އެސަރަހައްދުން އިންޓަރނެޓްގެ ޚިދުމަތް ކަޑާލާފައެވެ. އަދި އާންމުން ކެތްތެރިވެ މަޑުން ތިބުމަށް ރާޖަސްތާންގެ ޗީފް މިނިސްޓަރު ވަނީ އެދިވަޑައިގެންފައެވެ. އަދި މިގަތުލު ފުރިހަމަޔަށް ތަހުގީގު ކުރުމަށް ނެޝަނަލް އިންވެސްޓިގޭޝަން އޭޖެންސީއަށް ވަނީ އަންގަވާފައެވެ.
އެކަން ކުރި ދެމީހުން ވަނީ މަރުގެ ވީޑީއޯކޮށް ސޯޝަލް މީޑިއާއަށް ލާފައެއެވެ. އެދެމީހުން މިހާރު ވަނީ ފުލުހުން ހައްޔަރުކޮށްފައެވެ.
މިކަމާ ގުޅިގެން ބީޖޭޕީގެ ލީޑަރުން ގެންދަވަނީ ނުރުހުން ފާޅުކުރައްވަމުންނެވެ.
ކޮންގްރެސް ލީޑަރު ރާހުލް ގާންދީ ވެސް ވަނީ މިއަމަލު އެންމެ ހަރުކަށި އިބާރާތުން ކުށްވެރިކުރައްވާކަމަށް ވިދާޅުވެފައެވެ. އަދި އެކަން ކުރި މީހުންނަށް ހައްގު އަދަބު ދިނުމަށް ގޮވާލައްވާފައެވެ.
ބީޖޭޕީގެ ސްޕޯކްސްޕަރސަން ނުޕޫރު ޝަރުމާ ކީރިތި ރަސޫލާއަށް ނިސްބަތްކޮށް މިދިޔަމަހު އިހާނެތި ވާހަކަތަކެއް ދެއްކުމާއި ގުޅިގެން މުސްލިމް ގިނަ ގައުމުތަކަކުންވެސް ވަނީ އެކަމާ ދެކޮޅަށް ތެދުވެފައެވެ. އަދި ޑިޕްލޮމެޓިކް ގުޅުން ކަނޑާހިސާބަށް ވެސް ބައެއް ގައުމުތަކުން ވަނީ މައްސަލަ ގެންގޮސްފައެވެ.
