ޔޯގާއޭ ކިޔައިގެން އުޅެނީ ސިޔާސީ ކަމެއްގައި، ބޭނުމަކީ ވެރިކަން ހޯދުން: މަޚުލޫފް

އިންޓަރނޭޝަނަލް ޔޯގާ ޑޭގައި ހަމަނުޖެހުން ހިންގައި، އެވާހަކަތައް ދައްކަނީ ސިޔާސީ ބޭނުމެއްގައި ކަމަށާއި، ބޭނުމަކީ ވެރިކަން ހޯދުން ކަމަށް ޔޫތު މިނިސްޓަރު އަޙުމަދު މަޚުލޫފް ވިދާޅުވެއްޖެއެވެ.

އޭނާ މިހެން ވިދާޅުވީ ރައްޔިތުންގެ މަޖިލީހުގެ މިއަދުގެ ޖަލްސާގައި ނައިފަރު ދާއިރާގެ މެމްބަރު އަޙުމަދު ޝިޔާމް ކުރެއްވި ސުވާލަކަށް ޖަވާބު ދެއްވަމުންނެވެ. މެމްބަރު ޝިޔާމް ކުރެއްވި ސުވާލަކީ ޔޯގާ ޑޭ ފާހަގަ ކުރެވުނު އިރުގައި ޕޮލިހުންގެ މަސައްކަތް ފެއިލްވެފައިވާ ކަމަށް ޕޮލިހުން ބުނެފައިވާ ކަމަށެވެ. އަދި އެ އިވެންޓުގައި ޑިޕްލޮމަޓުން ބައިވެރިވާ ކަމަށް މިނިސްޓްރީން އަންގާފައިނުވާކަމަށް ޕޮލިހުން ބުނާ ކަމަށެވެ. އެހެންކަމުން އެގޮތަށް އެ އިނގިލި މިނިސްޓްރީއަށް ދިއްކުރަން ޖެހުނީ ކީއްވެގެންތޯއެވެ.

ޖަވާބު ދެއްވަމުން މިނިސްޓަރު މަޚްލޫފް ވިދާޅުވީ ޔޯގާގެ މައްސަލައަކީ ސީދާ ސިޔާސީ ބެނުމެއްގައި ބަޔަކު ކުރަމުންދާ ކަމެއް ކަމަށެވެ. މިނިސްޓަރު ވިދާޅުވީ އެއީ 2014 ން ފެށިގެން ފާހަގަކުރަމުން އައި ދުވަހެއް ކަމަށެވެ. މިކަމަކީ ސިޔާސީ ބޭނުމެއްގައި ބަޔަކު އޮޅުވާލުމާއި، ގެއްލުން ދިނުމުގެ މަގުސަދުގައި ކުރަމުން އަންނަ ކަމެއް ކަމަށް މިނިސްޓަރު ވިދާޅުވިއެވެ. މިނިސްޓަރު ވިދާޅުވީ ޔޯގާއަކީ ހަރާމް ކަމެއްތޯ ނުވަތަ ނޫންތޯ ސާފުކޮށް ބުނެދެއްވުުމުން، މިނިސްޓްރީން އެކަމާ ނޫޅޭނެ ކަމަށެވެ. އަދި ވަކި އިލްމުވެރިޔަކު ބުނާ ވާހަކައެއް ގަބޫލުކޮށްފައި، އަނެއް އިލްމުވެރިޔަކު ބުނާ ވާހަކަ ގަބޫލުނުކުރުމުގެ ވިސްނުމުގައި ރުޅިވެރިކަމާއި ނަފުރަތު އުފައްދަން އުޅޭ ކަމަށާއި، އެންމެ ފަހުން މަގްސަދަކަށް ވަނީ ވެރިކަަމަށް އައުން ކަމަށެވެ.

މީގެ އިތުރުން މިނިސްޓަރު ވިދާޅުވީ ޔޯގާ ދުވަހުގެ ހަރަކާތް ކުރިއަށް ގެންދަން މީގެ ކުރިން ނުކުރާ ކަމެއް މިއަހަރުވެސް ނުކުރާ ކަމަށެވެ. މަޚްލޫފް ވިދާޅުވީ ޔޯގާ ދުވަހުގެ ހަރަކާތް ކުރިއަށް ގެންދިޔަ ވަގުތު ލައިގެން ތިބި ޓީޝާޓުގައި އިން ލޯގޯ މައްސަލައަކަށް ވެގެން އެވާހަކަ ދެއްކި ކަމަށެވެ. އެވާހަކަ އެގޮތަށް ދައްކާތީ މީގެ ކުރިން 2016 ވަނަ އަހަރު ބޭނުންކުރި ލޯގޯ ބަލާލިކަމަށާއި، އެ ލޯގޯ މާ ބޮޑު ކަމަށެވެ. މިނިސްޓަރު ވިދާޅުވީ މިކަމާ ގުޅިގެން ދައްކާ ވާހަކަތަކާއި އެ މީހުންގެ އަމަލާ އެއް ގޮތަކަށް ވެސް ދިމާ ނުވާ ކަމަށެވެ.

އިތުރަށް މިނިސްޓަރު ވިދާޅުވީ މިނިސްޓްރީގެ އިވެންޓެއްގައި ސެކިޔުރިޓީއަށް އެދޭނަމަ، އަބަދުވެސް އިވެންޓުގެ ކުރިން ވަކިން ބްރީފިން މީޓިންއެއް ބާއްވާ ކަމަށެވެ. އަދި އެ ބައްދަލުވުމުގައި ދައްކަން ޖެހޭ ހުރިހާ ވާހަކައެއް ދައްކާފައި ހުންނާނެކަމަށެވެ.