ދިވެހި ޕްރިމިއަރ ލީގުގެ ދެވަނަ ބުރު ނިމުނުއިރު ގަދަ ހަތަރެއްގެ ތެރެއިން ކްލަބް ވެލެންސިޔާ ޖާގަ ހޯދައިފިއެވެ.
ދެވަނަ ބުރުގެ ކުރީކޮޅު ނަތީޖާތަށް ދަށްވިނަމަވެސް ދެވަނަ ބުރު ވެލެންސިޔާ ނިންމާލީ 19 ޕޮއިންޓާއެކު ހަތަރު ވަނާގައެވެ. ވެލެންސިޔާގެ ކުރީގައި 20 ޕޮއިންޓާއެކު ތިންވަނާގައި އޮތީ ޔުނައިޓެޑް ވިކްޓްރީއެވެ. ވެލެންސިޔާ ހަތަރަކަށް ޖެހިލީ ޔުނައިޓެޑް ވިކްޓްރީ ބަލިކޮށްގެންނެވެ. ވެލެންސިޔާ މެޗު ކާމިޔާބުކުރީ 3-1 ނެވެ. މެޗުގައި ވެލެންސިޔާއަށް ކުރި ހޯދައިދިނީ ޓްރާންސްފަރގައި ކްލަބާ ގުޅުނު މުޙައްމަދު އުމެއިރުއެވެ. މެޗުގެ މޮޅު ކުޅުންތެރިއަކީވެސް އޭނާއެވެ. ވެލެންސިޔާގެ ދެވަނަ ގޯލް ޖެހީ އަބުދުالله ޔާމީނު (ޔާނު) އެވެ. ދެވަނަ ހާފްގައި ވެލެންސިޔާގެ ތިންވަނަ ގޯލް ޖެހީ އަސްއަދު އަލީ (އަޑުބަރޭ) އެވެ. ޔުނައިޓެޑް ވިކްޓްރީގެ ހަމައެކަނި ލަނޑު ޖެހީ އިވާންއެވެ. އޭގެކުރިން އޭނާ އަތުން ޕެނަލްޓީއެއް ބޭކާރުވިއެވެ. އޭނާ ޖެހި ޕެނަލްޓީ ވެލެންސިޔާގެ ކީޕަރު ފައިސަލް މަތަކުރީއެވެ.
ދެވަނަ ބުރު ނިމުނުއިރު އެއްވަނާގައި މާޒިޔާ އޮތީ 39 ޕޮއިންޓާއެކުއެވެ. ދެވަނާގައި އީގަލްސް އޮތީ 34 ޕޮއިންޓާއެކުއެވެ. ވެލެންސިޔާގެ ފަހަތުގައި އޮތް ޓީސީއާއި ގްރީންއަށްވެސް ލިބިފައިވަނީ 17 ޕޮއިންޓެވެ. ސަސް އޮތީ 14 ޕޮއިންޓާއެކުއެވެ. ފުލުގައި އޮތީ ޕޮއިންޓަކާއެކު ދަ ގްރާންޑޭއެވެ.
