އައިޖީއެމްއެޗްގައި މަސައްކަތް ކުރަމުން ދިޔަ ފިލިޕީންސްގެ އަންހެން ނަރުހެއް ކަމަށްވާ މޭރީ ގްރޭސްގެ މަރުގެ މައްސަލައިގައި އޭނާގެ ފިރިމީހާ މާވިން އެސްވައި ވާރގަސްގެ މައްޗަށް އުފުލާފައިވާ ދައުވާގެ އަޑުއެހުމެއް ހޯމަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
މި މައްސަލައިގައި ހޯމަ ދުވަހު އޮތް އަޑުއެހުމުގައި އޮތީ ދައުލަތުން ހެކި ހާމަ ކުރުމާއި، މާވިންގެ ބަންދު މުރާޖައާގެ ބައެވެ.
ދައުލަތުން ވަނީ އޭނާއާ ދެކޮޅަށް ހުށައަޅާ ހެކި ހާމަކޮށްފައެވެ. މި އަޑުއެހުމުގައި ދިފާއުން ވަނީ ހެކި ހުށައަޅަން އިތުރު ފުރުސަތަކަށް އެދިފައެވެ. ވުމާއެކު، މައްސަލަ ބައްލަވާ ގާޒީ ވަނީ ލިއުމުން ދިފާއީ ހެކި ހުށައަޅަން 7 ދުވަހުގެ މުއްދަތެއް ދެއްވާފައެވެ.
މަދަނީ މިންގަނޑުން ގޮތެއް ނިންމަވަމުން ގާޒީ ވިދާޅުވީ، މިއީ މަަދަނީ މިންގަނޑުން ކުރިއަށް ގެންދެވޭނެ މައްސަލައެއްކަމަށް ޝަރީއަތަށް ބުރަވެވޭ ކަަމަށެވެ. އެއަށްފަހު ގާޒީ ވަނީ ޝަރީއަތުގެ ކުރީގެ ހުށައެޅުންތަކަށް ދެފަރާތަށްވެސް 15 ދުވަހުގެ މުއްދަތެއް ދެއްވާފައެވެ.
މި މައްސަލައާ ގުޅިގެން 26 އޭޕްރީލް 2022 ގައި ކްރިމިނަލް ކޯޓުގައި ކުރިއަށް ދިޔަ އަޑުއެހުމުގައި ދައުލަތުގެ ވަކީލު ވިދާޅުވެފައިވާ ގޮތުގައި މޭރީގެ ބޮލަށާއި ކަރަށް ހަމަލާ ދީފައިވާކަން އޭނާގެ އޮޓޮޕްސީ ރިޕޯޓުން އެނގެއެވެ.
ހަމަ އެއާއެކު، އެ ދުވަހު އެތަނުގައި ހުރީ މާވިން އެކަނިކަމަށް އޭނާ ތަހުޤީޤުގައި ބުނެފައިވުމާއި، މާވިންގެ ސާރޗް ހިސްޓަރީގައި "ހައު ޓު ނޮކް ސަމްވަން އައުޓް" އޭ ލިޔެ ސާރޗް ކޮށްފައިވާކަން އެނގެން އޮތުމުން، އެ ކަންކަން ދައުލަތުން ވަނީ ގުޅުވާލާފައެވެ.
ހޯމަ ދުވަހުގެ އަޑުއެހުމުގައި މާވިންގެ ބަންދު މުރާޖައާވެސް ކުރިއަށް ގެންގޮސްފައިވާއިރު، ބަންދު މުރާޖައާއާ ގުޅޭގޮތުން ދައުލަތުން ފާހަގަކޮށްފައިވާ ގޮތުގައި އޭނާ ޝަރީއަތް ނިމެންދެން ބަންދުކޮށްފައި ހުރި ހުރުމަށް ބަދަލު ގެންނަންޖެހޭ ޙާލަތެއް ނެތެވެ. ދިފާއުންވެސް އެކަމަށް އިއުތިރާޒެއް ނުކުރެއެވެ.
މައްސަލަ ބައްލަވާ ގާޒީވެސް ވަނީ އޭނާގެ ބަންދަށް ބަދަލެއް ގެންނަންޖެހޭ ޙާލަތެއް ނެތްކަމަށް ކަނޑައަޅުއްވާފައެވެ.
ކްރިމިނަލް ކޯޓުގައި މި މައްސަލަ ބައްލަވަނީ ގާޒީ ހުސައިން ފާއިޒު ރަޝާދެވެ.
