ސައްޙަ މަސްދަރުތަކުން ހޯދާ މައުލޫމާތާއި ޚަބަރު މެނުވީ ނުފެތުރުމަށް އެމްއެމްސީން އެދިއްޖެ

ސައްޙަ މަސްދަރުތަކުން ހޯދާ މައުލޫމާތާއި ޚަބަރު މެނުވީ ނުފެތުރުމަށް މޯލްޑިވްސް މީޑިއާ ކައުންސިލް (އެމްއެމްސީ) އިން އެދިއްޖެއެވެ.

މީޑިއާ ކައުންސިލުން ހޯމަ ދުވަހު ނެރުނު ބަޔާނެއްގައި ބުނީ، ޚިޔާލު ފާޅުކުރުމުގެ މިނިވަންކަމުގެ ޙައްޤަކީ ވަކި ޒިންމާތަކަކާއި މަސްއޫލިއްޔަތުތަކާއެކު ބޭނުންކުރަންޖެހޭ ޙައްޤެއް ކަމަށްވާއިރު، ނޫސްވެރިންނާއި މީޑިއާތަކުން އެ ޙައްޤުގެ ބޭނުން ކުރުމުގައި ސަމާލުކަން ދޭން ޖެހޭ ކަމަށެވެ.

އެގޮތުން ދިވެހި މީޑިއާގެ ހަމަތަކާއި އަހުލާޤީ މިންގަނޑުތަކާ އެއްގޮތަށް ޚަބަރާއި މައުލޫމާތު ފެތުރުމަށް ޚާއްސަ ސަމާލުކަމެއް ދިނުމަށް މީޑިއާ ކައުންސިލުން ވަނީ އެދިފައެވެ.

ވަކިން ޚާއްސަކޮށް، އާންމު ފަރުދުންގެ އަބުރަށް ނުވަތަ ހައްގަށް އުނިކަމެއް އަތުވެދާނެ ފަދަ މައުލޫމާތަކަށްވާނަމަ، އެ މައުލޫމާތެއްގެ ސައްޙަކަން ކަށަވަރު ކުރުމަށްފަހު ނޫނީ އެ މައުލޫމާތެއް ފެތުރުމަކީ ކައުންސިލުގެ ޤާނޫނާއި، ދިވެހި މީޑިއާގެ އާންމު ހަމަތަކާވެސް ޚިލާފުކަމެއްކަން ވަނީ ފާހަގަކޮށްފައެވެ.

އަދި ޚަބަރު ފެތުރުމުގައި އެކަމެއްގައި ޝާމިލުވާ ހުރިހާ ފަރާތެއްގެވެސް ބަސް ހިމަނައިގެން ޚަބަރާއި މައުލޫމާތު ޝާއިއު ކުރުމަށް ކައުންސިލުގެ ޤަވާއިދުން މީޑިއާތަކަށް ލާޒިމުކޮށްފައި އޮންނަކަންވެސް ކައުންސިލުން ވަނީ ހަނދާންކޮށްދީފައެވެ.

މީގެ އިތުރުން، އިސްލާމް ދީނާއި ޚިލާފު ޚަބަރާއި މައުލޫމާތާއި، މުޖުތަމައުގެ އާންމު އަޙުލާޤީ މިންގަނޑުތަކާއި ޚިލާފު ޚަބަރާއި މައުލޫމާތު ނުފެތުރުމަށްވެސް ކައުންސިލުން ވަނީ އެދިފައެވެ. އެގޮތުން ސައްޙަ މަސްދަރުތަކުން ހޯދާ މައުލޫމާތާއި ޚަބަރު މެނުވީ ނުފެތުރުމަށްވެސް މީޑިއާ ކައުންސިލުން ވަނީ އެދިފައެވެ.

މީޑިއާ ކައުންސިލުން ވަނީ ނޫސްވެރިންނަށް ލިބޭ މައުލޫމާތުތައް ކަށަވަރު ކޮށްދިނުމުގައި ދައުލަތުގެ އެކި މުއައްސަސާތަކުން ހޯދަން އެދޭ މައުލޫމާތު ވީ އެންމެ އަވަހަށް ނޫސްވެރިންނަށް ފޯރުކޮށްދިނުމަށްވެސް ދައުލަތުގެ އިދާރާތަކުގެ ކިބައިން އެދިފައެވެ.

ކައުންސިލުން ކުރަމުންދާ މަސައްކަތުގެ ތެރެއިން މިހާރު އަމަލުކުރަމުން އަންނަ "ދިވެހި މީޑިއާގެ ހަމަތަކާއި އަޙްލާޤީ މިންގަނޑު" އަލުން މުރާޖައާކޮށް ފައިނަލް ކުރުމުގެ މަރުޙަލާގައި އޮތްކަންވެސް ވަނީ ފާހަގަކޮށްފައެވެ.