ރަޝިޔާ-ޔޫކްރެއިން ހަނގުރާމައަށް 1 އަހަރު: ދުނިޔެ ނުތަނަވަސްކަމެއްގައި

ރަޝިޔާ-ޔޫކްރެއިން ހަނގުރާމައަށް ހުކުރު ދުވަހު 1 އަހަރު ފުރޭއިރު، ހަނގުރާމަ އިތުރަށް ހޫނުވެގެން ދިޔަ ނުދިނުމަށްޓަކައި ހުރިހާ ފަރާތްތަކަކުން ދަނީ ޑިޕްލޮމެޓިކް މަސައްކަތްތަކެއް ކުރަމުންނެވެ. މިގޮތުން އެމެރިކާގެ ރައީސް ޖޯބައިޑަން ބުދަ ދުވަހު ވަނީ، ޕޮލަންޑްގެ ވޮސޯގައި، ނޭޓޯގެ އިރުމަތީ ފަޅީގެ ގައުމުތަކުގެ ލީޑަރުންނާ ބައްދަލުކުރައްވާފައެވެ. މި ގްރޫޕަކީ 2014 ވަނަ އަހަރު ރަޝިޔާގެ ރައީސް ޕޫޓިންގެ އެންގެވުމަށް ޔޫކްރެއިންގެ ކްރައިމިއާ ސަރަހައްދު ހިސޯރުކުރުމާ ގުޅިގެން އުފެއްދި ނޭޓޯގެ ކުޑަ ގްރޫޕެކެވެ. މިއިން ކޮންމެ ގައުމެއްގެވެސް މިހާރުގެ ބިރަކީ ޔޫކްރެއިންގައި ޕޫޓިންއަށް ކާމިޔާބު ލިބިއްޖެނަމަ ދެން އެއިން ގައުމަކަށް އަރާފާނެކަމުގެ ބިރެވެ.

މިބައްދަލުވުމުގެ ކުރިން ރައީސް ބައިޑެން ވަނީ ޔޫކްރެއިން ހިމެނޭގޮތުން އެސަރަހައްދަށް ހަތަރު ދުވަހުގެ ދަތުރުފުޅެއް ކުރައްވާފައެވެ. ދަތުރުފުޅުގެ ތެރެއިން ވާހަކަފުޅު ދައްކަވަމުން ބައިޑަން ވިދާޅުވިގޮތުގައި ޔޫކްރެއިން ހިފުމުން، އެކަން ފުރަތަމަ ވެގެންދިޔައީ ޔޫކްރެއިނަށް އެކަނި ކުރިމަތިވި ޓެސްޓަކަށެވެ. ނަމަވެސް މިއަދު އެކަން ބަދަލުވެގެން އައިގޮތުން ޔޫރަޕާއި އެމެރިކާއާއި، ނޭޓޯ، އަދި ދުނިޔޭގެ ހުރިހާ ޑިމޮކްރަސީއަކަށްވެސް ވަނީ ޓެސްޓަކަށް ވެފައިކަމަށް ވިދާޅުވިއެވެ.

ނޭޓޯގެ ބައްދަލުވުމުގައި މޯލްޑޯވާގެ ރައީސާ ވަނީ މިފަދަ ކަންބޮޑުވުމެއް ހާމަކުރައްވާފައެވެ. އެކަމަނާ ވިދާޅުވީ އޭނާގެ ސަރުކާރު ވައްޓާލުމަށް ބޭރުގެ ނުފޫޒުތައް ބޭނުން ކޮށްގެން ރަޝިޔާއިން މަސައްކަތް ކުރަމުންދާކަމަށެވެ. ޔޫކްރެއިނާ އިންވެގެން އޮންނަ މޯލްޑޯވާއަކީ ޔޫރަޕްގެ ގައުމުތަކުގެ ތެރެއިން ފަގީރު ގައުމެކެވެ. މޯލްޑޯވާއިން މިހާރު މަސައްކަތްކުރަމުން ދަނީ 27 ގައުމުގެ މައްޗަށް އެކުލެވޭ އީޔޫއާ ގުޅުމަށެވެ. ރައީސް ބައިޑަން ވަނީ މިމަގަށް މޯލްޑޯވާ ކުރާ މަސައްކަތް އެންޑޯޒް ކުރައްވާފައެވެ.

މޯލްޑޯވާއަށް އީޔޫގެ ކެންޑިޑޭޓް ސްޓޭޓަސް ލިބިފައިވަނީ ޔޫކްރެއިނާ އެއް ދުވަހަކު، މިދިޔަ ޖޫން މަހުއެވެ.

އެމެރިކާއިން އަޅާ މިފަދަ ކޮންމެ ފިޔަވަޅަކަށް ރަޝިޔާއިން އަންނަނީ ފާޑުކިޔައި، އެކަން ކުށްވެރިކުރަމުންނެވެ.

ޔޫކްރެއިން ހަނގުރާމާގައި ރަޝިޔާ ކުށްވެރިކޮށް ޔޫކްރެއިނުން ހުށަހެޅި ގަރާރާ ބެހޭގޮތުން މަޝްވަރާކުރުމަށް އދ.ގެ ޖެނެރަލް އެސެމްބްލީގެ އިމަރޖެންސީ ސެޝަނެއްވެސް ވަނީ ބުދަ ދުވަހު ފަށާފައެވެ.    

މި ސެޝަންގައި ތަގުރީރު ކުރައްވަމުން، ރަޝިއާއިން އދ.އަށް ކަނޑައަޅާފައި ހުންނަވާ މަންދޫބު، ވަސީލީ ނެބެންޒާ ވިދާޅުވީ، ހަނގުރާމާގައި ޔޫކްރެއިނަށް ހުޅަނގުން ދޭ ތަރުހީބުގެ ބޮޑު ކަމުން، ހަނގުރާމައިގެ ފުން އަނދަވަޅުގެ ތެރެއަށް މުޅި ދުނިޔެވެސް ވައްޓާލުމަށްވެސް ހުޅަނގުގެ ބާރުތަކުން ތައްޔާރަށް އޮތް ކަންހާމަވާ ކަމަށެވެ.

ވީ ކޮންމެ ގޮތަކުން ރަޝިއާ ބަލިކުރަން ހުޅަނގު އޮތީ ކެތްމަދުވެފައި ކަމަށާއި ހަމައެކަނި ޔޫކްރައިން ގުރުބާން ކޮށްގެން އެމީހުންނަށް ނުފުދޭކަމަށް ވިދާޅުވެފައި ވެއެވެ. 

ރަޝިއާގެ މަންދޫބު ވަނީ ހަނގުރާމަޔާ ބެހޭގޮތުން އެގައުމުން ބުނަމުން އައި ބުނުން ދިފާއުކުރައްވާފައެވެ. އާންމު މަޖިލީހާ މުޚާތަބު ކުރައްވަމުން މަންދޫބު ވިދާޅުވީ، ރަޝިއާގެ ކަންބޮޑުވުންތަކަށް ހުޅަނގުން އަޅާނުލައި ދޫކޮށްލާފައިވާ ކަމަށެވެ. އޭގެ ބަދަލުގައި ހުޅަނގުން ދަނީ ރަޝިއާގެ ބޯޑަރުތަކާ ކައިރިއަށް ނޭޓޯގެ އަސްކަރީ ބާރުވެރިކަން، ފަހަރަކަށްވުރެ ފަހަރެއް ފުޅާކުރަމުން ކަމަށެވެ.

ޚާއްސަ ސެޝަނާ މުޚާތަބްކުރައްވަމުން ޖެނެރަލް އެސެމްބްލީގެ ރައީސް ވަނީ، އެއް އަހަރު ވަންދެން އދ. މަޖިލީހާއި މުޅި ބައިނަލްއަގުވާމީ މުޖްތަމައުން ހަނގުރާމަ ހުއްޓާލުމަށް ރަޝިޔާއަށް ގޮވާލަމުން އައިއިރުވެސް ހަނގުރާމަ ހުއްޓާފައި ނުވިނަމަވެސް މިކަމުގައި މިލިޓަރީ ބާރުވެރިކަން ބޭނުންކުރަން ފެނިވަޑައިނުގަންނަވާ ކަމަށް ވިދާޅުވެފައެވެ. އަދި މި ލޭއޮހޮރުވުމުގެ "ނަރަކަ"އިން މިންޖުކުރެވޭނީ ހަމައެކަނި ރަޝިޔާއަށް ކަމަށްވެސް ވަނީ ވިދާޅުވެފައެވެ.

އަނެއްކޮޅުން ރަޝިޔާއިންވެސް ގެންދަނީ ރަހުމަތްތެރި ގައުމުތަކާ ބައްދަލުކޮށް އުކުޅުތައް ރާވަމުންނެވެ. މިގޮތުން ރައީސް ވްލަޑިމިއަރ ޕޫޓިންވަނީ ބުދަ ދުވަހު ޗައިނާގެ ޗީފް ޑިޕްލޮމޭޓް ވެންގ ޔީއާ ބައްދަލުކުރައްވާފައެވެ. އާންމުކޮން ބޭރުގެ ލީޑަރުންނާ ޕޫޓިން ބައްދަލުކުރައްވަނީ ވަރަށް ދިގު މޭޒެއްގެ އެއްކޮޅުގައި އިންނަވައި، އެބޭފުޅަކު އަނެއްކޮޅުގައި ބައިންދަވައިގެން ކަމަށް ވީނަމަވެސް، ވެންގ ޔީއާއެކު ބޭއްވެވި ބައްދަލުކުރެއްވުން ބޭއްވެވީ ސަލާންވެސް ކޮށްލެއްވޭހާ ގާތުގައި، މޭޒެއްގެ ދެފަރާތުގައި ތިއްބަވައިގެންނެވެ.

ޗައިނާ ފިޔަވައި ދެން ރަޝިޔާއަށް މަދަދު ދޭނެކަމަށް ފެންނަނީ ފްރާންސުންނެވެ. ފްރާންސްގެ ރައީސް އިމެނުއަލް މެކްރޯން ދާދި ފަހުންވެސް ވިދާޅުވެފައިވަނީ، ރަޝިޔާ ހަނގުރާމާގައި ބަލިވުމަށް އެދިވަޑައިގެންނެވި ނަމަވެސް އެގައުމު ޗިސްޗިސް ވުމަށް އެދިވަޑައިނުގަންނަވާ ކަމުގައެވެ.

ކޮންމެއަކަސް، ހުކުރު ދުވަހު ރަޝިޔާއިން ކަންތައް ކުރާނެ ގޮތެއް އަދި ހަމަ ލަފާކޮށްލަންވެސް ނޭގެއެވެ. ނަމަވެސް ޔޫކްރެއިނުން އޮތީ ހަތިޔާރާއި ބަރު ވެހިކަލްތައް ނެރެ، ދީފާނެ އިތުރު ހަމަލާތަކަކަށް ތައްޔާރަށް ކަމަށް ބުނެއެވެ. އެންމެންގެ މިވަގުތުގެ ކަންބޮޑުވުމަކީ ޔޫކްރެއިން ފިޔަވައި އިތުރު ގައުމަކަށް ހަމަލާތައް އަމާޒުވެދާނެތީއެވެ.