ދިވެހި ޙައްޖުވެރިންގެ ކަންކަން ފަސޭހަކަމާއެކު ކުރިޔަށް ގެންދިއުމަށް މަޝްވަރާކޮށްފި
ހައްޖުގެ އިންތިޒާމުތަކަށް އައިސްފައިވާ ބަދަލުތަކަށް ޙައްޖުވެރިން ހޭލުންތެރި ކުރުމުގައި ވެސް އެހީތެރިކަން ފޯރުކޮށްދޭނެ
ޙައްޖުވެރިންގެ ކަންކަން ފަސޭހަކަމާއެކު ކުރިޔަށް ގެންދިއުމާއި ބެހޭގޮތުން މަޝްވަރާކުރުމަށް ބޭއްވި ބައްދަލުވުން
ދިވެހި ޙައްޖުވެރިންގެ ކަންކަން ފަސޭހަކަމާއެކު ކުރިޔަށް ގެންދިއުމާއި ބެހޭގޮތުން މަޝްވަރާކޮށްފިއެވެ.
މި މަޝްވަރާތައް ކުރައްވާފައިވަނީ ސައުދީ އަރަބިއްޔާގެ ޖެނެރަލް އެޑްމިނިސްޓްރޭޝަން އޮފް ޙައްޖު މިޝަންސްގެ ޑިރެކްޓަރ ޖެނެރަލް އަލްއުސްތާޛް ބަހާއު ޙަލަވާނީ އާއި ދިވެހި ޙައްޖު މިޝަންގެ ރައީސް މިނިސްޓަރ އޮފް ސްޓޭޓް ފޯރ އިސްލާމިކް އެފެއާޒް އަލްއުސްތާޛް މުޙައްމަދު އަނީލްއެވެ.
މި ބައްދަލުވުމުގައި ސައުދީ ސަރުކާރުން ދިވެހިރާއްޖެއާމެދު ބަހައްޓަވާ ގާތްކަމަށްޓަކައި ސައުދީ ރަސްގެފާނަށާއި ވަލީ އަހުދަށް ޝުކުރު އަދާކުރެއްވިއެވެ. މި ބައްދަލުވުމުގައި ދިވެހި ޙައްޖުވެރިންނަށް ދިމާވާ ދަތިތައް ލުކޮށްދިމުގައި އެހީތެރިކަން ފޯރުކޮށްދީ ޙައްޖުގެ އިންތިޒާމުތަކަށް އައިސްފައިވާ ބަދަލުތަކަށް ޙައްޖުވެރިން ހޭލުންތެރި ކުރުމުގައިވެސް އެހީތެރިކަން ފޯރުކޮށްދެއްވާނެ ކަމަށް ވިދާޅުވެފައިވާ ކަމަށް އިސްލާމިކް މިނިސްޓްރީން ބުނެއެވެ.
އިސްލާމިކް މިނިސްޓްރީން މިހެން ބުނެފައިވާއިރު ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު އެންމެ ބޮޑު ސަމާލުކަމެއް ދެއްވަނީ ހައްޖުގެ އަޅުކަމަށް ފުރުމުގެ އިންތިޒާމުތައް ހުރިނެތްގޮތް ބައްލަވައި، ވީ އެންމެ ރަނގަޅަށް އެކަންކަން ހަމަޖެއްސެވުމަށް ކަމަށް ރައީސުލްޖުމްހޫރިއްޔާގެ ނައިބު ފައިސަލް ނަސީމް ވަނީ ވިދާޅުވެފައެވެ.
ހައްޖުވެރިންނަށް ފަސޭހަކަމާއެކު އެއަރޕޯޓަށް ދިއުމުގެ ކަންކަން ހަމަޖެއްސުމަށް ކަމާގުޅޭ މުއައްސަސާތަކާއެކު މަޝްވަރާކުރެއްވުމަށް ބޭއްވި މި ބައްދަލުވުމުގައި ބައިވެރިވެވަޑައިގެން ނައިބު ރައީސް ވަނީ، ހައްޖާޖީންގެ ދަތުރުފަތުރުގެ އިންތިޒާމްތައް މާލެއާއި ހުޅުމާލޭގައި ހަމަޖެހިފައިވާގޮތާއި، އެއަރޕޯޓްތެރޭގައި ހައްޖުވެރިންނަށް އިސްތިގުބާލްކުރުމާއި، އަދި މީގެ އިތުރުން އެއަރޕޯޓުތެރެއިން ހަމަޖައްސަންޖެހޭ އެހެނިހެން އިންތިޒާމުތައް ހަމަޖެހިފައިވާ ގޮތުގެ މަޢުލޫމާތުތައް އޮޅުންފިލުއްވާފައެވެ.
މި ބައްދަލުވުމުގައި ހައްޖާޖީންނަށް ފަސޭހަކަމާއެކު ގެއިން އެއާޕޯޓަށް ދިއުމާއި، އަދި އެއަރޕޯޓްތެރޭގައި ފަސޭހަ ގޮތެއްގައި އިންތިޒާމުތައް ހަމަޖެއްސުމާ ގުޅޭގޮތުން ކަމާގުޅޭ މުއައްސަސާތަކުން ވަނީ މަޝްވަރާކޮށްފައެވެ. އެގޮތުން ބަސްތައް ދަތުރުކުރާނެ މަގުތަކާއި، ގަޑިތަކާއި، އެއާޕޯޓުން ހައްޖުވެރިންނަށް އިސްތިގުބާލުކުރާނެ ގޮތްތަކާއި، އެކަމަށް އެހީތެރިވުމަށްޓަކައި ކަނޑައެޅިފައިވާ ފަރާތްތައް އަމަލުކުރަންވާނެގޮތާއި، އެއާޕޯޓު ތެރެއިން ހައްޖާޖީންނަށް ފޯރުކޮށްދޭން ޖެހޭ އެންމެހާ އެހީތެރިކަމާ ގުޅޭގޮތުން ވަނީ މަޝްވަރާކުރައްވާފައެވެ.
އިސްލާމިކް މިނިސްޓްރީން މައުލޫމާތުދޭގޮތުގައި މިފަހަރު ހައްޖާޖީން ފުރަން ހަމަޖެހިފައިވަނީ 3 ފްލައިޓެއްގައެވެ. އަދި އެއީ މި ހިނގާ ޖޫންމަހުގެ 26 ވަނަ ދުވަހާއި، 29 ވަނަ ދުވަހާއި، ޖުލައި މަހުގެ 2 ވަނަ ދުވަހު އޮންނަ ފްލައިޓްތަކެކެވެ.
