އެކި ގޮތްގޮތުން މާލެއަށް ޚިދުމަތް ކޮށްފައިވާ އަންހެނުން ފާހަގަކޮށް އެ ފަރާތްތަކަށް ހިތްވަރުދިނުމުގެ ފިލާ ހަވާލުކޮށްފިއެވެ.
މި ފިލާތައް ހަވާލުކޮށްފައިވަނީ ހުކުރު ދުވަހުގެ ރޭ މާލެ ސިޓީ އަންހެނުން ތަރައްގީއަށް މަސައްކަތްކުރާ ކޮމެޓީއިން އިންތިޒާމްކޮށްގެން، އެ ކޮމިޓީއަށް އެއް އަހަރު ފުރުމުގެ މުނާސަބަތުގައި "ޚިދުމަތަށް އެއްއަހަރު"ގެ ނަމުގައި ކުރިޔަށް ގެންދިޔަ ހަފްލާގައެވެ. މިހަފްލާ ޝަރަފުވެރިކޮށްދެއްވީ މިނިސްޓަރ އޮފް ހަޔަރ އެޑިއުކޭޝަން ޑރ. އިބްރާހީމް ހަސަންއެވެ. މީގެ އިތުރުން މިނިސްޓްރީ އޮފް ޖެންޑަރގެ ސްޓޭޓް މިނިސްޓަރ ޒިފްލީނާ ހަސަންއާއި ސްޓޭޓް މިނިސްޓަރ ފަޒްނާ ޝާކިރުއާއި މިނިސްޓްރީ އޮފް އެންވަޔަރަމަންޓްގެ ސްޓޭޓް މިނިސްޓަރ އަލީ ސާލިހްއާއި ސްޓޭޓް މިނިސްޓަރ ހަސަން މުޣުނީގެ އިތުރުން މާލެ ސިޓީ ކައުންސިލްގެ ޑެޕިއުޓީ މޭޔަރ އަހުމަދު ނަރީޝްއާއި ކައުންސިލަރުން ބައިވެރިވެވަޑައިގެންނެވިއެވެ.
މި ހަފްލާގައި މާލެ ސިޓީ އަންހެނުންގެ ތަރައްގީއަށް މަސައްކަތްކުރާ ކޮމިޓީން ވަނީ އެ ކޮމިޓީގެ އައު ލޯގޯ އިފްތިތާހުކުރައްވާފައެވެ. އަދި ޕޮލިސް ކްރައިމް ބްރާންޗާއި އެ ކޮމިޓީއާ ގުޅިގެން ކުރިއަށް ގެންދިޔުމަށް ހަމަޖެހިފައިވާ ރައްޔިތުންގެ ހާލުބެލުމުގެ ސަރވޭ ވަނީ އިފްތިތާހުކޮށްފައެވެ.
މި ހަފްލާގައި އެ ކޮމިޓީން ވަނީ މާލެއަށް އެކި ގޮތްގޮތުން ޚިދުމަތް ކޮށްފައިވާ 16 އަންހެނަކަށް ޚިދުމަތުގެ އަގުވަޒަންކޮށް ހިތްވަރު ދިނުމުގެ ފިލައެއް ދީފައެވެ.
ހިތްވަރުދިނުމުގެ ފިލާ ލިބުނު އަންހެނުން
- އައިމިނަތު ސީމާ
- މަރިޔަމް ޝަކީލާ އާދަމް
- ފާތިމަތު ނިޒާރު
- ސައީދާ އަލީ
- އައިމިނަތު ވަހީދާ
- އާމިނަތު ނާޒުލީ އިބްރާހީމް
- ޝަރީފާ އަބްދުﷲ ދީދީ
- ފަހީމާ އަބްދުލް ގާދިރު
- އާއިޝަތު ހުސައިން މަނިކު
- އާމިނަތު ނާޝިދާ
- އާއިޝަތު ޝެރީން
- ފާތުމަތު ބަދޫރާ
- ސޯބިރާ އަހުމަދު މުހައްމަދު
- އާއިޝަތު މުހައްމަދު (ރިޝްތާ)
- މަރިޔަމް މުހައްމަދު ސަމީރު
- ޝާމާ މުހައްމަދު
މީގެ އިތުރުން ނުރައްކާތެރި ހާދިސާއެއްގައި ނިޔާވެފައިވާ، މާލެ ސިޓީގެ އަންހެނުން ތަރައްގީއަށް މަސައްކަތްކުރާ ކޮމިޓީގެ މެމްބަރު އައިމިނަތު އީމާގެ ޚިދުމަތުގެ އަގު ވަޒަންކޮށް އާއިލާއަށްވަނީ ހަނދާނީ ފިލައެއް ދީފައެވެ. އާއިލާގެ ފަރާތުން މި ފިލައާ ހަވާލުވީ އީމާންގެ ދެ ދަރިންނާއި މަންމައެވެ.
