އޮކްޓޯބަރު މަހުގައި 7 ބައި އިލެކްޝަނެއް ބާއްވާނެ

ކުރިޔަށް އޮތް އޮކްޓޯބަރ މަހުގައ 7 ބައި އިލެކްޝަނެއް ބާއްވާގޮތަށް ހަމަޖެހިފައިވާކަމަށް އިލެކްޝަންސް ކޮމިޝަން (އީސީ)ން ބުނެފިއެވެ.

މިއިންތިޚާބުތައް ބޭއްވުމަށް ހަމަޖެހިފައިވަނީ އޮކްޓޯބަރު 1 އަދި އޮކްޓޯބަރު 22ގައެވެ. އޮކްޓޯބަރު 1 ގައި ބޭއްވުމަށް ހަމަޖެހިފައިވަނީ ށ. މާއުނގޫދޫ ކައުންސިލު މެމްބަރު އިންތިޚާބުކުރުމަށް ބާއްވާ ބައި-އިލެކްޝަނާއި ރ.ރަސްމާދޫ، ތ.ގުރައިދޫ އަދި ލ.ދަނބިދޫ އަންހެނުންގެ ތަރައްގީއަށް މަސައްކަތްކުރާ ކޮމިޓީގެ ބައި އިލެކްޝަނެވެ. އޮކްޓޯބަރު 22 ގައި ބޭއްވުމަށް ހަމަޖެހިފައިވަނީ ހއ. ހޯރަފުށި، ވ.ފެލިދޫ އަދި ވ.ތިނަދޫގެ އަންހެނުންގެ ތަރައްގީއަށް މަސައްކަތްކުރާ ކޮމިޓީގެ ބައި އިލެކްޝަނެވެ.

މިބައި އިލެކްޝަންތަކަށް އީސީން ވަމުންދާ ތައްޔާރީތަކާއި ގުޅޭގޮތުން ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަދައްވަމުން އީސީގެ ހިޔުމަން ރިސޯސަސް ސިވިކް އެޑިޔުކޭޝަން އެންޑް ލީގަލް ޑިރެކްޓަރު އަލްއުސްތާޒު އިބްރާހީމް ހާފިޒު ވިދާޅުވީ އޮކްޓޯބަރު 1 ގައި އޮންނަ ހަތަރު އިންތިޚާބަށް ކުރިމަތިލުމަށް ބޭނުންވާ ކެންޑިޑޭޓުން މިހާރު ކުރިމަތިލާފައިވާކަމަށެވެ. 22 އޮކްޓޯބަރު އޮންނަ އިންތިޚާބުގެ ތެރެއިން ވ ތިނަދޫގެ ޑަބްލިޔުޑީސީގެ ބައި އިލެކްޝަނަށް 5 މެމްބަރުން އިންތިޚާބު ކުރަންޖެހޭކަމަށް ހާފިޒު ވިދާޅުވިއެވެ.

މިއިންތިޚާބުތަކަށް ވާންޖެހޭ ތައްޔާރީތައް ވަމުންދާކަމަށް ހާފިޒު ވިދާޅުވިއެވެ. މިތަންތަނަށް ބޭނުންވާ އޮފިޝަލުންނާއި ވޯޓުލާންޖެހޭ ތަންތަން ހަމަޖެހިފައިވާކަމަށާއި ހުރިހާ ތައްޔާރީތަކެއްހެން ވަނީ ނިމިފައިކަމަށް ހާފިޒު ވިދާޅުވިއެވެ.

ބައި އިލެކްޝަންތައް ބާއްވަންޖެހޭ މިންވަރު ގިނަކަމުން ލާމަރުކަޒީ ގާނޫނާއި އިންތިޚާބާ ބެހޭ ގާނޫނަށް އިސްލާހު ގެނައުމަށް ރައްޔިތުންގެ މަޖިލީހަށް ވަނީ ހުށަހަޅާފައެވެ. އެއީ އަހަރަކު އެއް ފަހަރު ބައި އިލެކްޝަންތައް ބާއްވާގޮތަށް ގާނޫނަށް އިސްލާހު ގެނައުމަށެވެ. ބައި އިލެކްޝަން ބާއްވާ ކޮންމެ ފަހަރަކު އިންތިޚާބު ބާއްވަން 150،000 ރުފިޔާ ޚަރަދުވާކަމަށް އީސީން ބުނެއެވެ.