ޑަބްލިއުޑީސީގެ ބައި-އިލެކްޝަން އަހަރަކު އެއްފަހަރު ބާއްވަން މަޖިލީހުން ފާސްކޮށްފި
ބައި އިލެކްޝަން އަވަސް އަވަހަށް ބޭއްވުމަކީ ހަރަދު ބޮޑުވާކަމެއް
ބައި އިލެކްޝަނެއްގައި މީހަކު ވޯޓުލަނީ
އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ ބައި-އިލެކްޝަން އަހަރަކު އެއްފަހަރު ބާއްވާގޮތަށް ގާނޫނަށް ހުށަހެޅި އިސްލާހު މަޖިލީހުން ފާސްކޮށްފިއެވެ.
މި ބިލު މަޖިލީހަށް ހުށަހެޅުއްވީ ވެލިދޫ ދާއިރާގެ މެންބަރު މުހައްމަދު އަބްދުﷲ ޝަފީގުއެވެ. ބިލު ދިރާސާ ކޮށްފައިވަނީ ރައްޔިތުންގެ މަޖިލީހުގެ ލާމަރުކަޒީ ކޮމެޓީންނެވެ. ކޮމެޓީން ބިލު ފާސްކުރިގޮތަށް ތަޅުމުން ފާސްކޮށްފައިވަނީ 34 މެމްބަރުންގެ ވޯޓުންނެވެ. ބިލު ފާސްކުރަން ނުފެންނަކަމަށް ވޯޓު ދެއްވީ 2 މެމްބަރުންނެވެ.
މިހާރު ގާނޫނުގައި އޮންނަ ގޮތުން ޑަބްލިއުޑީސީގެ ގޮނޑިއެއް ހުސްވާތާ 60 ދުވަހުގެ ތެރޭގައި އެ ގޮނޑިއަށް މެމްބަރަކު އިންތިހާބުކުރަން ޖެހެއެވެ.
ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނަށް އިސްލާހު ގެނައުމުގެ ބިލަކީ އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކުގެ ބައި އިލެކްޝަންތައް ބާއްވާނެ މުއްދަތާއި ބައި އިލެކްޝަން ބާއްވާނެ ގޮތް ބަޔާންކުރުމާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކުގެ މަގްސަދާއި ޒިންމާތައް އިތުރަށް ސާފުކޮށްދިނުމަށްޓަކައި ގާނޫނަށް ގެންނަންޖެހޭ އިސްލާހުތައް ގެނައުމެވެ.
މި ގާނޫނަށް ހުށަހެޅި އިސްލާހަކީ އަންހެނުންގެ ތަރައްޤީއަށް މަސައްކަތް ކުރާ ކޮމެޓީތަކުގެ އިންތިޚާބެއް ބާއްވަން ޖެހިއްޖެ ހާލަތުގައި 365 ދުވަހުގެ ތެރޭގައި އިންތިޚާބު ބޭއްވުމަށެވެ. އަދި 2 އިންތިހާބުގެ ދޭތެރޭގައި 365 ދުވަހަށްވުރެ ދިގު އަދި 300 ދުވަހަށްވުރެ ކުރުވެގެން ނުވާނެކަމަށް ގާނޫނަށް ހުށަހެޅި އިސްލާހުގައިވެއެވެ.
365 ދުވަހުގެ ތެރޭގައި ހުސްވެފައިވާ ގޮނޑިއަށް މެމްބަރަކު އައްޔަން ކުރަންޖެހޭކަމަށް ބުނެފައިވީ ނަމަވެސް، ކޮމިޓީގެ ދައުރު ނިމެން ބާކީ 1 އަހަރު ނެތް ނަމަ މެންބަރަކު އިންތިހާބުކުރަން ލާޒިމެއް ނޫނެވެ. އެހެންނަމަވެސް ކޮމިޓީގެ ބައްދަލުވުމެއް ބޭއްވުމަށް ބޭނުންވާ ގާނޫނީ އަދަދު ހަމަވާ މިންވަރަށް އެ ކޮމިޓީގައި މެމްބަރުން ނެތްނަމަ، ކޮމިޓީގެ އެންމެ ފަހުން ހުސްވި ގޮނޑިއަށް މެމްބަރުން އިންތިހާބުކުރަންވާނެކަމަށް ވަނީ ބުނެފައެވެ. އަދި އިންތިހާބުކުރެވޭ މެމްބަރުގެ މުއްދަތަކީ ހިނގަމުންދާ ދައުރު ނިމެންދެންކަމަށް ވެސް އިސްލާހުގައި ބުނެފައިވެއެވެ.
