ލަންކާއަށް ދިމާވެފައިވާ ހާލަތުން އަރައިގަތުމުގައި އިންޑިއާގެ ފުރިހަމަ އެއްބާރުލުން ލިބޭނެކަމަށް ބުނެފި

ލަންކާއަށް މިހާރު ދިމާވެފައިވާ އިގުތިސާދީ ކާރިސާއިން އަރައިގަތުމަށް އިންޑިއާގެ ފުރިހަމަ އެހީ ލިބޭނެކަމަށް، އިންޑިއާގެ ފޮރިން ސެކްރެޓަރީ ވިނޭ ކްވަޓްރާ ވިދާޅުވެއްޖެއެވެ.

ލަންކާގެ ރައީސް އޮފީހުގެ މީޑިއާއާ ހަވާލާދީ ރިޕޯޓުކޮށްފައިވާގޮތުން، އެކުވެރި ގައުމެއްގެ ގޮތުން އިންޑިއާއިން އޮތީ ލަންކާއަށް އެހީވާން ތައްޔާރަށްކަމަށް ފޮރިން ސެކްރެޓަރީ ވަނީ ވިދާޅުވެފައެވެ.

އިންޑިއާގެ ފޮރިން ސެކްރެޓަރީ މިހެން ވިދާޅުވެފައިވަނީ ބުރާސްފަތި ދުވަހު ރިޔާސީ ގަނޑުވަރުގައި ރައީސް ގޮތަބަޔާ ރާޖަޕަކްސައާއެކު ކުރިއަށްގެންދެވި ބައްދަލުވުމެއްގެ ތެރޭގައެވެ.

ލަންކާއަށް އެހީވުމަށް ބޭނުންވާ ތެލާއި، ކާނާއާއި، ގަސް ކާނާ އަދި ބޭސް ފޯރުކޮށްދިނުމަށް އިންޑިއާއިން އެހީގެ ގޮތުގައި ކްރެޑިޓް ލައިން ފޯރުކޮށްދިނުމާ ގުޅޭ މަޝްވަރާތައް ކުރުމަށް އިންޑިއާގެ މަންދޫބުންގެ ޓީމެއް ވަނީ ލަންކާއަށް ވަޑައިގަންނަވާފައެވެ.

އިންޑިއާގެ މަންދޫބުންގެ ޓީމުން ފާހަގަކުރާގޮތުގައި އިންޑިއާއިން އޮތީ ލަންކާއަށް އެހީ ފޯރުކޮށްދޭން ކަމަށް އެގައުމުގެ ސަރުކާރުން ވަނީ ޔަގީންކޮށްދީފައެވެ. މިކަމާ ގުޅިގެން ރައީސް ގޮތަބަޔާ ވަނީ ލަންކާގެ ސަރުކާރާއި ރައްޔިތުންގެ ނަމުގައި އިންޑިއާ ސަރުކާރަށް ޝުކުރު އަދާކުރައްވާފައެވެ.

ލަންކާއަށް ދިމާވެފައިވާ އިގުތިސާދީ ކާރިސާއާއެކު އެގައުމަށް އެންމެ ބޮޑު އެހީއެއް ފޯރުކޮށްދެމުންދާ ގައުމަކީ އިންޑިއާއެވެ.