ހާޓް އެޓޭކް ޖެހޭ މީހުންގެ ހާލަތު އިތުރަށް ގޯސްވިޔަ ނުދިނުމަށް ކެންސަރު ބައްޔަށް ފަރުވާކުރުމަށް މިހާރުދެވޭ ބޭހެއް ނުވަތަ ފަރުވާއެއް ބޭނުންކޮށްގެން ހައްލު ލިބިދާނެކަމުގެ އުންމީދު އައުވެފައިވާކަމަށް ރިސަރޗަރުންގެ ޓީމަކުން ބުނެފިއެވެ. ހާޓް އެޓޭކްއަކަށް ފަހު ހިތުގެ ލޭހޮޅިތަކަށް ގެއްލުންތަކެއް ލިބޭއިރު މިދެންނެވި ފަރުވާ ބޭނުންކުރުމުން ލޭހޮޅިތަކުގެ ހާލަތު އިތުރަށް ގޯސްވުން ހުއްޓުވާ އަދި ލޭހޮޅިތަކުގެ ސެލްތައް އައުވުމަށް އެހީތެރިވެދޭކަމަށް ޔުނިވަރސިޓީ އޮފް ބްރިސްޓޯލްގެ ރިސަރޗަރުންގެ ޓީމުން ބުނެފައިވެއެވެ. އެޓީމުން ބުނެފައިވާ ގޮތުގައި ހާޓް އެޓޭކެއް ޖެހުމުން ހިތަށްލިބޭ ގެއްލުން ގުދުރަތީ ގޮތުން މަރާމާތުވުމަށް ވަގުތު ނަގާއިރު، ހިތް ރަނގަޅަށް ހިންގާދިނުމަށް ބޭނުންވާވަރަށް ގެއްލުންވެފަހުރި ލޭހޮޅިތަކުން ލޭ ފޮނުވާ ނުދެއެވެ. ނަމަވެސް މިޑްރަގް ބޭނުން ކުރުމުން ހިތުގެ މަރާމާތު އަވަސްކޮށްދީ އަދި ހިތުގެ ހާލަތު އެނބުރި ކުރިން ހުރި ހާލަތަށް ދިއުމަށް އެހީތެރިވެދޭކަންވަނީ ސައިންޓިފިކް ދިރާސާތަކުގެ އެހީގައި ހާމަވެފައިވާކަމަށް ޓީމުން ބުނެފައިވެއެވެ.

އެހެންވެސް މިފަދަ ޓެސްޓުތަކެކޭ އެއްފަދައިން މިތަހްލީލްތައްވެސް ކޮށްފައިވަނީ މީދާ ބޭނުންކޮށްގެންނެވެ. "އެމް.އީ.ކޭ އިންހިބިޓަރ" ގެ ނަމުން ނަންހާމަކޮށްފައިވާ މި ޑްރަގް، އިންޖެކްޝަންގެ ޒަރީއާއިން ދުވާލަކު އެއްފަހަރު ދެވުނު މީދާތަކުގެ ތެރެއިން 90 އިންސައްތަ މީދަލުގެ ކިބައިން ރިސަރޗަރުން އެދުނު ނިޝާންތައް ފެނިފައިވެއެވެ. މިއާއެކު މިއީ ވަރަށް "އެކްސައިޓިންގ" ހޯދުމެއްކަމަށާއި މިއަންނަ އަހަރާއި ހަމައިންވެސް އިންސާނުންނަށް ކްލިނިކަލް ޓްރަޔަލްތައް ފެށުމަށް އުންމީދު ކުރާކަމަށް މާހިރުން ބުނެފައިވެއެވެ.

އިނގިރޭސި ވިލާތުގައި އަހަރެއްގެ މައްޗަށް 100،000 މީހުން ހާޓް އެޓޭކް ޖެހިގެން ހޮސްޕިޓަލްގައި އެޑްމިޓް ކުރެވެއެވެ. އަދި އެމެރިކާގައި އަހަރަކު 800،000 މީހުން ހާޓް އެޓޭކް ޖެހިގެން އެޑްމިޓްކުރެވޭ ކަމަށްވެއެވެ. މީގެ ތެރެއިން ހަތަރުބައިކުޅައެއްބައި މީހުން އަހަރެއްހާ ދުވަސްފަހުން ހިތް ހުއްޓިގެން މަރުވެއެވެ. އަދި ގިނަ މީހުން ހާޓް އެޓޭކްއަކަށް ފަހު 8 އަހަރަށްވުރެ ގިނަ ދުވަހު ދުނިޔޭގައި ނުތިބޭކަމަށް ވެއެވެ. މިހެން ދިމާވަނީ ހާޓް އެޓޭކްއަކުން ހިތަށާއި ހިތުގެ ނާރުތަކާއި ލޭހޮޅިތަކަށް ލިބޭ ގެއްލުން ރަނގަޅުނުވެ ހާލަތު އިތުރަށް ގޮސްވަމުން ދާތީއެވެ. މިކަމަށް ފަރުވާ ކުރުމަށް ދެވޭ ބޭސް އަދި މާ ގިނަނޫންއިރު، ލޭހޮޅިތައް ފިތުނަ ނުދިނުމަށް ގިނަ މީހުންނަށް ދެވޭ ފަރުވާއަކީ ސްޓެންޓެއް ލެއްވުމެވެ.

ޖަރނަލް އޮފް ކްލިނިކަލް އިންވެސްޓިގޭޝަންގައި ޝާއިއުކޮށްފައިވާ ދިރާސާ ރިޕޯޓްގައި ރިސަރޗަރުން ބުނެފައިވާ ގޮތުގައި މިއައު ހޯދުމުގެ ސަބަބުން ވަރަށް ބޮޑަށް އުންމީދުވަނީ އައުވެގެން ގޮސްފައެވެ. އަދި މިއީ މިކަމަށް އިންތިޒާރު ކުރި ފަރާތްތަކުން އެދިއެދި ތިބި "ގޭމް ޗޭންޖަރ" ނުވަތަ ކަންކަން ބަދަލު ކޮށްލާނެ ފަރުވާއަކަށް ވެގެންދާނެއެވެ.

ރިސަރޗަރުންގެ ޓީމުން ބުނެފައިވާ ގޮތުގައި މި ޑްރަގަކީ މިހާރުވެސް ކެންސަރު ފަރުވާއެއްގެ ގޮތުގައި ބޭނުން ކުރަން ހުއްދަ ކުރެވިފައިވާ ޑްރަގަކަށް ވާއިރު، މިތަހުލީލުތަކުގައި އިންސާނުންނަށް ދިނުމުގެ ހުއްދަ ލިބޭނެ ކަމަށް ވަރަށް ބޮޑަށް އުންމީދު ކުރެވެއެވެ.

މައުލޫމާތު : މެއިލް އޮންލައިން/ހެލްތު