ޕެރިސް ސެއިންޓް ޖާމަން (ޕީއެސްޖީ)ގެ ރައީސް ނާސިރު އެލް-ހެއްލާފީގެ އިންޒާރެއް ބައެއް ކުޅުންތެރިންނަށް ފޮނުވައިފިއެވެ.
އޭނާ ބުނީ ކުރިއަށް އޮތް ސީޒަނުގައި ޕީއެސްޖީން ނުކުންނާނީ ބޮޑު ޕްރޮޖެކްޓަކާއެކު ކަމަށެވެ. އެހެންކަމުން ޕީއެސްޖީގެ ވިސްނުން ވަރަށް ސާފުކަމަށެވެ. އޭނާ ބުނީ ޕީއެސްޖީގެ ޕްރޮޖެކްޓުގައި ނިހިމެނޭ ކުޅުންތެރިން ޖެހޭނީ މި ސީޒަނުގައި ޓީމު ދޫކޮށް ދާން ކަމަށެވެ. އަދި އެ ކުޅުންތެރިންނަށް އެނޫން އެހެން ގޮތެއް ނޯންނާނެކަމަށެވެ. މީގެ އިތުރުން އޭނާ ބުނީ ބައެއް ކުޅުންތެރިން ހާލަތުގެ ބޭނުން ހިފައިފިކަމަށެވެ. އަަދި މިހާރު އެކަން ނިމިއްޖެ ކަމަށާއި، ދެން އެކަން އެގޮތަށް ނުވާނެ ކަމަށެވެ. މިފަދައިން އޭނާ ވާހަކަ ދެއްކި ނަމަވެސް، ވަކި ކުޅުންތެރިއެއް ނުވަތަ ކުޅުންތެރިންގެ ނަންތަކެއް ބުނެފައެއް ނުވެއެވެ.
ނާސިރު ބުނީ ނޭމާ ޖޫނިއަރ ޕީއެސްޖީގެ ޕްރޮޖެކްޓުގައި ހިމެނޭތޯ ނުވަތަ ނޫންތޯއާ ބެހޭ ގޮތުން ޕަބްލިކްގައި ވާހަކަ ނުދެއްކޭނެ ކަމަށެވެ. އަަދި ބައެއް ކުޅުންތެރިން އަންނާނެ ކަމަށާއި، ހަމަ އެއާއެކު ބައެއް ކުޅުންތެރިން ކުލަބް ދޫކޮށްލާނެ ކަމަށް އޭނާ ވަނީ ބުނެފައެވެ. އަދި އެއީ ސިއްރު މަޝްވަރާތަކެއް ކަމަށް ވެސް އޭނާ ވަނީ ބުނެފައެވެ.
މީގެ އިތުރުން ޒިނެދީން ޒިދާންއާ ގުޅޭ ގޮތުން އޭނާ ބުނީ ޒިދާން އަކީ އޭނާ ވަރަށް ގަޔާވާ ކޯޗެއްކަމަށެވެ. ނަމަވެސް، ޕީއެސްޖީން ޒިދާން ހޯދުމުގެ ގޮތުން އެއްވެސް ވާހަކަތަކެއް ނުދައްކާ ކަމަށެވެ. އިތުރަށް އޭނާ ބުނީ ގިނަ ކުލަބުތަކުގެ އިތުރުން ގައުމީ ޓީމުން ވެސް ޒިދާންއަށް ޝައުގުވެރިކަން ހުރި ނަމަވެސް، ޕީއެސްޖީގެ ނެތް ކަމަށެވެ. ނާސިރު ބުނީ ކޯޗެއްގެ ގޮތުގައި ގަލްޓިއާ ހަމަޖެއްސުމަށްޓަކައި ޕީއެސްޖީން އަންނަނީ ނީސްއާ މަޝްވަރާކުރަމުން ކަމަށެވެ. އެއީ ސިއްރުކަމެއް ނޫންކަން ފާހަގަކޮށް އޭނާ ބުނީ، އޭނާގެ އުންމީދަކީ ވީ އެންމެ އަވަސް މުއްދަތެއްގައި އެއްބަސްވުމަކަށް އާދެވުން ކަމަށެވެ.
