ކ. މާލެ
|
22 ޖޫން 2022 | ބުދަ 07:02
އިންޓަރނޭޝަނަލް ޔޯގާ ޑޭ ރާއްޖޭގައި ފާހަގަކުރުމަށް ބޭއްވި ޙަރަކާތުގެ ތެރެއިން ހިންގި ހަމަނުޖެހުން
އިންޓަރނޭޝަނަލް ޔޯގާ ޑޭ ރާއްޖޭގައި ފާހަގަކުރުމަށް ބޭއްވި ޙަރަކާތުގެ ތެރެއިން ހިންގި ހަމަނުޖެހުން
ރާއްޖެއެމްވީ
ޔޯގާ ހަރަކާތުގައި ހަމަނުޖެހުން ހިންގުން
ޔޯގާ ހަރަކާތް ހުއްޓުވަން ހިންގި ހަމަނުޖެހުން ފަތުރުވެރިކަމުގެ ދާއިރާގެ ބައެއް ޖަމިއްޔާތަކުން ކުށްވެރިކޮށްފި
 
ފަތުރުވެރިކަމުގެ ދާއިރާގެ 3 ޖަމިއްޔާއަކުން ވަނީ ހަމަނުޖެހުމާއި ގުޅިގެން ކަންބޮޑުވުން ފާޅުކޮށްފައި
 
ރާއްޖެ ފަދަ ޤައުމެއްގައި ގާނޫނާ ޚިލާފުވެ މީހުންނަށް ހަމަލާދެވިގެން ނުވާނެ ކަމަށް ބުނެފައިވޭ
 
ޔޯގާ ހަރަކާތް ހުއްޓުވުމަށް ބަޔަކު ވަނީ ގަލޮޅު ދަނޑަށް ވަދެ ހަމަނުޖެހުން ހިންގާފައި

އަންގާރަ ދުވަހުގެ ހެނދުނު ގަލޮޅު ދަނޑުގައި ކުރިއަށްދިޔަ ޔޯގާ ހަރަކާތް ހުއްޓުވުމަށް ހިންގި ހަމަނުޖެހުމާމެދު ރާއްޖޭގެ ފަތުރުވެރިކަމުގެ ދާއިރާގެ ބައެއް ޖަމިއްޔާތަކުން ކަންބޮޑުވުން ފާޅުކޮށްފިއެވެ.

އެގޮތުން ނޭޝަނަލް ބޯޓިން އެސޯސިއޭޝަނާއި މަޓާޓޯ އާއި ނޭޝަނަލް ހޮޓެލްސް އެންޑް ގެސްޓްހައުސް އެސޯސިއޭޝަނާއި ގުޅިގެން އަންގާރަ ދުވަހު ވަނީ ބަޔާނެއް ނެރެފައެވެ. މި ބަޔާނުގައި ބުނީ ފަތުރުވެރިކަމުގެ މެހެންމާންދާރީގައި ދުނިޔޭގެ އެންމެ ބޮޑު އެއް ޤައުމުގެ ގޮތުގައި ރާއްޖެ ފާހަގަ ކުރެވޭއިރު، އެހެން ޤައުމުތަކުގެ ސަގާފަތާއި ވެލްނެސްއާ ގުޅުންހުރި ކަންކަމުގައި އެއްބާރުލުން ދޭން ޖެހޭ ކަމަށެވެ. އަދި ޔޯގާއަކީ ސިއްހީ ގޮތުން ރަނގަޅު ކަމެއް ކަމަށާއި ރާއްޖޭގެ ގެތަކުގައި ޔޯގާކުރާކަމަށް މި ބަޔާނުގައި ވަނީ ބުނެފައެވެ.

ޔޯގާއަކީ ޖިސްމާނީ ގޮތުންނާއި ނަފްސާނީ ގޮތުން މީހާ ދުޅަހެޔޮ ސިއްހަތެއްގައި ހުންނަން ބާރުދޭ ހަރަކާތެއް ކަމަށާއި ފަތުރުވެރިކަމަށް ބަރޯސާވެފައި އޮތް ޤައުމެއްގައި ޤަނޫނާއި ގަވާއިދާ ޚިލާފަށް މީހުންނަށް އަނިޔާކުރުން ފަދަ އެއްވެސް އަމަލެއް ވިޔަ ދީގެން ނުވާނެ ކަމަށް މިބަޔާނުގައި ވަނީ ބުނެފައެވެ. އަދި އެއްވެސް ކަމަކާ ކަންބޮޑުވުމެއް އޮތް ނަމަ އެކަން ކަމާބެހޭ ފަރާތްތަކަށް އަންގައި ގާނޫނާ އެއްގޮތަށް އެކަމެއް ހައްލު ކުރުމަށް ވެސް ވަނީ ބުނެފައެވެ.

ނޭޝަނަލް ބޯޓިން އެސޯސިއޭޝަނާއި މަޓާޓޯ އާއި ނޭޝަނަލް ހޮޓެލްސް އެންޑް ގެސްޓްހައުސް އެސޯސިއޭޝަނުން ވަނީ ފަތުރުވެރިކަމާއި ގުޅުންހުރި ވިޔަފާރިތަކުގައި އެ ޖަމިއްޔާތަކުން ދީނާއި ސަގާފަތައް ހުރުމަތްތެރިކޮށް ހިތާނެ ކަމުގެ ޔަގީންކަން ދޭކަމަށް މިބަޔާނުގައި ބުނެފައެވެ. އަދި ދިވެހިންގެ އިހުސާސުތަކަށް ވެސް ހުރުމަތްތެރިކޮށް ހިތާނެ ކަމަށާއި މިއާއެކު ރާއްޖޭގައި ފަތުރުވެރިކަން އިތުރަށް ފުޅާ ކުރެވެން ހުރި ކަންކަން ކުރުމަށް ސަރުކާރާއި ގުޅިގެން މަސައްކަތް ކުރަމުންދާނެ ކަމަށް ވެސް އެ ބަޔާނުގައި ވަނީ ބުނެފައެވެ.

އަންގާރަ ދުވަހުގެ ހެނދުނު ކުރިއަށްދިޔަ ޔޯގާ ހަރަކާތް ހުއްޓުވުމަށް އެއްވި މީހުން ވަނީ ގަލޮޅު ދަނޑަށް ވަދެ އެތަނުގައި ހަމަނުޖެހުން ހިންގައިފައެވެ. މިކަން ސަރުކާރުންނާއި ސިޔާސީ ޕާޓީތަކާއި ފަތުރުވެރިކަމުގެ ދާއިރާގެ ފަރާތްތަކުން ވެސް ދަނީ ކުށްވެރި ކުރަމުންނެވެ.

އެންމެ ފަހުން އަޕްޑޭޓް ކުރީ: 4 ހަފްތާ ކުރިން
ރިވިއު ކުރީ: މަރްޔަމް ދާނިޝް ނަޝީދު
17%
33%
0%
33%
0%
17%
ކޮމެންޓް