ޔޯގާ ޙަރަކާތް ހުއްޓުވަން ހިންގި ހަމަނުޖެހުމާއި ސަލަފް ޖަމިއްޔާއާ ގުޅުމެއް ނެތްކަމަށް އެ ޖަމިއްޔާއިން ބުނެފިއެވެ.

ސަލަފް ޖަމިއްޔާއިން އެހެން ބުނެފައިވަނީ އިންޓަރނޭޝަނަލް ޔޯގާ ޑޭ ފާހަގަކުރުމުގެ ގޮތުން ބޭއްވި ޙަރަކާތުގެ ތެރެއިން ހިނގި ހަމަނުޖެހުންތަކާއި ގުޅޭގޮތުން ޔޫތު މިނިސްޓަރު އަހުމަދު މަހުލޫފު ދެއްކެވި ވާހަކަފުޅާއި ގުޅިގެންނެވެ.

ރާއްޖެއެމްވީއާ ވާހަކަފުޅު ދައްކަވަމުން މަހުލޫފު ވިދާޅުވީ، ޕީޕީއެމްގެ އިސް ސަފުގައި މަސައްކަތް ކުރާ ފަރާތްތަކާއި، ސަލަފް ޖަމިއްޔާގެ ފަރާތުންވެސް މިއަދުގެ ހަމަނުޖެހުމުގައި ޙަރަކާތްތެރިވެފައިވާ ކަމަށެވެ. މަހުލޫފު ވަނީ ސަލަފް ޖަމިއްޔާއަކީ ވެރިކަމަށް އައުމަށް މަސައްކަތް ކުރަމުންދާ ސިޔާސީ ޕާޓީއެއްކަމަށް ވިދާޅުވެފައެވެ.

އެކަމާ ގުޅޭގޮތުން ސަލަފް ޖަމިއްޔާއިން ނެރުނު ބަޔާނެއްގައި ބުނީ، އެ ޙަރަކާތް ސަލަފް ޖަމިއްޔާއާ ގުޅުވައި މިނިސްޓަރު މަހުލޫފު ދެއްކެވި ވާހަކަފުޅު ހަރުކަށި އިބާރާތުން ކުށްވެރިކުރާ ކަމަށެވެ. ވަކިން ޚާއްސަކޮށް މަދަނީ ޖަމިއްޔާތަކުގެ ބެލެނިވެރިކަމުގެ މަޤާމުގައި ހުންނަވާ، ކަމުގެ ޙަޤީޤަތް ބެއްލެވުމެއް ނެތި އެފަދަ ވާހަކައެއް ދެއްކެވުމަކީ ޒިންމާދާރުކަން ކުޑަ ކަމެއްކަމަށް އެ ޖަމިއްޔާއިން ފާހަގަކޮށްފައިވެއެވެ.

ސަލަފް ޖަމިއްޔާއިން ވަނީ ރާއްޖޭގައި ޔޯގާގެ ކަންކަން ހިންގަން ފެށި ހިސާބުން އެކަމުގެ ޙުކުމްތަކާމެދު ރައްޔިތުން ހޭލުންތެރި ކުރުވުމަށް މަސައްކަތް ކުރި ނަމަވެސް، އަމަން އަމާންކަން ނަގާލުމާއި، ދައުލަތާއި ފަރުދުންގެ މުދަލަށް ގެއްލުން ދިނުމަކީ އެ ޖަމިއްޔާއިން ބާރުއަޅާ ކަމެއް ނޫންކަން ފާހަގަ ކޮށްފައެވެ.

އޭގެ އިތުރުން، އެ ޙަރަކާތަކީ ޖަމިއްޔަތު ސަލަފާއި ގުޅުންހުރި ޙަރަކާތެއް ނޫންކަމަށް އެކަން ހިނގުމުގެ ކުރިންވެސް މީޑިއާ ސްޓޭޓްމަންޓެއްގައި ބަޔާންކޮށް އާންމުކޮށްފައިވާނެ ކަމަށް އެ ޖަމިއްޔާއިން ވަނީ ފާހަގަކޮށްފައެވެ.

ބައިނަލްއަގުވާމީ ޔޯގާ ޑޭ ފާހަގަކުރުމަށް ގަލޮޅު ރަސްމީ ދަނޑުގައި ޔޯގާ ހަދަން ތިބި މީހުންނަށް ހަމަލާދިން މީހުން ބޭނުންކުރި ހުދު ކުލައިގެ ދިދަ ނެރުނީ ޕީޕީއެމް އޮފީހުންކަން ވަނީ ހާމަވެފައެވެ.

ސޯޝަލް މީޑިއާގައި އާންމުވެފައި ފޮޓޯތަކުން ފެންނަ ގޮތުން، ހުދުކުލައިގެ ދިދަތަކެއް ޕީޕިއެމްގެ އޮފީހުގައި ތައްޔާރުކޮށްފައި ހުއްޓެވެ. އަދި ގަލޮޅުދަނޑާ ދިމާލަށް ޕިކަޕްގައި ދިޔަ މީހުން ބޭނުންކުރާނެ ސައުންޑް ވެސް އެ އޮފީހުން ފޯރުކޮށްދީފައިވާކަމަށް މައުލޫމާތު ލިބެއެވެ.