ބްރެޒިލްގެ ތަޖުރިބާކާރު ލެފްޓް ބެކް މާސެލޯ ހޯދުމުގެ މަސައްކަތް އޭސީ މިލާނުން ކުރާ ކަމަށް މީޑިއާ ރިޕޯޓުތައް ބުނެފިއެވެ.

މާސެލޯ ވަނީ އޭނާ ރެއާލާއެކު ހަދާފައިވާ އެއްބަސްވުމުގެ މުއްދަތު ހަމަވުމުން އެ ކުލަބް ދޫކޮށްލަން ނިންމާފައެވެ. ރެއާލް ދޫކޮށްލަން ނިންމުމަށްފަހު މާސެލޯ ބުނީ ކުޅުން ހުއްޓާލީ ނޫން ކަމަށެވެ. މާސެލޯ ބުނީ އަދިވެސް އޭނާ ކޮންމެވެސް ކުލަބަކުން ފެންނާނެ ކަމަށެވެ.

މީޑިއާ ރިޕޯޓުތައް ބުނާ ގޮތުގައި އިޓަލީގެ ޗެމްޕިއަން މިލާނުން ވަނީ މާސެލޯ ހޯދުމަށް އެދި އޭނާއަށް ހުށަހެޅުމެއް ހުށަހަޅާފައެވެ. އަދި ރިޕޯޓުތައް ބުނާ ގޮތުގައި މިލާނުން މާސެލޯއަށް ހުށަހެޅީ ދެ އަހަރު ދުވަހުގެ ކޮންޓްރެކްޓެކެވެ. އެއީ މުސާރައިގެ ގޮތުގައި އޭނާއަށް އަހަރަކު 3.1 މިލިއަން ޑޮލަރުގެ މުސާރައިގެ ކޮންޓްރެކްޓެކެވެ.

އުމުުރުން 34 އަހަރުގެ މާސެލޯ އޭނާގެ ސީނިއަރ ކެރިއަރު ފެށީ ބްރެޒިލްގެ ފްލުމިނެންސޭއިންނެވެ. އެ ޓީމު ދޫކޮށް އޭނާ ރެއާލަށް ގުޅުނީ 2007 ވަނަ އަހަރުއެވެ. އޭގެ ފަހުން މާސެލޯ ވަނީ ރެއާލާއެކު ހޭދަކުރި 15 އަހަރުގެ ތެރޭގައި އެ ޓީމަށް 546 މެޗު ކުޅެދީ 38 ލަނޑު ޖަހާފައެވެ. އޭނާ ވަނީ ރެއާލާއެކު 25 ތައްޓެއް ހޯދާފައެވެ. އޭގެ ތެރޭގައި ސްޕެނިޝް ލީގާއި، ކޮޕާ ޑެލްރޭ، ސްޕެނިޝް ސުޕަ ކަޕް، ޔުއެފާ ޗެމްޕިއަންސް ލީގު ޔުއެފާ ސުޕަ ކަޕް އަދި ފީފާ ކުލަބް ވޯލްޑް ކަޕް ހިމެނެއެވެ.

މާސެލޯ ވަނީ 2006 ވަނަ އަހަރުން ފެށިގެން 2018 ވަނަ އަހަރާ ހަމަޔަށް ބްރެޒިލްގެ ގައުމީ ޓީމަށް ވެސް ކުޅެފައެވެ. ގައުމީ ޓީމަށް ކުޅެދިން 58 މެޗުގައި މާސެލޯ ވަނީ ހަ ލަނޑު ޖަހާފައެވެ. އޭނާ ވަނީ ގައުމީ ޓީމާއެކު 2013 ވަނަ އަހަރުގެ ފީފާ ކޮންފެޑެރޭޝަން ކަޕް ކާމިޔާބުކޮށްފައެވެ.