އައިލެންޑް އޭވިއޭޝަން ސަރވިސްއަށް ކުރިމަތިވެފައިވާ މާލީ ހާލަތުގެ ސަބަބުން ޤައުމީ އެއަރލައިން، މޯލްޑިވިއަންގެ ސަލާމަތާއި ރައްކާތެރިކަން ކަށަވަރުކުރުމަށް ސަރުކާރަށް ގޮވާލާ މާވަށު ދާއިރާގެ މެންބަރު މުހައްމަދު ސައީދު ހުށަހަޅާފައިވާ ކުއްލި މައްސަލަ ބޭރުކޮށްލައިފިއެވެ.
މާވަށު ދާއިރާގެ މެންބަރު މުހައްމަދު ސައީދު ހުށަހެޅުއްވި ކުއްލި މައްސަލައިގައި ބުނެފައިވަނީ ދިވެހިރާއްޖޭގެ ޤައުމީ އެއަރލައިން މޯލްޑިވިއަން ހިންގާ އައިލޭންޑް އޭވިއޭޝަންގެ ހިންގުން ބޮއްސުންލައި ކުންފުނީގެ މާލީ ހާލަތު މިއިން ޒަމާނެއްގައި ދަށަށް ނުދާހާ ދަށަށް ގޮސް ކުންފުނި ބަގުރޫޓްވެދާނެ ކަމަށެވެ. އަދި 2020 ވަނަ އަހަރު ކުންފުންޏަށް 400 މިލިއަން ރުފިޔާގެ ގެއްލުންވެފައިވާ ކަމަށް އޮޑިޓް ރިޕޯޓުން ހާމަވާއިރު، 2021 ވަނަ އަހަރު ވެސް އެ ކުންފުންޏަށް 159 މިލިއަން ރުފިޔާގެ ގެއްލުންވެފައިވާ ކަމަށެވެ.
މީގެ އިތުރުން ކުންފުނިން މިއިން ޒަމާނެއްގައި ދަރަނިވެރި ނުވާ މިންވަރަށް ދަރަނިވެރިވެ، ސްޓޭޓް ބޭންކް އޮފް އިންޑިއާއިން 2020 ވަނަ އަހަރު މޯލްޑިވިއަން އަށް 17.3 މިލިއަން ރުފިޔާގެ ލޯނެއް ނަގައި، މައި ކުންފުނި އައިލެންޑް އޭވިއޭޝަނަށް އެސްބީއައި އިން ދޫކޮށްފައިވާ އޯވަރ ޑްރާފްޓް ފެސިލިޓީގެ ދަރަނި 46.2 މިލިއަން ރުފިޔާއަށް އިތުރުކޮށްފައިވާ ކަމަށެވެ. އަދި މި ލޯނުތައް ނެގުމަށް މޯލްޑިވިއަންގެ 6 މަތިންދާބޯޓު ރަހުނުކޮށްފައިވާތީ އެމްއޭސީއެލްއަށް ވެސް 50 މިލިއަނަށްވުރެ ގިނަ ރުފިޔާ ދައްކަން ޖެހިފައިވާތީއާއި މިހާރުވެސް ކުންފުނީގެ މުވައްޒަފުންނަށް މުސާރަ ދެނީ ކޮންމެ މަހަކު މިނިސްޓްރީން 15 މިލިއަނާއި 18 މިލިއަންގެ ލޯނު ނަގައިގެން ކަމަށެވެ.
ކުންފުނީގެ ހާލަތު މިހާ ދަށު ދަރަޖައަށް ވެއްޓުމުގެ ސަބަބުން މޯލްޑިވިއަންގެ މަތިންދާބޯޓުގައި ޓެކްނިކަލް ގޮތުން ބައިނަލްއަގުވާމީ މިންގަނޑުތައް ދަމަހައްޓަންޖެހޭ އަދި ހިފަހައްޓަންޖެހޭ ކަންކަން ނުހިފެހެއްޓި ފަހަކަށް އައިސް މަތިންދާ ބޯޓުތަކަށް ގިނަ ޓެކްނިކަލް މައްސަލަތައް ދިމާވަމުންދާތީއާއި، މަތިންދާ ބޯޓުގެ ޓަޔަރުތައް ވެސް ބަދަލުކުރަންޖެހޭ މުއްދަތަށް ބަދަލު ނުކުރެވި ބައެއް ބޯޓުތައް ސްޕެއަރ ނުލިބި ގްރައުންޑް ކުރުމުގެ މައްސަލަތައް ދިމާވަމުންދޭމާވަށު ދާއިރާގެ މެންބަރު މުހައްމަދު ސައީދު
ސައީދު ހުށަހެޅުއްވި ކުއްލި މައްސަލައިގައި އިތުރަށް ވިދާޅުވެފައިވަނީ، މޯލްޑިވިއަން އަކީ ގިނަ އަދަދެއްގެ ދިވެހި ރައްޔިތުންނާއި، ފަތުރުވެރިން ދަތުރުކުރާ އެއަރލައިންއެއް ކަމަށްވާތީ، މި ކަންކަމުގެ ސަބަބުން ކުރިމަތިވެދާނެ ނުރައްކަލަކުން ސަލާމަތްވެ ތިބުމަށްޓަކައި ކުންފުނީގެ މަތިންދާ ބޯޓުތަކުގައި ހުންނަންޖެހޭ ސަލާމަތީ މިންގަނޑުތައް ހިފެހެއްޓުމާއި ދަތުރުވެރިންގެ ސަލާމަތާއި ރައްކާތެރިކަން ކަށަވަރުކުރުމަށް ސަރުކާރަށް ގޮވާލާ، ރައްޔިތުންގެ މަޖިލީހުގެ ގަވާއިދުގެ 170 ވަނަ މާއްދާގެ ދަށުން ކުއްލި މައްސަލަ ހުށަހަޅުއްވާ ކަމަށެވެ.
ކުއްލި މައްސަލައަށް ބަހުސްކުރުމަށް ފެނޭތޯ ވޯޓަށް އެހުމުން، މަޖިލީހުގެ ތަޅުމުގައި ތިއްބެވި 38 މެންބަރުންގެ ތެރެއިން 33 މެންބަރުން ވަނީ މި މައްސަލައަށް ބަހުސްކުރަން ނުފެންނަކަމަށް ވޯޓު ދެއްވާފައެވެ. މި މައްސަލައަށް ބަހުސްކުރުމަށް ފެންނަ ކަމަށް ވޯޓު ދެއްވީ 5 މެންބަރުންނެވެ. އެހެންކަމުން މި ކުއްލި މައްސަލަ ބަލައި ނުގަނެ ވަނީ ބޭރުކޮށްލާފައެވެ.
