ތަސްލީމާއި އަލިމަނިކަށް ކުރާ ދައުވާ: 2 ހެއްކެއްގެ ހެކިބަސް ނަގައިފި
15 ޖޫން 2022 | ބުދަ 08:15ހެކިބަސް ނެގީ ވީޑިއޯ ނުފެންނާނެހެން ދައުވާލިބޭ ފަރާތްތަކާއި ވަކި މަޖިލީހެއްގައި
ހއ. މޮޅަދޫ، ބަހާރުގެ، ޢަބްދުﷲ ޢަލީމަނިކާއި، ހއ.ހޯރަފުށި، އަލަނާސިގެ، މުޙައްމަދު ތަސްލީމް
6 މޭ 2021 ދުވަހުގެ ރޭ ރައީސް މުޙައްމަދު ނަޝީދަށް އަމާޒުކޮށްދިން ހަމަލާއާއި ގުޅިގެން ހިންގި ތަހުގީގުތަކަށްފަހު، ޓެރަރިޒަމާއި ގުޅޭ ދައުވާތަކެއް އުފުލާފައިވާ ހއ. މޮޅަދޫ، ބަހާރުގެ، ޢަބްދުﷲ ޢަލީމަނިކާއި، ހއ.ހޯރަފުށި، އަލަނާސިގެ، މުޙައްމަދު ތަސްލީމްގެ މައްޗަށް ކުރާ ދައުވާގެ އަޑުއެހުމެއް ބުދަ ދުވަހު ކުރިއަށް ގެންގޮސްފިއެވެ.
މި މައްސަލަ މައުޟޫއީ ގޮތުން ކުރިއަށް ގެންދެވޭނެ ކަމަށް ކަނޑައަޅުއްވާފައިވާތީ މި މައްސަލައިގެ ޝަރީއަތުގެ މަރުޙަލާ ފަށާފައިވަނީ 31 މާރޗު 2022 ގައެވެ. ކްރިމިނަލް ކޯޓުގައި މި މައްސަލަ ބައްލަވަނީ ގާޒީ އަލީ އާދަމްއެވެ.
މި މައްސަލައިގައި ބުދަ ދުވަހު އޮތް އަޑުއެހުމަކީ ހެކިބަސް ނެގުމަށް ބޭއްވި އަޑުއެހުމެވެ. މި އަޑުއެހުމުގައި ޕޮލިސް އިންޓެލް ރިޕޯޓު ތައްޔާރު ކުރެއްވި އޮފިސަރުގެ އިތުރުން މޯބައިލް ފޮރެންސިކް ރިޕޯޓު ތައްޔާރު ކުރެއްވި އޮފިސަރެއްގެ ހެކިބަސް ނެގުމަށް އޮތީ ތާވަލު ކުރެވިފައެވެ.
މި އަޑުއެހުމުގައި ދައުލަތުން ވަނީ ހެކިވެރިޔާ ނުފެންނާނެހެން އޭނާގެ ހެކިބަސް ނެގުމަށް އެދިލައްވާފައެވެ. އެގޮތުން ވީޑިއޯ ނުފެންނާނެހެން ދައުވާލިބޭ ފަރާތްތަކާ ވަކި މަޖިލީހެއްގައި ހެކިބަސް ނެގުމަށް ދައުލަތުން އެދުނެވެ.
އެންމެ ފުރަތަމަ މި މައްސަލައިގެ އިންޓެލިޖެންސް ރިޕޯޓު ތައްޔާރު ކުރެއްވި އޮފިސަރުގެ ހެކިބަސް ވަނީ ނަގާފައެވެ.
އޭނާ ހެއްކެއްގެ ގޮތުގައި ހުށައަޅާފައިވަނީ ތަސްލީމާއި އަލީމަނިކަކީ އައިސިސްއަށް ތާއީދުކުރާ ބައެއް ކަމަށާއި، ހަރުކަށި ފިކުރު ފަތުރައި، އެފަދަ މީހުންނާއި އެ ދެމީހުންވެސް ގުޅުން ބާއްވާކަން ސާބިތު ކޮށްދިނުމަށެވެ.
ހެކިވެރިޔާ ވިދާޅުވީ، އަބްދުﷲ އަލީމަނިކަކީ ދީނީ ހަރުކަށި ފިކުރު ފަތުރައި، އެކަމުގައި އިސް ދައުރެއް އަދާކުރާ މީހެއް ގޮތުގައި ފާހަގަވެފައިވާ ކަމަށާއި، ހިމަންދޫގައި ހިނގާ ދިޔަ ކަންކަން ލީޑު ކުރުމުގައިވެސް އިސްކޮށް ޙަރަކާތްތެރިވެފައިވާ ކަމަށެވެ.
އޭނާ ޖަލުގައި ޙުކުމް ތަންފީޒު ކުރަމުންދިޔައިރު ޖަލު ތެރެއިން މީހުން ރެކްރޫޓު ކުރުމުގެ މަސައްކަތްވެސް ކޮށްފައިވާ ކަމަށާއި، ޖަލުން މިނިވަންވެ މާލޭގައިވެސް އެ ފިކުރު ޕްރޮމޯޓު ކުރުމަށް މަސައްކަތް ކޮށްފައިވާކަމަށް ހެކިވެރިޔާ ވިދާޅުވިއެވެ.
ހެކިވެރިޔާ ވިދާޅުވީ، ބައެއް ކެފޭތަކާއި، ހުސް މައިޒާންތަކާއި، މިސްކިތްތަކުގެ އިތުރުން، ހަރުކަށި ފިކުރާ ގުޅުންހުރި ފަރާތްތަކުގެ ގޭގޭގައިވެސް އެ ފިކުރު ޕްރޮމޯޓް ކުރުމަށް ދަރުސް ދިނުމުގެ ކަންކަން އަބްދުﷲ އަލީމަނިކު ކޮށް އުޅޭ ކަމަށެވެ. އެ ދަރުސްތަކުގައި ބައެއް ފަހަރު 10 މީހުން ބައިވެރިވެފައިވާކަމަށް ހެކިވެރިޔާ ވިދާޅުވިއެވެ.
އެ ދަރުސްތަކުގައި އާންމު ގޮތެއްގައި ބައިވެރިވާ ފަރާތްތައްވެސް ފާހަގަ ކުރެވިފައިވާކަމަށް އޭނާ ވިދާޅުވިއެވެ.
އޭގެ އިތުރުން، ހުޅުމާލޭގައި ފަތުރުވެރިންތަކަކަށް ދިން ޙަމަލާއަކީ އަބްދުﷲ އަލީމަނިކުގެ ދަރިން ދައުލަތަށް ނެގުމުން އެކަމުގެ ބަދަލު ހިފުމުގެ ގޮތުން ކޮށްފައިވާ ކަމެއްކަން އިންޓެލްއަށް ކަށަވަރު ކުރެވިފައިވާކަމަށްވެސް ހެކިވެރިޔާ ވިދާޅުވިއެވެ.
އެ ޙަމަލާ ދިނުމަށް އަބްދުﷲ އަލީމަނިކު އިރުޝާދު ދީފައިވާކަމަށް ހެކިވެރިޔާ ވިދާޅުވިއެވެ.
އެހެންކަމަށްވާނަމަ، އަބްދުﷲ އަލީމަނިކު ހައްޔަރު ނުކުރީ ކީއްވެތޯ އޭނާ ވަނީ ހެކިވެރިޔާއާ ސުވާލު ކޮށްފައެވެ. އެހެންނަމަވެސް އެ ސުވާލަށް ހެކިވެރިޔާ ވަކި ޖަވާބެއް ދެއްވާފައެއް ނުވެއެވެ.
ދެން ކުރިއަށްދިޔައީ ތަސްލީމަށް ކުރާ ދައުވާއާ ގުޅިގެން ހެކިވެރިޔާއާ ސުވާލު ކުރުމެވެ. ހެކިވެރިޔާ ވިދާޅުވީ ތަސްލީމްގެ ޙަރަކާތްތައް ފާހަގަވެގެން އައީ 2015 އިން ފެށިގެން ކަމަށެވެ.
ތަސްލީމަކީ އައިއީޑީ ފަދަ ތަކެތި ތައްޔާރުކުރުމުގެ މެނުއަލް ގެންގުޅެމުންދިޔަ ފަރާތެއްގެ ގޮތުގައި ފާހަގަވެފައިވާކަމަށް އެ ހެކިވެރިޔާ ވިދާޅުވިއެވެ. އަދި މާލޭގެ އެކި ތަންތަނުގައި އައިއީޑީ ބޭނުންކޮށްގެން ގޮއްވާލުމަށް މަސައްކަތް ކުރި މައްސަލައިގައިވެސް އެންމެ އިސްކޮށް އުޅުނު އެއް ފަރާތަކީ އޭނާކަމަށް ހެކިވެރިޔާ ވިދާޅުވިއެވެ.
އޭނާއަކީ ހަރުކަށި ފިކުރަށް މީހުން ލެންބުވުމަށް މަސައްކަތް ކުރާ މީހެއްކަމަށްވެސް ހެކިވެރިޔާ ވިދާޅުވިއެވެ.
ދެން ހިމެނެނީ ހަމައެކަނި އަބްދުﷲ އަލީމަނިކާ ގުޅިގެން ހުށައެޅި ހެއްކެކެވެ. އެއީ މޯބައިލް ފޮރެންސިކް ރިޕޯޓު ތައްޔާރުކުރެއްވި އޮފިސަރެވެ. މި އަޑުއެހުމުގައި އޭނާގެ ހެކިބަސްވެސް ވަނީ ނަގާފައެވެ.
