ޔަމަނުގެ ރެފިއުޖީންނަށް އެހީވުމުގެ މުގުލުގައިވެސް ރެފިއުޖީއެއް!

ހަނގުރާމަ ގަދަވެފައި އޮތް އުފަން ބިމާއި އާއިލާ ދޫކޮށް، އިއްޒުއްދީން މުހްސިން 2017 ވަނަ އަހަރު ފޮށިތަންމަތި ބަނދެގެން ޔަމަނުން ނުކުމެ، މިޞްރަށް މިސްރާބުޖެހީ މަތީ ތައުލީމު ހާސިލު ކުރާނެ ސްކޮލާޝިޕެއް ނުވަތަ އަދާކުރާނެ ވަޒީފާގެ ފުރުސަތެއްގެ އުއްމީދުގައެވެ.

އުމުރުން 26 އަހަރުގެ ޒުވާނާގެ އަތުގައި އެ 2 ނަސީބުވެސް ހިފިއެވެ. މިޞްރުގެ ޔުނިވާސިޓީއެއްގައި ބިޒްނަސް މެނޭޖްމަންޓްގެ ރޮނގުން ޑިގްރީ ހާސިލު ކުރަމުން، އޭނާފަދަ ރެފިއުޖީންނަށް އެހީތެރިކަން ފޯރުކޮށްދޭނެ ޖަމިއްޔާއެއްވެސް އުފެއްދިފައެވެ.

މުހުސިންގެ ޖަމިއްޔާއަކީ މިޞްރުގެ ވެރިރަށް ޤާހިރާގައި ދިރިއުޅޭ ރެފިއުޖީންނަށް، ދިރިއުޅުމުގެ އަސާސީ ހުނަރުތައް އުނގަންނައިދޭ ޖަމިއްޔާއެކެވެ. އެގޮތުން ވަޒީފާގެ މައިދާނަށް ނުކުތުމަށްޓަކާ ދިރިއުޅުމަށް ބޭނުންވާނެ ހުރިހާ ހުނަރެއް ދަސްކޮށްދެއެވެ. މުހުސިންގެ މިހާރުގެ އަމާޒަކީ، އޭނާގެ ޖަމިއްޔާއަށް އެންރޯލްވެފައިވާ މީހުންގެ ތެރެއިން ބައެއް މީހުންނަށް ވަޒީފާގެ ފުރުސަތުތައް ކަށަވަރު ކޮށްދިނުމެވެ.

7 އަހަރުވީ ހަނގުރާމައެއްގައި ސުންނާފަތި ވަމުންދާ ޔަމަނުގައި އެތައް މިލިއަން ބަޔަކަށް މިއަދު ދިރިއުޅެން މަޖުބޫރުވެފައި ވަނީ އިންތިހާ ފަގީރުކަމާއި ބަނޑުހައިހޫނުކަމުގެ އިތުރުން ބޯހިޔާވަހިކަމެއްވެސް ނެތް، ނިކަމެތި ހާލެއްގައެވެ.

ހަމަލާ ބަދަލުކުރުންތައް ހުއްޓާލުމަށް އޭޕްރިލް މަހު ވީ އެއްބަސްވުން އަދި ތަންފީޒުވަމުން ދާ ދިއުމަކީވެސް ގިނަ ބަޔަކަށް އުއްމީދުގެ ހުޅުކޮޅުގެ އަލި ގަދަވާ ސަބަބެކެވެ. ނަމަވެސް ހަގީގީ އުފާ އަދި އޮތީ މާ ދުރުގައެވެ.

ގައުމުން ބޭރުގައި ހުރި ނަމަވެސް، ގައުމު ބިނާ ކުރުމުގެ ބުރަ ޒިންމާ، އަމިއްލަ އިހުތިޔާރުގައި ކޮނޑު އަޅައިގެން ހުރި މުހުސިން، މިހާރު އޭނާގެ ހުސްވަގުތު ހޭދަ ކުރަނީ، އެއްވެސް ފީއަކާ ނުލާ، ރެފިއުޖީންނަށް އޭނާ ހިންގާދޭ ކޯސްތައް ކުރިއަށް ގެންދާނެ ކުލާސްރޫމްގެ ކުލި ދައްކާނެ ފައިސާ ހޯދުމަށް، ވަޒީފާ އަދާކުރުމުގައެވެ.