ހަނގުރާމާގައި ސުންނާފަތިވި ޔަމަނުގެ އުމްރާނީ ބިނާވެއްޓަށް ފަންނުވެރި އިންގިލާބެއް!

އެތައް އަހަރަކަށް ދިގުލާ ދިޔަ ޔަމަނު ހަނގުރާމައިގެ ތެރޭގައި، އެ ގައުމުގެ އުމްރާނީ ބިނާވެއްޓަށް ލިބުނު ގެއްލުންތަކަކީ ސީދާ ލޯ ކުރިމަތިން ހާމަވާން ހުރި ހަނގުރާމައިގެ ސީދާ އަސަރުތަކެވެ. ނަމަވެސް މިއަދު، އެ ވީރާނާކަން ބަދަލުކޮށް، ދިރުން ގެނައުމަށް ފަންނުވެރިން ދަނީ ގަދައަޅައި މަސައްކަތް ކުރަމުންނެވެ. ވެރިކަން ކުރާ ސަންއާގެ ބިނާވެށި އާރުކާޓީން ނުވަތަ އާރކިޓެކްޓުން ދަނީ، ބިނާކުރަނިވި ފަންނުވެރި ޚިޔާލުތައް ތަނަވަސްކޮށްގެން ސިޓީ އާރާސްތުކުރުމުގެ މަސައްކަތް ހަލުވި ދުވެލީގައި ކުރަމުންނެވެ. ލިބެން ހުރި މަދު ވަސީލަތްތައް ބޭނުންކޮށްގެން، ވީހާވެސް ފުރިހަމަކޮށް، ގެތަކާއި އިމާރާތްތައް މަރާމާތުކުރަމުންނެވެ. އެގޮތުން އެންމެ ފާހަގަކޮށްލެވޭ އެއް ކަމަކީ، ގަލުގައި ކަނޑާ ނަގަައި، އެކި ކަހަލަ ފަރުމާތަކެވެ.

ޔަމަނަކީ ގަލު ވަޑާމުގެ މަސައްކަތުގެ ކާމިޔާބު ދިގު ތާރީޚެއް އޮތް ގައުމެކެވެ. ގުދުރަތީ ގޮތުންވެސް ޔަމަނަކީ، އިމާރާތް ކުރުމުގެ ފަންނުވެރިކަމަށް ބޭނުންކުރާ ތަފާތު އެކި ކަހަލަ ގަލުގެ ތަނަވަސްކަން ލިބިފައިވާ ގައުމެކެވެ. ވިރިކެކޭ އަލިފާން ފިނިވެ، ގަނޑުވެގެން ހެދޭ ބަޒާލްޓް، ލައިމްސްޓޯން އަދި ގްރެނައިޑްފަދަ، އުމްރާނީ ބިނާވެށީގައި ބޭނުންކުރާ އެކި ކަހަލަ ހިލައާއި ގަލުގެ މުއްސަނދިކަން ޔަމަނަށް ލިބިގެންވެއެވެ.

ޔަމަނު އާރާސްތުކުރުމުގެ މަސައްކަތުގައި ހަރަކާތްތެރިވާ އާރކިޓެކްޓް، މުހައްމަދު ބާ-ސަލަމާ ކިޔައިދިން ގޮތުގައި، ވިލާތުގެ އިތުރުން ގަދީމީ ރޫމީންގެ ޒަމާނުގެ ފަންނުވެރިކަމުގެ ހުނަރުތަކާއި އަސަރުތައް ކޮންމެވެސް ވަރަކަށް ފެނިގެންދާނެއެވެ. ގެތަކުގެ ތަނބުތަކުގެ ފަރުމާ ތަފާތެވެ. ބައެއް ފާރުތަކުގައި އެކި ކަހަލަ ޖަނަވާރުތަކުގެ ސޫރަ ކަނޑައި ނަގާފައިވެސް އެބަހުއްޓެވެ.

އެކި ފަރުމާތަކަށް ގާ ކަނޑައިގެން ރޭނުމުގެ މަސައްކަތް ކުރާ މޭސަނުން ބުނިގޮތުގައި، ގަލުގައި އެކި ކަހަލަ ފަރުމާތައް ކުރުމުގެ މަސައްކަތް، ޒަމާނީ މެޝިނަރީއާއެކު ވަރަށް ބޮޑު ތަން ވަނީ ލުއިވެފައެވެ. މީގެ ކުރިން، ގައިގައި ހުރީވިއްޔާ ހުރި ހަކަތައެއް ބޭރުކޮށް، އެތައް ވަގުތެއް ހޭދަކޮށްގެން ކުރި މަސައްކަތަށް، މެޝިންތަކުގެ އެހީގައި ބޮޑު ލުޔެއް ވަނީ ލިބިފައެވެ. ނަތީޖާއެއްގެ ގޮތުން، އުފެއްދުންތެރިކަން ވަނީ މެކުހަށް ޖަހާފައެވެ.

ޒަމާނީ ޓެކްނޮލޮޖީއާއެކު މަސައްކަތްތެރިންގެ މޫނުމަތިންވެސް ފެނިގެންދަނީ ހަމަޖެހުމާއި އުފާވެރިކަމެވެ.

ލިބިފައިވާ ލުއި ފަސޭހަތަކާއެކު، މުޅި ޔަމަނުގެ މަންޒަރު ބަދަލު ކުރުމުގެ މަސައްކަތް، ބާރު ދުވެލީގައި ދަނީ ކުރިއަށެވެ. ގެދޮރުވެރިން ދަނީ ގަލު ވަޑާމުގެ ފަންނުވެރިންގެ ހުނަރުވެރިކަމާއެކު، އެމީހުންގެ ގެތަކަށް ފާހަގަކޮށްލެވޭ ފަދަ ބަދަލުތައް ގެންނަމުންނެވެ.

ބޮމާއި ބަޑީގެ ހަމަލާތަކުން ބޮޑެތި ގެއްލުންތަކެއް ލިބި، ހަލާކުވެފައިވާ އިމާރާތްތަކުގެ ބައިތައް ވީރާނާވާން ދޫކޮށްނުލައި، ޔަމަނުގެ ރައްޔިތުން ދަނީ ވީހާވެސް ފަންނުވެރި ގޮތަކަށް އެ ގައުމު އާރާސްތުކޮށް ކޮޅަށްޖެހުމުގެ މަސައްކަތް، ގަދައަޅައި ކުރަމުންނެވެ.

8 އަހަރަށް ދެމިގެންދިޔަ ހަނގުރާމައިގެ ތެރެއިން ޔަމަނުގެ ރައްޔިތުންނަށް ހިންދެމިލުމުގެ ނޭވާއެއް ލެވުނީ އޭޕްރިލް 2022ގައި އދ. މެދުވެރިވެގެން އެކުލަވާލި ސުލްހައިގެ އެއްބަސްވުމާއެކުގައެވެ.