މާ ބޮޑު ތަނަވަސްކަމެއް ނެތަސް، ސޫދާންގެ ރެފިއުޖީންނަށް ފާޠިނާ ހުޅުވާލީ އޭނާގެ އަމިއްލަ ގޭގެ ދޮރު

އަނެކާއަށް ބޭނުންވާ އޯގާތެރިކަމާއި ޙަމްދަރުދީ އަކީ އަތުން މާ ބޮޑު ހޭދައެއް ނުކޮށްވެސް ފޯރުކޮށްދެވިދާނެ، އަގު ނުކުރެވޭ ވަރުގެ ހަދިޔާއެކެވެ. އިޚުލާސްތެރި ހިތަކައިގެން އަނެކާއަށް ލޯބި ދީ، ތިމާއަށް ވުރެ ދަތި ހާލުގައި ހުރި ކޮންމެވެސް މީހަކަށް އެހީގެ އަތެއް ދިއްކޮށްލުމަކީ އޭގެ ޒާތުގައި ކުރަން މާ އުނދަގޫ ކަމެއް ނޫން ނަމަވެސް، ގިނަ ފަހަރަށް ނުކުރެވިފައި އޮންނަ ކަމެކެވެ.

ހާލެއްގައި ޖެހިގެން މީހަކު އަންނަ ހިނދު، ދޭނެ މާ ބޮޑު އެއްޗެއް ނެތޭ ހިތާ އެއްވެސް އެއްޗެއް ނުދީ ހުރުމަށްވުރެ، އަތުގައި އޮތް ކިތަންމެ ކުޑަ މިންވަރެއް ނަމަވެސް ދިއްކޮށްލުމަކީ އަނެކާއަށް ލިބޭ ކިހާވަރެއްގެ ތަސައްލީއެއްކަން ގިނަ ފަހަރު އޮންނަނީ ވަޒަން ނުކުރެވިއެވެ. އެއީ ކިތަންމެ ކުޑަ އެއްޗެއް ކަމަށް ތިމާއަށް ހީވި ކަމުގައި ވީ ނަމަވެސް، އެއީ ހާލުގައި ޖެހިގެން އަންނަ މީހަކަށް އަގު ބޮޑު ޖަވާހިރަކަށް ބޮޑު ހަދިޔާއަކަށް ވެއެވެ.

ޗާޑްގެ ކުފްރޫން އަވަށުގައި ދިރިއުޅެމުން ދާ، ޢުމުރުން 44 އަހަރުގެ ފާޠިނާ ޙާމިދަކީ 5 ދަރިންގެ މަންމައެކެވެ. ދިރިއުޅުމުގެ ހާލަތު މާ ތަނަވަސް ނޫން ނަމަވެސް، އަވަށްޓެރި ސޫދާންގައި ހިންގަމުންދާ ހަމަނުޖެހުންތަކާއި ކުރިމަތިލުންތަކުން ސަލާމަތްވުމަށް އަމިއްލަ ގެދޮރު ދޫކޮށް ޗާޑްއަށް އެތެރެވި ރެފިއުޖީންގެ ތެރެއިން 50 އަށް ވުރެ ގިނަ މީހުންނަށް ފާޠިނާ މިއަދު ޚިދުމަތް ކުރަމުން ދަނީ އުފަލާއެކުގައެވެ. އޭނާގެ އަމިއްލަ ގޭގެ ދޮރުތައް ވަނީ އެ ރެފިއުޖީންނަށްޓަކައި ހުޅުވާލާފައެވެ.

ފާޠިނާގެ ގޭގައި މިއަދު ހިޔާވަހިކަން ހޯދަމުން ދާ އެކަކީ ޢުމުރުން 30 އަހަރުގެ ފާޠިމާ އަދޫމްއެވެ. ސޫދާންގެ ދާރުފޫރުގައި ލިބެމުން ދިޔަ އަނިޔާތަކުން ސަލާމަތްވުމަށް ފާޠިމާގެ ދެމަފިރިން ޗާޑްއަށް ދިޔައީ އެ ދެމަފިރިންގެ 5 ދަރިންނާވެސް އެކީގައެވެ.

1444 ވަނަ އަހަރުގެ ރަމަޟާން މަހުގެ ފަހު 10 އެއްގެ ރޭތަކާއި ގާތްވެފައިވަނިކޮށް ސޫދާންގެ އަސްކަރިއްޔާއާއި ޕެރާމިލިޓްރީ ރެޕިޑް ސަޕޯރޓް ފޯރސަސް (އާރްއެސްއެފް)ގެ ފައުޖުތަކާ ދެމެދު ބަދަލު ކުރަން ފެށި ހަމަލާތައް އަދިވެސް ކުރިއަށް ދާ އިރު، ގެދޮރު ގެއްލުނު އާންމުންގެ ޢަދަދު ވަނީ 4 މިލިއަނަށް ވުރެ މައްޗަށް އަރާފައެވެ. ކައިރި ޤައުމުތަކަށް އެތެރެވާ ރެފިއުޖީންގެ ޢަދަދުތައް އިތުރު ވަމުން ދަނީ އޭގެ އިންތިހާއަށެވެ.

ސޫދާންގައި ކުރަމުންދާ ވަރުގަދަ ހަނގުރާމައިން ސަލާމަތް ވުމަށް ޗާޑްއަށް އެތެރެވި މީހުންގެ ޢަދަދު އެކަނިވެސް 3 ލައްކަ 20 ހާހަށް ވުރެ މައްޗަށް އަރައެވެ. ޗާޑްއަށް އެތެރެވި ރެފިއުޖީންގެ ތެރޭގައި ޒަޚަމްވެފައި ތިބި މީހުންގެ ޢަދަދު 2300 އަށް ވުރެ މައްޗަށް އަރައެވެ.  

ބޯޑަރާ 50 އަކަށް ކިލޯމީޓަރު ދުރުގައި، ރެފިއުޖީންނާއި ބެހޭ އދގެ އިދާރާ (ޔޫއެންއެޗްސީއާރް)އާއި އެ ޖަމާޢަތުގެ ބައިވެރިން ދަނީ ކުއްލި ހާލަތުގައި އެހީ ބޭނުންވާ މީހުންނަށް ބޭނުންވާ ކަންކަން ހަމަޖައްސާދީ، ރެފިއުޖީ ކޭމްޕުތަކަށް މީހުން ބަދަލު ކުރުމުގެ މަސައްކަތް ކުރަމުންނެވެ.

ހަށިގަނޑަށް ބޭނުންވާ މުހިންމު މާއްދާތައް ނުލިބުން ނުވަތަ މެލްނިއުޓްރިޝަންއާއި ހިމަ ބިހީގެ ޝިކާރައަކަށް ވެގެން ދެކުނު ސޫދާންއިން 57 ކުޑަކުއްޖެއްގެ ފުރާނަ ގެއްލިފައި ވާ ކަމަށް ޔޫއެންއެޗްސީއާރްއިން މަޢުލުމާތު ދެއެވެ. އޭގެ ތެރޭގައި ގިނައީ ޢުމުރުން އެންމެ 5 އަހަރުވެސް ނުވާ ކުދިންނެވެ. 15 ކުއްޖަކު މަރުވެފައި ވަނީ ހުސްވި ހަފުތާ ތެރޭގައެވެ.