ޖަރުމަނު ޤައުމީ ރާޒުވާ ޓީމުގެ އެންމެ ހަގު ކުޅުންތެރިޔަކީ ސޫރިޔާއަށް އުފަން، 11 އަހަރުގެ ރެފިއުޖީއެއް!

ރާޒުވާ ކުޅެން ދަސްކޮށްދިނުމަށް އެދި ބައްޕަ ގާތު ކިއަން ފެށިއިރު ޙުސައިން ބީސޫގެ ޢުމުރުން އެންމެ 4 އަހަރެވެ. މެދުއިރުމަތީގައި އޭރު ދިރިއުޅެމުން ދިޔަ ބީސޫގެ ބައްޕަ އެކަމަށް އާނބަސް ބުނަންދެން، ބައްޕަ ރާޒުވާ ކުޅެން އިން މޭޒު ވަށައިގެން ހިނގާލަހިނގާލަ ހުރެއެވެ.

ރާޒުވާ ކުޅިބައެއްގެ އެންމެ އަސާސީ ޤަވައިދުތައް ދަސްކުރިތާ މާ ގިނަ ދުވަހެއް ނުވެ، އޭނާގެ ކުޅަދާނަ ހުނަރުން މީހުން އާޝޯޚް ކުރުވަން ބީސޫ ފެށިއެވެ.

ޢުމުރުން 43 އަހަރުގެ ބައްޕަ، މުސްޠަފާ ކިޔައިދިން ގޮތުގައި، ހައެއްކަ މަސްދުވަހުގެ ތެރޭގައި، ބީސޫ ވަނީ ހަމަ ރަނގަޅަށްވެސް ރާޒުވާ ކުޅެން ދަސްކޮށްފައެވެ.

މިހާރު ޢުމުރުން 11 ފުރިފައިވާ ބީސޫ ތައްޔާރު ވަމުން ދަނީ ޖަރުމަނުވިލާތުގެ ޤައުމީ ރާޒުވާ ޓީމުން، މިމަހު ފަހުކޮޅު ކްރޮއޭޝިއާގައި ކުޅޭ މިތޯރްޕާ ކަޕްގައި ކުޅޭ މުބާރާތަށެވެ. ބީސޫ އަކީ ޖަރުމަނު ޗެސް ފެޑަރޭޝަންގެ ތާރީޚުގައިވެސް، އެ ޤައުމުގެ ޤައުމީ ރާޒުވާ ޓީމަށް ކުޅޭ އެންމެ ހަގު ކުޅުންތެރިޔާއެވެ.

އުފަން ވަޒަން ކަމަށްވާ ސޫރިޔާ ދޫކޮށް، ބީސޫގެ ޢާއިލާއިން ޖަރުމަނުވިލާތުގައި ރެފިއުޖީންގެ ގޮތުގައި ވަޒަންވެރިވޭ 2016 ވަނަ އަހަރުގެ ތެރޭގައެވެ. ޖަރުމަނުވިލާތުގައި ދިރިއުޅުމުގެ ކަންކަން ހަމަޖައްސާ، ހިނދަމާލި ގޮތަށް މުސްޠަފާ އެންމެ ފުރަތަމަވެސް ކުރިކަމަކީ ރާޒުވާ ކުޅޭނެ ސެޓެއް ގަތުމެވެ. އަދި ބީސޫއަށް ބައިވެރިވެވޭނެ ފަދަ ޗެސް ކުލަބައެއް ހޯދިއެވެ.

އިސާހިތަކު، އަވަށު ކުލަބުގެ ޓްރެއިނަރުގެ ލޮލުގައި ބީސޫ އަޅައިގަތެވެ. މާ ރަނގަޅަށް ޖަރުމަނު ބަސް ދަސްވެފައި ނެތުމުގެ ސަބަބުން، ކޯޗުންގެ އިރުޝާދުތައް އެންމެ ފުރިހަމައަށް ފަހުމް ނުވި ކަމުގައި ވީ ނަމަވެސް، ބީސޫ އޭރުވެސް އުޅުނީ އެހެން ކުދިންނަށް ވުރެ މާ ކުރީގައި ކަން ކޯޗުންނަށް އެނގުނެވެ. އެހާ ހިސާބުން ކޯޗުން އިރުޝާދު ދިނީ، އޭރު 6 އަހަރު ފުރިފައިވާ ބީސޫ، ސްޓޭޓް ފެންވަރުގެ ކުލަބާ ގުޅުމަށެވެ.

ބީސޫގެ ރާޒުވާ ޓީޗަރުގެ ގޮތުގައި މަސައްކަތް ކުރާ އަންދްޣިއާސް ކޫލަރ ފާހަގަ ކުރިގޮތުގައި، ކަމަށް ކަމޭ ހިތައިގެން މެޗު ކުޅުމާއި މޮޅުވާން އޭނާގެ ހިތުގައި އޮންނަ ވަރުގަދަ އަޒުމަކީ، ބީސޫގެ ހުނަރުވެރިކަމުގެ އެއް ބައެވެ. ކުޅެމުން ދިޔަ މެޗެއްގެ ވަކި ހިސާބަކުން ކޮޅު ބަދަލުކޮށް، އިދިކޮޅު ބައިވެރިޔާގެ ކޮޅަށް އަރާ، މެޗު ކުރިއަށް ގެންދަން ހަވާލު ކުރި ތަމްރީނެއްގެ ވާހަކަ، ކޫލަރ ވަނީ މީޑިއާއާ ހިއްސާކޮށްފައެވެ.

ރާޒުވާ ކުޅޭ އެކި މުބާރާތްތަކުގައި ބީސޫ އޭރު ބައިވެރިވާން ފަށައިފިއެވެ. 2020 ވަނަ އަހަރު އޮތް ޖަރުމަނު 10 އަހަރުން ދަށުގެ މުބާރާތުގައި ބީސޫ ވަނީ 1 ވަނަ ހޯދާފައެވެ. އަދި ދުނިޔޭގެ 12 އަހަރުން ދަށުގެ ޗެމްޕިއަން ޝިޕުން، މިދިޔަ އަހަރު ބީސޫ ވަނީ 3 ވަނަ ގެންގޮސްފައެވެ.

ބީސޫގެ ޢާއިލާއިންވަނީ މުބާރާތްތަކުގައި ވާދަކޮށް، ތަމްރީނުތަކުގައި ވާދަކުރުމަށް ބީސޫ ކުރަންޖެހޭ ދަތުރުތަކުގެ ޚަރަދުތައް ފޫބެއްދުމަށްޓަކާ، ހެޔޮ އެދޭ މީހުންގެ ފަރާތުން އެހީ ހޯދުމަށް ހާއްސަ ކެމްޕޭނެއް ފަށާފައެވެ. އަދި ބީސޫއަށް ސްޕޮންސަރެއް ލިބުމަކީވެސް ޢާއިލާއިން ކުރަމުންދާ ޢުއްމީދެކެވެ.