އެކަކަށް ބާވެގެން ދޫކޮށްލާ އެއްޗަކީ އަނެކާއަށް އޭގައި ކިތަންމެ ބޮޑު ފައިދާއެއް އެކުލެވިގެންވާ އެއްޗަކަށް ވެދާނެއެވެ. ދެމެހެއްޓެނިވި ދިރިއުޅުމަކަށް ވަކާލާތު ކުރަމުންދާ އަދުގެ ދުނިޔޭގައި، އެކަކު ބޭނުން ކުރުމަށް ފަހު ދޫކޮށްލާ އެއްޗެއް، ފުރުޞަތު އޮތް ކަމުގައި ވާނަމަ، ދެވަނަ މީހަކު އަލުން އެ ބޭނުން ކުރުމުގައި ގޯހެއްވެސް ނެތެވެ. ދިރިއުޅުމުގެ ހާލަތާއި ފެންވަރަށް ބަލާއިރު، އެއީ އަގު ދަށް ކަމެއްވެސް ނޫނެވެ. އެކަމުން ދައްކުވާދެނީ އިސްރާފު ކުރުމުގެ މުޑުދާރު އަމަލުން ނަފުސު ޠާހިރުވެފައި ވުން ކަމުގައިވެސް ސިފަ ކުރެވިދާނެއެވެ.

އެތައް އަހަރަކަށް ދިގުލާ ދިޔަ ހަނގުރާމައިގެ ސަބަބުން އިޖުތިމާއީ އަދި އިޤްތިޞާދީ ކާރިޘީ އަނދަވަޅަކަށް ވެއްޓިފައި ވާ އެއް ޤައުމަކީ ޔަމަނެވެ. ދިރިއުޅުމުގެ މައިދާނުގައި ކުރިމަތިލާން ޖެހިފައި ވާގޮންޖެހުންތައް، ގުނާ ޢަދަދު ކުރަން ދަތިވެފައި ވާ ޔަމަނުގެ ޒުވާނުން، އެ އަނދަވަޅުގަނޑުގެ ތެރޭގައި ތިބޭކަށް ގަސްތެއް ނުކުރެއެވެ. ދިރިއުޅުން އާރާސްތުކޮށް، ގެދޮރު ބިނާ ކުރުމުގައި ޔަމަނުގެ ޒުވާން ޚިޔާރު ކޮށްފައި ވަނީ ވެއްޓާ، ރައްޓެހި، އަދި ޖީބަށްވެސް ދޯޅަ ރާސްތާއެކެވެ. މިއަދު ޔަމަނުގައި ގެތަށް އާބާރުތަ ފިލުވަމުން ދަނީ އެއްބަޔަކު ބޭނުން ކުރުމަށް ފަހު ދޫކޮށްލާފައިވާ ފަރުނީޗަރުތަކުންނެވެ. ނުވަތަ ސެކަންޑްހޭންޑް ފަރުނީޗަރުންނެވެ. ނަތީޖާ އެއް ގޮތަށް ވުރެ ގިނަ ގޮތުން ފޮންޏެވެ. ރީތި ސާމާނުތަކުން ގޭތެއަށް ފުރިހަމަކަން ގެނެސްދޭ ފަދައިން، ވިޔަފާރިތަކަށްވެސް ލިބޭ ނަފާ އިތުރުވެގެން ދެއެވެ.

ޔަމަނަށް ސެކަންޑްހޭންޑް ފަރުނީޗަރު އިމްޕޯޓް ކުރަނީ ސައުދީ ޢަރަބިއްޔާއިންނެވެ. އެ ފަރުނީޗަރަށް ގެންނަން ޖެހޭ ކުދިކުދި ބަދަލުތައް ގެނައުމަށްފަހު، ޔަމަނުގެ ވެރިރަށް ސަނާ ބާޒާރުތަކުގައި ވިއްކާލަނީ އިންތިހާ ހެޔޮ އަގުގައެވެ. އެ ސިޓީގައި ހަނގުރާމައިގެ ސަބަބުން ގެދޮރު ގެއްލުނު އެތައް ސަތޭކަ ހާސް ބަޔަކު މިއަދު ވަޒަންވެރިވެފައިވާ ބިމެވެ.

ޤައުމު ބައިބައިކޮށް، އިޤްތިޞާދު ފުނޑާލި 8 އަހަރު ވީ ހަނގުރާމައިގެ ސަބަބުން، ޔަމަނުގެ އެތައް މިލިއަން ބަޔަކު މިއަދުވެސް ދިރިއުޅެމުން ދަނީ އިންތިހާ ބަނޑުހައިހޫނުކަމުގެ ތެރޭގައެވެ. މުޅި ޤައުމުގައި ވަނީ އިންސާނީ ކާރިޘާ ފެތުރިފައެވެ.

ޔަމަނުގައި ހަނގުރާމަ ކުރަމުން ދިޔަ ފަރާތްތަކުން، ހުސްވި އަހަރުގެ ކުރީކޮޅު ވަނީ ވަގުތީ ގޮތުން ހަމަލާ ބަދަލު ކުރުން ހުއްޓާލުމުގެ އެއްބަސްވުމެއް ބަލައިގެންފައެވެ. ނަމަވެސް، އޮކްޓޯބަރު 2022 ގައި، އެ އެއްބަސްވުން އާ ކުރުމަށް، އެ ފަރާތްތަކުން ވަނީ ފެއިލްވެފައެވެ.

ޔަމަނުގެ ވެރިކަމަށް ތަޅާފޮޅަމުންދިޔަ ހޫތީންނާ ދެކޮޅަށް، އިއްތިހާދީ ބާރުން ތެދުވުމާއެކު 2015 ވަނަ އަހަރު ފެށުނު ވަރުގަދަ ހަނގުރާމައިގެ ސަބަބުން ޔަމަނުގެ އިޤްތިޞާދާއި ޒާރޫރީ ޚިދުމަތްތައް މުޅިން ވަނީ އިނދަޖެހިފައެވެ. 30 މިލިއަނެއްހާ މީހުންގެ އާބާދީއެއް އޮތް ޔަމުން 80 ޕަސެންޓް މީހުން ވަނީ، އިތުރު ބައެއްގެ އެހީތެރިކަމަށް ބޭނުން ޖެހިފައެވެ.

ހެޔޮ އަގުގައި ކޮލިޓީ ފަރުނީޗަރު ވިއްކަމުންދާ ބާޒާރު އެކައުންޓަންޓެއް ކަމަށް ޝިހާބް އަލް-ލައިޒީ ބުނި ގޮތުގައި، އަލަށް ކައިވެނި ކުރާ ޖޯޑުތަކުން، އެމީހުންގެ އާ ގެތަކަށް މިއަދު ވައްދަވަމުން އެދަނީ ސެކަންޑް ހޭންޑް ފަރުނީޗަރެވެ.

ބައެއް ގެތަކުގައި މުޅިންހެންވެސް ހުރީ ސެކަންޑްހޭންޑް ފަރުނީޗަރެވެ. ޑިމާންޑް ފިސާރި ބޮޑެވެ. ސެކަންޑްހޭންޑް ފަރުނީޗަރު ވިޔަފާރިއާއެކު އެތައް ބަޔަކަށް ވަޒީފާގެ ފުރުޞަތުވެސް ވަނީ ތަނަވަސްވެފައެވެ. ވަޑިންނާއި ޑްރައިވަރުންގެ ދިރިއުޅުމަށްވެސް ތަނަވަސްކަމާއި ތިޔާގި ކަމެވެ.