އެސޯސިއޭޝަން ކަޕްގައި ހޯމަ ދުވަހުގެ ހަވީރު ޕޮލިސް ކުލަބާ ދެކޮޅަށް ކުޅުނު މެޗުން ބަލިވުމުގެ މައިގަނޑު ސަބަބަކީ ބިދޭސީ ކުޅުންތެރިންގެ ފެންވަރު ދަށްވުންކަމަށް ދިވެހި ސިފައިންގެ ކުލަބުގެ ކޯޗު ޖުނައިދު އަބްދުﷲ ބުނެފިއެވެ.

ސިފައިންގެ ޓީމުން ވަނީ އެންމެ ފުރަތަމަ ކުޅުނު މެޗުގައި ސްޕޯޓްސް ކުލަބް ސިޓީ އަތުން ސީދާ ތިން ސެޓުން ބަލިވެފައެވެ. ދެ ވަނަ މެޗުގައި ޕޮލިސް އަތުން ބަލިވީ މެޗުގެ ފުރަތަމަ ދެ ސެޓު ސިފައިންގެ ޓީމުން ހޯދާފައި ވަނިކޮށެވެ.

މެޗަށްފަހު ޖުނައިދު ބުނީ ބިދޭސީ ތިން ކުޅުންތެރިން ތިބޭއިރު، އޭގެ ތެރެއިން އެއް ކުޅުންތެރިޔަކަށް ވެސް އެޓޭކް ނުކުރެވިއްޖެ ނަމަ މައްސަލަ ޖެހޭ ކަމަށެވެ. ޖުނައިދު ބުނީ މުބާރާތުގައި ބަރޯސާ ވަނީ ބިދޭސީ ކުޅުންތެރިންނަށް ކަމަށެވެ. އަދި ސިފައިންގެ ޓީމަށް ލިބުނު ބިދޭސީ ކުޅުންތެރިންގެ ތެރޭގައި އަނިޔާގައި ތިބި ކުުޅުންތެރިން ހިމެނޭ ކަމަށް ވެސް އޭނާ ބުންޏެވެ. އިތުރަށް އޭނާ ބުނީ ނިސްބަތުން ބަލާނަމަ، ސިފައިންނަށް ލިބުނީ މުބާރާތުގައި ކުޅޭ ކުޅުންތެރިންނަށް ބަލާއިރު، އެންމެ ދަށް ކުޅުންތެރިން ކަމަށެވެ.

މީގެ އިތުރުން ޖުނައިދު ބުނީ ބިދޭސީ ކުޅުންތެރިންނަށް އެޓޭކް ނުކުރެވިއްޖެނަމަ، އެ މީހުން ވަރަށް ބޮޑަށް ސެޓަރަށް ޕްރެޝަރ ކުރާކަމަށެވެ. އަދި ފަހު ތިން ސެޓު ދިޔައީ މުޅި ޓީމު ހަމައަކަށް ނޭޅިގެން ކަމަށް ވެސް ޖުނައިދު ވަނީ ބުނެފައެވެ.

ޖުނައިދު ބުނީ މިހާރު އޮތް ހާލަތުގައި ވަރަށް ބޮޑަށް މަސައްކަތް ކުރަންޖެހޭ ކަމަށެވެ. އަދި ކުރިއަށް ހުރި މެޗުތައް ރަނގަޅުކޮށް ތިން ވަނަ މަގާމު ހޯދޭތޯ މަސައްކަތް ކުރާނެ ކަމަށް ޖުނައިދު ވަނީ ބުނެފައެވެ. އަދި ކުރިއަށް ހުރި މެޗުތަކަށް ނިކުންނާނީ އެ ދިމާވި މައްސަލަތައް ހައްލުކޮށްގެން ކަމަށް ޖުނައިދު ބުންޏެވެ.

މުބާރާތުގައި ސިފައިންގެ މެޗެއް ދެން އޮންނާނީ ބުދަ ދުވަހުގެ ހަވީރުއެވެ. އެ ދުވަހު ސިފައިން ނިކުންނާނީ މުބާރާތުގައި މިހާތަނަށް އެންމެ ރަނގަޅު ކުޅުމެއް ދެއްކި ކުލަބް ވެމްކޯއާ ދެކޮޅަށެވެ. ސިފައިންނަކީ މުބާރާތުގެ އެންމެ ފަހުގެ ޗެމްޕިއަނުންނެވެ.