ކޮވިޑް-19 ޕެންޑަމިކް ނިމުނީކަމަށް އަދި ބަލައިގެން ނުވާނެ ކަމަށް ވޯލްޑް ހެލްތް އޯގަނައިޒޭޝަން (ޑަބްލިއުއެޗްއޯ)ގެ ޑިރެކްޓަރ ޖެނެރަލް ޓެޑްރޯސް އަދަނޮމް ވިދާޅުވެއްޖެއެވެ.
މީޑިޔާތަކާއި ވާހަކަދައްކަވަމުން ޓެޑްރޯސް ވަނީ ކޮވިޑް-19 ކޮންޓްރޯލްކުރުމަށް އިތުރު ފިޔަވަޅުތައް އެޅުމަށް ބާރުއަޅުއްވާފައެވެ. ޓެޑްރޯސް ވިދާޅުވީ ގައުމުތަކުން ފެންނަ ކޮވިޑް-19ގެ ކޭސްތަކާއި، ބަލީގައި މަރުވާ މީހުންގެ އަދަދު މަދުވި ނަމަވެސް ޕެންޑަމިކް އަދިވެސް ނުނިމޭ ކަމަށެވެ. މީގެ ކުރިން ފެނިފައިނުވާވަރުގެ މާ ނުރައްކާތެރި ވޭރިއެންޓްތައް ފެނުމަކީ ދުރުގައި އޮތް ކަމެއް ނޫން ކަމަށް ޓެޑްރޯސް ވިދާޅުވިއެވެ.
މި ބަލީގައި ފާއިތުވި ހަފްތާގައި އެކަނިވެސް 7،000 މީހުން މަރުވެފައިވާކަމަށާއި، މާ ނުރައްކާތެރި ވޭރިއެންޓެއް އައުމަކިީ ދުރުގައި އޮތް ކަމަކަށް ނުވާއިރު އެތައް ބަޔަކު ތިބީ ރައްކާތެރިވެގެން ނޫން ކަމުގައި ޓެޑްރޯސް ވިދާޅުވިއެވެ.
އަދިވެސް ބައެއް ގައުމުތަކުގައި ކޮވިޑަށް ޓެސްޓު ކުރެވޭނެ ކެޕޭސިޓީ ނެތް ކަމަށާއި، ވެކްސިންވެސް ގިނަ ގައުމުތަކަށް ލިބުން ދަތިކަމަށް ޓެޑްރޯސް ވިދާޅުވިއެވެ. އެންމެ ފުރަތަމަ ވެކްސިން ޖަހަން ފެށިތާ 18 މަސް ވެފައިވާއިރު، އާބާދީގެ 40 އިންސައްތަވެސް ވެކްސިން ފުރިހަމަ ނުކުރާ 68 ގައުމު އަދިވެސް އެބައޮތް ކަމަށް އޭނާ ވިދާޅުވިއެވެ.
ޑަބްލިއުއެޗްއޯއިން ގެންދަނީ ގައުމުތަކަށް ވެކްސިން ފޯރުކޮށްދިނުމަށާއި، ވެކްސިން ދިނުމަށް ގިނަ މަސައްކަތްތަކެއް ކުރަމުންނެވެ. މިގޮތުން ގައުމުތަކާއި ގުޅިގެން ޑޯ-ޓު-ޑޯ ކެމްޕޭންތައްވެސް ކުރިއަށްގެންދިޔުން ފަދަ އެކިއެކި ހަރަކާތްތައް ދަނީ ކުރިއަށް ގެންދަމުންނެވެ.
