އިސް ގާޒީ ޝަކީލް އާއި ޖޭއެސްސީން ބައްދަލުކުރިކަމަށް ބުނެ ހަޤީޤަތާއި ޚިލާފު ވާހަކަދެއްކުން ގޯސް

ކުރީގެ ރައީސް އަބްދުﷲ ޔާމީންގެ މައްޗަށް އުފުލާފައިވާ ދައުވާތަކުގެ ޝަރީއަތާ ހަވާލުވެ ހުންނެވި ކްރިމިނަލް ކޯޓުގެ އިސް ގާޒީ އަހްމަދު ޝަކީލްއާއި ޖުޑިޝަލް ސާވިސް ކޮމިޝަން (ޖޭއެސްސީ) ގެ ރައީސް ހިސާން ހުސައިން ބައްދަލުކުރެއްވި ކަމަށް ބުނާ ވާހަކަތައް ރައްޔިތުންގެ މަޖިލީހުގެ ރައީސް، މުޙައްމަދު ނަޝީދުވެސް ދޮގު ކުރައްވައިފިއެވެ.

ހޯމަ ދުވަހުގެ މަޖިލިސް ޖަލްސާގައި ރައީސް ނަޝީދު ވިދާޅުވީ، ޖުޑީޝަލް ސަރވިސް ކޮމިޝަންގެ ޤާނޫނަށް އިސްލާޙު ގެނައުމުގެ ބިލުގެ މަސައްކަތުގެ އިތުރުންވެސް ޖުޑީޝަރީއާ ގުޅޭ އިތުރު މަސައްކަތްތައް މި ހަފްތާ ތެރޭގައި މަޖިލީހުގައި ތާވަލު ކުރެވިފައިވާ ކަމަށެވެ.

ރައީސް ނަޝީދު ވިދާޅުވީ، ފަނޑިޔާރުން ވަކި ކުރުމުގެ ތަހުގީގުތައް ގެންދާނެ ގޮތް ފުށުނަރާނެ ގޮތަކަށް ތަފްސީލުކޮށް ޤާނޫނުގައި ކަނޑައެޅިފައި އޮތުން މުހިއްމު ކަމަށެވެ.

އެ ވާހަކަ ދައްކަވަމުން ރައީސް ނަޝީދު ވަނީ ޖުޑީޝަލް ސަރވިސް ކޮމިޝަނުގެ ރައީސް ހިސާން ހުސައިންއާއި ކްރިމިނަލް ކޯޓުގެ އިސްގާޒީ އަހުމަދު ޝަކީލު ބައްދަލު ކުރައްވާފައި ނުވާކަމަށް ހިސާންވެސް ވިދާޅުވެފައިވާކަން ފާހަގަ ކުރައްވާފައެވެ.

ހިސާން ވިދާޅުވާ ގޮތުގައި އެއީ ކަނޑައެޅިގެން ދޮގު ވާހަކައެކެވެ.

އެ ބާވަތުގެ ހަގީގަތެއް ނެތް ވާހަކަތައް ފަތުރަމުން ގެންދިއުމަކީ އެއްވެސް ފަރާތަކަށް ފައިދާހުރި މަސްލަޙަތެއް ނޫންކަމަށް ދެކިވަޑައިގަންނަވާކަމަށް ރައީސް ނަޝީދު ވިދާޅުވިއެވެ.

ދަންވަރު ވަގުތެއްގައި އިސްގާޒީ ޝަކީލް ޖޭއެސްސީއަށް ގެންދަވާ، ޖޭއެސްސީގެ ރައީސް ކަމުގައި ހުންނެވި މަޖިލީހުގެ ތުޅާދޫ ދާއިރާގެ މެންބަރު ހިސާންގެ އިތުރުން ބަންޑާރަ ނައިބު އިބްރާހީމް ރިފްއަތާއި ވެސް ބައްދަލުކުރައްވާފައިވާ ކަމަށް ބައެއް މީޑިއާތަކުން ރިޕޯޓްކޮށްފައިވެއެވެ.

ޖޭއެސްސީން ކުރި ޓްވީޓެއްގައި ބުނީ ކްރިމިނަލް ކޯޓުގައި މިހާރު ކުރިއަށްދާ ކުރީގެ ރައީސް ޔާމީންގެ މައްސަލަ ބައްލަވާ ގާޒީ އާއި ހިސާން އާއި ރިފްއަތު ބައްދަލުކުރެއްވި ކަމަށް ބުނެ ޓްވީޓް ކުރި މީޑިއާގެ މައްސަލަ ކަމާބެހޭ ފަރާތްތަކަށް ހުށަހަޅާނެ ކަމަށެވެ.

އަދި އެ ކޮމިޝަނުގެ އަގު ވައްޓާލުމަށް އިތުބާރު ނުހިފޭ ދޮގު ފަތުރާކަމަށާއި އެކަން ކުށްވެރިކުރާ ކަމަށްވެސް ޖޭއެސްސީގެ މި ޓްވީޓުގައި ބުނެފައިވެއެވެ.

ކްރިމިނަލް ކޯޓުގައި ދެ މައްސަލައެއްގައި ކުރީގެ ރައީސް ޔާމީންގެ މައްޗަށް އުފުލާފައިވާ ހަތަރު ދައުވާއެއްގެ ޝަރީއަތް ކުރިއަށް އެބަދެ އެވެ. އެއީ އެމްއެމްޕީއާރުސީ ޚިޔާނާތުގެ މައްސަލާގައި ހިމެނޭ ދެ ރަށެއްގެ މުއާމަލާތަކާ ގުޅިގެން އުފުލާފައިވާ ރިޝްވަތުގެ ދައުވާތަކަކާއި މަނީ ލޯންޑަރިންގެ ދައުވާތަކެކެވެ. އެ މައްސަލަތައް ކޯޓުގައި ބައްލަވަނީ އިސްގާޒީ ޝަކީލެވެ.