އެސޯސިއޭޝަން ކަޕްގެ ފިރިހެން ޑިވިޝަންގައި އެންމެ ފަހުގެ ޗެމްޕިއަން ދިވެހި ސިފައިންގެ ކުލަބް ސީދާ ތިން ސެޓުން ބަލިކޮށް، ސިޓީ ސްޕޯޓްސް ކުލަބުން ރަނގަޅު ފެށުމަކާއެކު މުބާރާތް ފަށައިފިއެވެ.

ޒުވާނުންގެ މަރުކަޒުގެ އެތެރޭ ހޯލުގައި އާދިއްތަ ދުވަހުގެ ރޭ ކުޅުނު މެޗަކީ މުބާރާތުގައި ދެ ޓީމުގެ ފުރަތަމަ މެޗެވެ. ސިޓީން ވަނީ ސީދާ ތިން ސެޓުން ސިފައިން ބަލިކޮށްފައެވެ. މިއީ މުފަހަރުގެ މުބާރާތުގައި ސީދާ ތިން ސެޓުން ނިމުނު ފުރަތަމަ މެޗެވެ.

މުޅި މެޗުގައި ވެސް ރަނގަޅަށް ކުޅެފައިވަނީ ސިޓީންނެވެ. މެޗުގައި ސިޓީގެ އަލީ ހުޒާމް (ހުޒަންޓެ) އަދި އެ ޓީމުގެ ބިދޭސީ ކުޅުންތެރިޔާ ވިނީތު ކުމާރުގެ މޮޅު ކުޅުން ވަނީ ފެނިފައެވެ. ސިޓީން މެޗުގެ ފުރަތަމަ ސެޓު ހޯދީ 25-21 ންނެވެ. ދެ ވަނަ ސެޓު ފަށައިގެން ކުޅުން ފެނުނީ ވަރަށް ފޯރިގަދަ ކޮށެވެ. މި ސެޓުގައި ސިފައިންގެ ޓީމުން ވަނީ ކުޅުން ރަނގަޅުކޮށް ބޮޑު ލީޑެއް ނަގާފައެވެ. އެ ޓީމުން ހަ ޕޮއިންޓުގެ ލީޑެއްގައި އޮވެ ކުޅެންމުން ދަނިކޮށް، ސިޓީން ވަނީ ފަހަތުން އަރައި އެއްވަރުކޮށް، މި ސެޓުވެސް ހޯދާފައެވެ. މި ސެޓުގެ ފަހު ވަގުތު ސިޓީން ސެޓު ހޯދީ ސިފައިންގެ އެޓޭކަރުންގެ އެޓޭކްތައް ބްލޮކްކޮށް، އޭގެ ފައިދާ ނަގައިގެންނެވެ. މި ސެޓު އެ ޓީމުން ހޯދީ 30-28 ންނެވެ. ތިން ވަނަ ސެޓު ފަށައިގެން ސިފައިންގެ ފަރާތުން މާ އެދެވޭ ކުޅުމެއް ފެނިފައެއް ނުވެއެވެ. މި ސެޓުގައި މުޅިން ލީޑުގައި އޮވެ، ސިޓީން ސެޓު ހޯދީ 25-18 ންނެވެ. މެޗުގެ މޮޅު ކުޅުންތެރިޔަކަށް ހޮވުނީ ސިޓީގެ ވިނީތު ކުމާރުއެވެ.

ދެ ވަނަ މެޗުގައި ބައްދަލުކުރީ އޮފު އެފްސީއާއި ގުޑީސް ސްޕޯޓްސް ކުލަބެވެ. މި މެޗަށް ނުކުތްއިރު، ދެ ޓީމު ވެސް ވަނީ ފުރަތަމަ މެޗުން ބަލިވެފައެވެ. ގުޑީސް ބަލިވީ ސިފައިންގެ އަތުންނެވެ. އަދި އޮފު އެފްސީ ބަލިވީ ވެމްކޯ އަތުންނެވެ. އެހެންކަމުން، މުހިންމު މެޗަކަށް ދެ ޓީމު ނިކުތްއިރު، މި މެޗު ތިން ސެޓު އެއް ސެޓުން ކާމިޔާބުކުރީ އޮފު އެފްސީއެވެ. ފުރަތަމަ މެޗުގައި ލިބުނު އަނިޔާގެ ސަބަބުން ގުޑީސްގެ ސެޓަރު ހުސެއިން ވިސާމް މި މެޗުގައި ނުފެނެއެވެ.

ވާދަވެރި ކުޅުމަކަށްފަހު، މެޗުގެ ފުރަތަަމަ ސެޓު އޮފު އެފްސީން ކާމިޔާބުކުރީ 25-23 ންނެވެ. ނަމަވެސް، ގުޑީސުން ވަނީ ދެ ވަނަ ސެޓަށް ނިކުމެ މި ސެޓު ކާމިޔާބުކޮށްފައެވެ. އެ ޓީމުން ދެ ވަނަ ސެޓު ހޯދީ 25-20 ންނެވެ. މެޗުގައި ރެފްރީގެ ނިންމުންތަކާމެދު ގުޑީސްގެ ކުޅުންތެރިންގެ އިތުރުން ކޯޗު ވެސް ވަނީ ވަރަށް ބޮޑަށް ހިތްހަމަ ނުޖެހުން ފާޅުކޮށްފައެވެ. ގުޑީސްގެ ފަރާތުން މާ ރަނގަޅު ކުޅުމެއް ނުފެނުނު މެޗުގެ، ތިން ވަނަ ސެޓާއި ހަތަރު ވަނަ ސެޓު ހޯދީ އޮފު އެފްސީންނެވެ. ތިން ވަނަ ސެޓުގައި އޮފް އެފްސީގެ ބިދޭސީ އެޓޭކަރުން ކަމަށްވާ، ގުރޫ ޕްރަސަންތު އަދި އަމިތު ގުލިއާގެ ރަނގަޅު އެޓޭކްތަކެއް ވަނީ ފެނިފައެވެ. އޮފުން މި ސެޓު ހޯދީ 25-23 ންނެވެ. ހަތަރު ވަނަ ސެޓުގައި ވެސް ދެ ޓީމުގެ ފަރާތުން ހިތްހަމަ ނުޖެހުންތަކެއް ވަނީ ފެނިފައެވެ. އެއީ ރޮޓޭޝަންގެ މައްސަލައެއްގައާއި މެޗުގެ ސްކޯއަށް ގެނެވުނު ބަދަލެއްގެ ސަބަބުންނެވެ. ފަހު ސެޓު އޮފުން ހޯދީ 25-21 ންނެވެ. މި މެޗުގެ މޮޅު ކުޅުންތެރިޔަކަށް ހޮވުނީ އޮފު އެފްސީގެ ގުރޫއެވެ.

މުބާރާތުގެ ޝެޑިއުލަށް ބަދަލު ގެނައުމަށް ވީއޭއެމުން ވަނީ ނިންމާފައެވެ. ދެން މުބާރާތް ކުރިއަށް ދާނީ ހަވީރު މެޗެއް އަދި ރޭގަނޑު މެޗެއް ކުޅޭ އުސޫލުންނެވެ. މުބާރާތުގައި މިއަދު ހަވީރު ސިފައިން ނިކުންނާނީ ޕޮލިހާ ދެކޮޅަށެވެ. އަދި މިރޭ އޮންނަ މެޗުގައި ސިޓީ ނިކުންނާނީ ވެމްކޯއާ ދެކޮޅަށެވެ.