ރަޝިއާގެ ތެޔޮ ގަތުން ލަންކާއަށް މަޖުބޫރުވެދާނެ: ބޮޑުވަޒީރު
ރަޝިއާއިން ދަނީ ޑިސްކައުންޓް އަގުތަކެއްގައި އެގައުމުގެ ކްރޫޑް އޮއިލް ގައުމުތަކަށް ވިއްކުމަށް ހުށަހަޅަމުން
ލަންކާގެ ބޮޑުވަޒީރު ރަނިލް ވިކްރަމަސިންގހަ
ރަޝިއާގެ ތެޔޮ ގަތުން ލަންކާއަށް މަޖުބޫރުވެދާނެ ކަމަށް އެގައުމުގެ ބޮޑުވަޒީރު ރަނިލް ވިކްރަމަސިންގހަ ވިދާޅުވެއްޖެއެވެ.
އެސޯސިއޭޓެޑް ޕްރެސްއަށް ހޮނިހިރު ދުވަހު ދެއްވި އިންޓަވިއުއެއްގައި ބޮޑުވަޒީރު ވިކްރަމަސިންގހަ ވިދާޅުވެފައި ވަނީ ލަންކާއަށް ބޭނުންވާ ތެޔޮ އެހެން ގައުމުތަކުން ލިބޭތޯ ބަލާނެ ކަމަށާއި އެހެން ނަމަވެސް ރަޝިއާއިން ތެޔޮ ގަތުމަށްވެސް އެގައުމުުން ދެކޮޅުނުހަދާނެ ކަމަށް ވިދާޅުވެފައެވެ.
ލަންކާއަށް މިހާރު ދިމާވެފައިވާ އިގުތިސާދީ ކާރިސާގެ ސަބަބުން އެގައުމަށް ވަނީ އިމްޕޯޓަށް ޚަރަދުކުރުމަށް ބޭރުފައިސާ ހޯދުމަށް ދަތިވެފައެވެ. ތެޔޮ ގަތުމަށް އެގައުމުގެ އާންމު ރައްޔިތުން ޕެޓްރޯލް ޝެޑްތައް ކައިރީގައި ކިއު ހަދައިގެން ތިބުމަކީ މިހާރު އާންމުކަމެވެ.
ރަޝިއާ ޔޫކްރެއިން ހަނގުރާމައާ ގުޅިގެން އެމެރިކާއާއި ހުޅަނގުގެ ގައުމުތަކުން ރަޝިއާއާ ދެކޮޅަށް އަޅަމުންދާ ދަތިކުރުމުގެ ފިޔަވަޅުތަކުގެ ތެރެއިން ރަޝިއާގެ ތެޔޮ ގައުމުތަކަށް އިމްޕޯޓްކުރުން ހުއްޓާލުމަށް މަސައްކަތްކުރަމުންދާއިރު، ރަޝިއާއިން ދަނީ ޑިސްކައުންޓް އަގުތަކެއްގައި އެގައުމުގެ ކްރޫޑް އޮއިލް ގައުމުތަކަށް ވިއްކުމަށް ހުށަހަޅަމުންނެވެ.
މިކަމުގެ ސަބަބުން ތެލުގެ އަގު ދުނިޔޭގެ މާކެޓުގައި ވަނީ ވަރަށް ބޮޑަށް އުފުލިފައެވެ. ތެލުގެ އަގު އުފުލިފައިވާ މިދަނޑިވަޅުގައި، ބޭރުފައިސާ ހޯދުމަށް ދަތިވެފައިވާ ލަންކާއަށް ރަޝިއާއިން ހެޔޮ އަގެއްގައި ތެޔޮ ވިއްކަން ހުށަހަޅައިފި ނަމަ އެއީ ލަންކާއަށް ނޫނެކޭ ބުނަން ފަސޭހަވާނެ ކަމެއް ނޫނެވެ.
މިނިމުނު ހަފުތާގެ ތެރޭގައި އެގައުމުގެ ބޮޑުވަޒީރު ވަނީ ކުރިއަށް އޮތް ދެތިން ހަފުތާގައި ޕެޓްރޯލްގެ ތަދުކަމާ ކުރިމަތިލާން ޖެހޭނެ ކަމަށް ވިދާޅުވެފައެވެ.
