ރައްޔިތުންގެ މަޖިލީހުގެ ރައީސް، މުޙައްމަދު ނަޝީދަށް އަމާޒުކޮށް ދިން ޙަމަލާގެ އަޑުއެހުމެއް އާދިއްތަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
މި މައްސަލައިގެ ރިޔާސަތު ބަލަހައްޓަވަނީ އެ ކޯޓުގެ ގާޒީ އާދަމް މުހައްމަދެވެ. ބެންޗުގައި ދެން ހިމެނިވަޑައިގަންނަވަނީ ގާޒީ ސޮފްވަތު ޙަބީބާއި، ގާޒީ މުހައްމަދު މިސްބާޙުއެވެ.
އާދިއްތަ ދުވަހުގެ އަޑުއެހުމުގައި އޮތީ މި މައްސަލައިގެ އިފްތިތާހީ ބަޔާން އިއްވުމެވެ. އެހެންނަމަވެސް، އަޑުއެހުން ފައްޓަވަމުން މައްސަލަ ބައްލަވާ ގާޒީ އާދަމް ވިދާޅުވީ، މި މައްސަލައިގައި ދައުވާލިބޭ އިސްހާގުގެ ފަރާތުން ކޯޓަށް ސިޓީއެއް ފޮނުވާފައެވެ.
އިސްހާގުގެ ސިޓީގައި ބަޔާންކޮށްފައިވަނީ އިސްޙާގުގެ އާއިލާ މީހެއްގެ މައްޗަަށް ދައުވާ ކޮށްފައިވާ މައްސަލައެއްގައި ޙުކުމަކާއި ހިސާބަށް ގޮސްފައިވަނިކޮށް އޭނާގެ އާއިލާގެ އެހެން މެމްބަރަކު ގާޒީ އާދަމްްއަށް އިންޒާރު ދީފައިވާ ކަމަށެވެ.
އެ މައްސަލައަކީ ޔާމީން ރަޝީދުގެ މަރުގެ މައްސަލައެވެ. ޔާމީން ރަޝީދުގެ މަރާއި ގުޅިގެން ދައުވާ އުފުލާފައިވާ ފަރާތްތަކުގެ ތެރޭގައި އިސްހާޤުގެ ކޮށްކޮއެއް ހިމެނެއެވެ. ނަމަވެސް އޭނާގެ މައްޗަށް ކުށް ސާބިތުވެފައެއް ނުވެއެވެ.
އެ މައްސަލަ ހިނގަމުންދިޔައިރު އިސްޙާގުގެ އާއިލާ މެމްބަރެެއްގެ ފަރާތުން ގާޒީ އާދަމްއަށް އިންޒާރު ދިން މައްސަލައެއް ފެންމަތިވެފައިވާތީ އިސްޙާގުގެ ސިޓީގައި އެދިފައިވަނީ ގާޒީ އާދަމް މި މައްސަލައިން ތަނާޒުލްވެވަޑައިގަތުމަށެވެ.
ސަބަބަކީ އެއީ ގާޒީގެ ތައައްސުބެއް އުފެދިދާނެ ކަމަކަށް ވާތީއެވެ.
ގާޒީ ވިދާޅުވީ، ޝަރީއަތުންވެސް އެކަންކަން އިތުރަށް ސާފުކޮށްފައިވާ ކަމަށެވެ. ގާޒީ ވަނީ އެ ހިނދުން މައްސަލައިން ތަނާޒުލްވެވަޑައިގެންފައެވެ.
