ތ. ތިމަރަފުށީގައި ހަރުކަށި ފިކުރު ފަތުރައި، ރާއްޖޭގައި ޓެރަރިސްޓު ހަމަލާއެއް ދޭން ރޭވި މައްސަލައިގައި އެކަކު ފިޔަވައި އެންމެން މިނިވަންވެއްޖެ
9 އޮކްޓޯބަރު 2026 | ހުކުރު 09:23ތިމަރަފުށީގައި ޓެރަރިސްޓު ހަމަލާއެއް ދޭން ރޭވި މައްސަލާގައި ދައުވާލިބުނު ހަތަރު މީހެއްގެ މައްޗަށް ކުށް ސާބިތުވާކަމަށް ކްރިމިނަލް ކޯޓުން ވަނީ ހުކުމްކޮށްފައި. މި މައްސަލާގައި ހިމެނޭ ތިން މީހަކު ބަންދުގައި ހޭދަކުރި މުއްދަތާއެކު އަދަބު ތަންފީޒުވެ މިނިވަންވެފައިވާއިރު، މިހާރު ބަންދުގައި ހުރީ އަށް އަހަރުގެ ޖަލު ހުކުމެއް އިއްވި އަލީ އަރުހަމް އެކަނި
ތ. ތިމަރަފުށީގައި ހަރުކަށި ފިކުރު ފަތުރައި، ރާއްޖޭގައި ޓެރަރިސްޓު ހަމަލާއެއް ދޭން ރޭވި މައްސަލާގައި އެކަކު ފިޔަވައި އެންމެން މިނިވަންވެއްޖެ | ޕޮލިސް
ތ. ތިމަރަފުށީގައި ހަރުކަށި ފިކުރު ފަތުރައި، ރާއްޖޭގައި ޓެރަރިސްޓު ހަމަލާއެއް ދޭން ރޭވި މައްސަލާގައި ދައުވާ އުފުލި މީހުންގެ ތެރެއިން ބައެއް މީހުންގެ މައްޗަށް ކުށް ސާބިތުވާކަމަށް ކްރިމިނަލް ކޯޓުން ހުކުމް ކޮށްފި އެވެ.
މި މައްސަލާގައި ޖުމްލަ ހަތް މީހެއްގެ މައްޗަށް ދައުލަތުން ދައުވާ އުފުލާފައިވާއިރު، އޭގެ ތެރެއިން ކުށް ސާބިތުވެފައިވަނީ ހަތަރު މީހެއްގެ މައްޗަށެވެ. މި މައްސަލައަކީ ތިމަރަފުށީގައި އޮޕަރޭޓްކުރި އައިސް ޖަމާއަތަށް ތާއީދުކުރާ ސެލްއަކުން ރާއްޖޭގައި ބޮޑު ހަމަލާއެއް ދޭން އުޅުނު ކަމަށް ބުނެ ފުލުހުން ތަހުގީގުކުރި މައްސަލައެކެވެ.
ކްރިމިނަލް ކޯޓުން އިއްވި ހުކުމުގައިވާ ގޮތުން، ޓެރަރިސްޓު ޖަމާއަތަކަށް ތާއީދުކުރުމުގެ ކުށުގައި އަބްދުﷲ އިމާދު ތިން އަހަރަށް، އަލީ މުނީޒު އެއް އަހަރާއި ނުވަ މަހާއި އެއް ދުވަހަށް، އަދި އަލީ އަރުހަމް މުހައްމަދު ތިން އަހަރަށް ޖަލަށްލުމަށް ވަނީ ހުކުމްކޮށްފަ އެވެ. މީގެ އިތުރުން އަލީ އަރުހަމް މުހައްމަދުގެ މައްޗަށް ހަނގުރާމައަށް ދާން އުޅުމުގެ ކުށް ސާބިތުވެ، އެ ކުށުގެ އަދަބެއްގެ ގޮތުން އިތުރު ފަސް އަހަރުގެ ޖަލު ހުކުމެއް ވަނީ އިއްވާފަ އެވެ. އަދި އަދުލުއިންސާފު ގާއިމުކުރުމަށް ހުރަސްއެޅުމުގެ ކުށުގައި އަބްދުﷲ އިމާދާއި އިބްރާހީމް ލޫތު ކޮންމެ މީހަކު އެއް އަހަރާއި ހަތް މަހާއި ހަ ދުވަހަށް ޖަލަށްލުމަށް ވެސް ވަނީ ހުކުމްކޮށްފަ އެވެ.
މި މައްސަލާގައި ހިމެނޭ އަބްދުﷲ އިމާދާއި، އަލީ މުނީޒު އަދި އިބްރާހީމް ލޫތުގެ މައްޗަށް އިއްވި ޖަލު ހުކުމްތަކާ ގުޅިގެން ކޯޓުން ބުނެފައިވަނީ، އެ މީހުން ބަންދުގައި ހޭދަކުރި މުއްދަތު އުނިކުރުމުން ތަންފީޒުކުރަންޖެހޭ އިތުރު އަދަބެއް މިހާރު ނެތް ކަމަށެވެ. އެހެންކަމުން މި މައްސަލާގައި ދައުވާ ލިބުނު މީހުންގެ ތެރެއިން މިހާރު ބަންދުން މިނިވަންނުވެ ހުރީ ހަމައެކަނި އަލީ އަރުހަމް މުހައްމަދު ކަމަށް ކޯޓުގެ ނިންމުމުން އެނގެ އެވެ.
މި މައްސަލާގައި ދައުލަތުން އުފުލި އެހެން ބައެއް ދައުވާތައް ސާބިތުނުވާ ކަމަށް ކޯޓުން ވަނީ ކަނޑައަޅާފަ އެވެ. އޭގެ ތެރޭގައި ޓެރަރިޒަމްގެ އަމަލެއް ހިންގަން ރޭވުމާއި، ޓެރަރިޒަމަށް ހިތްވަރު ދިނުމާއި، ޓެރަރިސްޓު ޖަމާއަތެއްގެ މެންބަރަކަށް ވުމުގެ ދައުވާތައް ހިމެނެ އެވެ. މި ދައުވާތައް ސާބިތުނުވާ ކަމަށް ކޯޓުން ނިންމީ ހުށަހަޅާފައިވާ މޮބައިލް ފޯނަކުން ނެގިފައިވާ ޑާޓާގެ ނަޒާހާތްތެރިކަމާމެދު ސުވާލު އުފެދިފައިވާކަމަށް ބަޔާންކޮށެވެ.
ދައުލަތުން މި މައްސަލާގައި ހިމެނޭ މީހުންގެ މައްޗަށް ދައުވާ އުފުލައި ކޯޓަށް ހުށަހަޅާފައިވަނީ 8 ފެބްރުވަރީ 2021 ގައެވެ. މި މައްސަލައިގެ ހެކިބަސް ނަގައި ނިމިފައިވަނީ 2026 ވަނަ އަހަރުގެ ޖަނަވަރީ މަހުގެ ތެރޭގަ އެވެ. އަދި މައްސަލައިގެ ޚުލާސާ ބަޔާން އިއްވައި އަޑުއެހުންތައް ނިންމާލާފައިވަނީ 2026 ވަނަ އަހަރުގެ އޭޕްރީލް މަހުގެ ތެރޭގައި އެވެ.
ކްރިމިނަލް ކޯޓުން މި މައްސަލައިގެ ހުކުމް އިއްވުމަށް މަޖިލިސް ބާއްވާފައިވަނީ 8 އޮކްޓޫބަރު ހެނދުނު 8:15 ގައި އެވެ.
މި މައްސަލާގައި ސާބިތުނުވާ ކަމަށް ކޯޓުން ނިންމި ދައުވާތައް އިސްތިއުނާފު ކުރުމާ މެދު ޕްރޮސިކިއުޓަރ ޖެނެރަލްގެ އޮފީހުން ވަނީ ވަކި ގޮތެއް ނިންމާނީ މައްސަލައިގެ ރިޕޯޓު ލިބުމުން ކަމަށް ބުނެފަ އެވެ.
